ၵူၼ်းၵျွၵ်ႉမႄး ၽႅၼ်ၶေႃးတၢႆ တီႈၼႂ်းထိူၼ်ႇ ႁိမ်းမၢၼ်ႈၶႃႇ – မၢၼ်ႈဝဵင်း ၵေႃႉၼိုင်ႈ ယွၼ်ႉဝူၼ်ႉၼမ် ၵူၼ်းပိုၼ်ႉတီႈလၢတ်ႈ။
ဝၼ်းတီႈ 21/1/2024 ယူႇတီႈ ၵူၼ်းဝၢၼ်ႈ ၵႂႃႇၽၼ်းၽိုၼ်းသေ ထူပ်းႁၼ် ၸၢႆးဢၢႆႈလူး ၽႅၼ်ၶေႃးတၢႆ တီႈတူၼ်ႈမႆႉ တၢင်းၸဵင်ႇၸၢၼ်းဝၼ်းတူၵ်း မၢၼ်ႈၶႃႇ – မၢၼ်ႈဝဵင်း ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၼႆယဝ်ႉ။
ၵူၼ်းပိုၼ်ႉတီႈ ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၸၢႆး ႁၢႆတူဝ်ၵႂႃႇလႆႈ 2 ဝၼ်းယဝ်ႉ ထိုင်မႃး ဝၼ်းတီႈ 21 ၼႆႉ ၵူၼ်းဝၢၼ်ႈ ၵႂႃႇႁွၼ်းၽိုၼ်းသေ မႃၶဝ်သမ်ႉၵႂႃႇႁၼ်မႅၼ်ႈသေႁၢဝ်ႇ ၵမ်းၼႆႉ ၵူၼ်းႁွၼ်းၽိုၼ်းၸင်ႇၵႂႃႇတူၺ်းသေ ထူပ်းႁၼ် မၼ်းၸၢႆးၽႅၼ်ၶေႃးတၢႆဝႆႉယဝ်ႉ။ လႆႈငိၼ်းဝႃႈ ယွၼ်ႉမၼ်းၸၢႆးမၢၵ်ႇႁူဝ်ၸႂ် ဢမ်ႇပေႃးလီ ၵေႃႈပိူင်ၼိုင်ႈ။ ၼႃႈႁိူၼ်း ဢမ်ႇပေႃး တဵမ်ထူၼ်ႈလၢႆၸိူဝ်ႉလၢႆလွင်ႈၵေႃႈ ပိူင်ၼိုင်ႈ တေဝူၼ်ႉၼမ်ႉသေ ၽႅၼ်ၶေႃးတၢႆၵေႃႈပဵၼ်လႆႈ”- ဝႃႈၼႆ။
ဢိင်ၼိူဝ် လွင်ႈၵၢၼ်တၢႆၼႆႉသေ ယူႇတီႈ ၸုမ်းပရႁိတ ဝဵင်းၵျွၵ်ႉမႄး မႃးတေႃႉဢဝ်တူဝ်တၢႆ ၸၢႆးဢၢႆႈလူးၵႂႃႇယဝ်ႉ။ ၸၢႆးဢၢႆႈလူးၼႆႉ ပဵၼ်ၵူၼ်းမၢၼ်ႈဝဵင်း မီးၼႃးႁိူၼ်းဝႆႉ ယဝ်ႉၵေႃႈ မီးလုၵ်ႈဝႆႉထႅင်ႈ ဝႃႈၼႆ။
မိူဝ်ႈဝၼ်းတီႈ 25/1/2023 ၵၢင်ဝၼ်း 12 မူင်းၼၼ်ႉ လုင်းတဵင်းထေး ဢႃယု 59 ပီ ၵူၼ်းပွၵ်ႉ 8 ဝဵင်းၵျွၵ်ႉမႄး ၼၼ်ႉၵေႃႈ ဝူၼ်ႉၼမ်သေ ၽႅၼ်ၶေႃးတၢႆ ၵိုၵ်းႁိူၼ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ