ၵူၼ်းပၢႆႈၽေးသိုၵ်းမိူင်းယၢင်းလႅင် ၸိူဝ်းႁွတ်ႈထိုင်မိူင်းတႆးပွတ်းၸၢၼ်းၼၼ်ႉ သင်ဝႃႈၶႂ်ႈၶိုၼ်းမိူဝ်းဢဝ်ၶူဝ်းၶွင်ႈတီႈဝၢၼ်ႈၵဝ်ႇမိူင်းလင်ၸိုင် ႁႂ်ႈယွၼ်းဢၼုယၢတ်ႈတီႈ ပလိၵ်ႈမိူင်းယၢင်းလႅင် KSP လူးၵွၼ်ႇဝႃႈၼႆ။
ၵူၼ်းမိူင်းယၢင်းလႅင် ၸိူဝ်းပၢႆႈၽေးပၢင်တိုၵ်း 1111 ႁွတ်ႈထိုင်မိူင်းတႆးပွတ်းၸၢၼ်းလႆႈမႃးၶၢဝ်းတၢင်းး 2 လိူၼ်ၼႆႉ ၵမ်ႈၽွင်ႈၶႂ်ႈၶိုၼ်းပွၵ်ႈမိူဝ်းဢဝ်ၶူဝ်းၵိၼ် ၶူဝ်းၸႂ်ႉတီႈဝၢၼ်ႈၵဝ်ႇမိူင်းလင် ၊ ၽႂ်ၶႂ်ႈမိူဝ်းၵေႃႈတၵ်းလႆႈယွၼ်းၶႂၢင်ႉတီႈၸုမ်းပလိၵ်ႈမိူင်းယၢင်းလႅင်ၵွၼ်ႇ ၼႆ ၽူႈၸတ်းၵၢၼ်သုၼ်ႇလႆႈၵူၼ်းမိူင်းယၢင်းလႅင် ဢူးပၺႃးၶုၼ်ႇဢွင်ႇ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈၼင်ႇၼႆ။
“ၵမ်ႈၽွင်ႈတေၶိုၼ်းၶႂ်ႈမိူဝ်းတူၺ်းႁိူၼ်းယေးႁိုဝ်ႉ တေၶႂ်ႈမိူဝ်းဢဝ်ၶူဝ်းၶွင်ႁိုဝ်ႉၸိူဝ်းၼႆႉ ႁဝ်းၶႃႈတေၸွႆႈၸတ်းပၼ်။ ဝၼ်းလႂ် ၵူၼ်းဝၢၼ်ႈလႂ်တေမိူဝ်း ၸိူဝ်းၼႆႉ။ႁဝ်းၶႃႈတေၸွႆႈထတ်းပၼ်တူၺ်းပၼ်ၼၼ်ႉၼႃႇ ”- ဝႃႈၼႆ။
သင်ဝႃႈဢမ်ႇယွၼ်းဢၼုယၢတ်ႈ KSP သေမိူဝ်းၸိုင် တိုၼ်းဢမ်ႇပၼ်ဢဝ်ၶူဝ်းၶွင်သင်ဢွၵ်ႇဝၢၼ်ႈမႃး လႆႈႁူႉၼင်ႇၼႆ။
“သင်ဝႃႈၶႂ်ႈၶိုၼ်းမိူဝ်းယူႇတီႈဝၢၼ်ႈၶိုၼ်းၼႆၵႂႃႈၼေႃႈ။ မၼ်းၵေႃႈထုၵ်ႇလီမႃးလၢတ်ႈ မႃးထၢမ်ၶၢဝ်ႇငၢဝ်းတီႈၸုမ်းပလိၵ်ႈၵူၼ်းမိူင်းယူႇၼႃ။ တႃႇလွင်ႈႁူမ်ႇလူမ်ႈၵူၼ်းမိူင်းၵူၺ်းၼင်ႇၵဝ်ႇ မၼ်းလမ်ႇလွင်ႈတႄႉတႄႉဢေႃႈ” – ဢူးပၺႃးၶုၼ်ႇဢွင်ႇလၢတ်ႈထႅင်ႈၼင်ႇၼႆ။
တႃႇလႆႈဝႂ်ၶႂၢင်ႉတီႈပလိၵ်ႈၵူၼ်းမိူင်းယၢင်းလႅင်ၼၼ်ႉ တၵ်းလႆႈမႃးယွၼ်းတီႈဝဵင်းလွႆၶေႃ ၊ၾၢႆၸဝ်ႈၼႃႈတီႈ တေဢွၵ်ႇဝႂ်ၶႂၢင်ႉပၼ်သေၸင်ႇတေၸၢင်ႈမိူဝ်းဝႃႈၼႆ။
ၽွင်းၸုမ်းဢူၺ်းလီပွတ်းႁွင်ႇသၢမ်ၸုမ်းႁူမ်ႈၵၼ်သေပိုၼ်ၽၢဝ်ႇၽႅၼ်ၵၢၼ်သိုၵ်း 1027 ပိုတ်းယိုဝ်းသိုၵ်းမၢၼ်ႈတီႈ မိူင်းတႆးပွတ်းႁွင်ႇၼၼ်ႉ ၸုမ်းၽွမ်ႉႁူမ်ႈမိူင်းယၢင်းလႅင် ၵေႃႈႁူမ်ႈၵၼ်ပိုၼ်ၽၢဝ်ႇ ၽႅၼ်ၵၢၼ်သိုၵ်း 1111 သေပိုတ်းယိုဝ်းသိုၵ်းမၢၼ်ႈတီႈမိူင်းယၢင်းလႅင်။ ယၢမ်းလဵဝ် ပိုၼ်ႉတီႈၵမ်ႈၼမ် သိုၵ်းယၢင်းလႅင်ဢွင်ႇပေႉသိုၵ်းမၢၼ်ႈဝႆႉသေ ၽႅၼ်ၵၢၼ်ၽွင်းငမ်းဝႆႉႁင်းၽႂ်မၼ်း။ ပလိၵ်ႈမိူင်းယၢင်းလႅင်ၼၼ်ႉၵေႃႈပဵၼ်ပလိၵ်ႈၵူၼ်းမိူင်းၶဝ်ႈႁဵတ်းၵၢၼ်ဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ