ၶူဝ်ၼႂ်းၸႄႈဝဵင်းသီႇပေႃႉ ဢၼ်လူႉၵွႆယွၼ်ႉပၢင်တိုၵ်း ၼႂ်းၵႄႈသိုၵ်းမၢၼ်ႈလႄႈၸုမ်းသိုၵ်းဢူၺ်းလီ 3 ၸုမ်းၼၼ်ႉ ထိုင်မိူဝ်ႈလဵဝ်ပႆႇမီးၸုမ်းလႂ်ဢဝ်ပုၼ်ႈၽွၼ်းမႄးပၼ်ၶိုၼ်း ၵူၼ်းမိူင်းတိုၵ်ႉၵႂႃႇမႃးယၢပ်ႇၽိုတ်ႇ။
ၵူၼ်းၼႂ်းပိုၼ်ႉတီႈသီႇပေႃႉၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ထိုင်မိူဝ်ႈလဵဝ် ပႆႇမႄးၶိုၼ်း။ငိၼ်းဝႃႈ ၸုမ်းဢူၺ်းလီလႄႈ သိုၵ်းမၢၼ်ႈၶဝ် ပႆႇတူၵ်းလူင်းၵၼ်လႆ။ ပေႃးၶဝ်တူၵ်းလူင်းလႆႈၸႂ်ၵၼ်သေ တေမႄးၶိုၼ်းၼႆတႄႉ ၶွမ်ႊပၼီႊဢၼ်တေႁပ်ႉႁဵတ်းပၼ်ၵေႃႈ မီးဝႆႉယဝ်ႉၼႆဢေႃႈ။ပေႃးတူၺ်းငဝ်းလၢႆးမိူၼ်မိူဝ်ႈလဵဝ်တႄႉ လႅပ်ႈပႆႇငၢႆႈငၢႆႈၶႃႈ ” – ဝႃႈၼႆ။
ၽွင်းပၢင်တိုၵ်း 1027 ၼၼ်ႉၶူဝ်ၼႂ်းၸႄႈဝဵင်းသီႇပေႃႉ လူႉၵွႆႁၢၵ်းပင်း လၢႆလၢႆလင်။ ဝၼ်းတီႈ 12/11/2023 ၼၼ်ႉ ၶူဝ်ၼမ်ႉသိမ်ႇ(ကျင်သီတံတား) ဢၼ်မီးၼႂ်းၵႄႈၵျွၵ်ႉမႄး-သီႇပေႃႉ မၢၵ်ႇတူၵ်းသႂ်ႇသေႁၢၵ်းၵွႆ။ဝၼ်းတီႈ 1/12/2023 သမ်ႉ ၶူဝ်ၸႄႈဢႅၼ် ၼႂ်းၵႄႈသီႇပေႃႉ-လႃႈသဵဝ်ႈႁၢၵ်းပင်းထႅင်ႈ။ ထိုင်မိူဝ်ႈလဵဝ် ပႆႇမီးၸုမ်းလႂ်မႄးၵုမ်းလုမ်းလႃး။ ၵူၼ်းမိူင်းတီႈၸမ်တီႈၵႆ ဢမ်ႇၸၢင်ႈၵႂႃႇမႃးၵႃႉၶၢႆၸွမ်းသၢႆသဵၼ်ႈတၢင်းလူင်ပျီႇထွင်ႇၸူႉလႄႈ လႆႈၵႂႃႇတၢင်းလတ်း သဵင်ႈၶၢဝ်းယၢမ်းၸွမ်းၼမ်။
ၸဝ်ႈၵႃးသီႇပေႃႉၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈလဵဝ်ယၢပ်ႇၼႃႇ ။ မိူဝ်ႈဢွၼ်တၢင်း ပေႃးလုၵ်ႉလႃႈသဵဝ်ႈၵႂႃႇဝဵင်းလိူဝ်ႇၼႆ 4-5 ၸူဝ်ႈမူင်းၵူၺ်း။ မိူဝ်ႈလဵဝ်သမ်ႉ လႆႈပၼ်ႇလဵပ်ႈလတ်းၵႂႃႇတၢင်ႇတၢင်းလႄႈ ပေႃးပဵၼ်ၵူၼ်းပဵၼ် ႁိပ်ႈၼႅတ်ႈၶႂ်ႈၵႂႃႇယူတ်းယႃတူဝ်တႄႉယၢပ်ႇၼႃႇ။ ၶႂ်ႈတုၵ်းယွၼ်းထိုင် ၸုမ်းၵဵဝ်ႇၶွင်ႈ ႁႂ်ႈၸဵဝ်းမႄးပၼ် ၶိုၼ်း” – ဝႃႈၼႆ။
တႃႇႁႂ်ႈၵိုတ်းပၢင်တိုၵ်းလႆႈၼၼ်ႉ ၶႄႇယူႇၵၢင်သေ သိုၵ်းမၢၼ်ႈတင်းသိုၵ်းၸုမ်းဢူၺ်းလီ ဢုပ်ႇဢူဝ်းတူၵ်းလူင်းၵိုတ်းတိုၵ်းၵၼ်ၶိုၼ်း မိူဝ်ႈဝၼ်းတီႈ 12/1/2024 တီႈမိူင်းၶႄႇ ၼၼ်ႉသေတႃႉ သဵင်ၵွင်ႈသဵင်မၢၵ်ႇပွတ်းႁွင်ႇယင်းပႆႇယဵၼ်။
“ လႅၼ်လိၼ်တႆး-ၶႄႇ ၸိုင်ႈတႆးပွတ်းႁွင်ႇပဵၼ်ပၢင်တိုၵ်းႁၢဝ်ႈႁႅင်းလႄႈ တုမ်ႉတိူဝ်ႉၵၢၼ်ၵႃႉၶၢႆမိူင်းၼိုင်ႈ လႄႈမိူင်းၼိုင်ႈ။ယွၼ်ႉၼၼ် ယူႇၸုမ်းၵူၼ်းၵႃႉ(ကုန်သည်ကြီးများအသင်း)မိူင်းၶႄႇသေ ပၼ်ႁႅင်းဢီးလူင်ပွင်ၸိုင်ၶဝ် တိုၵ်းသူၼ်းႁႂ်ႈပၢင်တိုၵ်းၵိုတ်း ” ၼႆ ၵူၼ်းႁဵတ်းပၢႆးမၢၵ်ႈမီးပွတ်းႁွင်ႇၵေႃႉၼိုင်ႈလၢတ်ႈ။
