Saturday, May 25, 2024

ပၢင်တိုၵ်း တီႈဝဵင်းၵူတ်ႉၶၢႆ ၸမ်လိူၼ်ယဝ်ႉ သဵင်ၵွင်ႈပႆႇယဵၼ်   

Must read

ပၢင်တိုၵ်း တီႈဢိူင်ႇၼမ်ႉၽၵ်းၵႃ ၸႄႈဝဵင်းၵူတ်ႉၶၢႆ ၸမ်လိူၼ်ယဝ်ႉ ပႆႇၵိုတ်း တုမ်ႉတိူဝ်ႉ ႁိူၼ်းယေး လူႉၵွႆၼမ်လႄႈ ၵူၼ်းမိူင်း မၢတ်ႇၸဵပ်းလူႉတၢႆ ဢမ်ႇယွမ်း 10 ။

တႄႇဢဝ် ဝၼ်းတီႈ 28/12/2023 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် သိုၵ်းမၢၼ်ႈ တပ်ႉၶလယ 123 တင်း သိုၵ်းၶၢင် KIA ပဵၼ်ပၢင်တိုၵ်းၵၼ်မႃး ႁၢဝ်ႈႁႅင်း ၼႂ်းဢိူင်ႇၼမ်ႉၽၵ်းၵႃ ၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ၾၢႆႇသိုၵ်း မၢၼ်ႈ ၸႂ်ႉၶိူင်ႈမိၼ် ယိုဝ်းၸွႆႈၵူႈဝၼ်း။

- Subscription -

ၵူၼ်းပိုၼ်ႉတီႈ ဝဵင်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်းၶဝ်ၼႆႉ တႄႇပဵၼ်မႃး မိူဝ်ႈဝၼ်းတီႈ 28 လိူၼ်ပူၼ်ႉသေ တေႃႇထိုင် ဝၼ်းတီႈ 19 လိူၼ်ၼႆႉ ပႆႇယဝ်ႉ ႁိူၼ်းယေးၵူၼ်းမိူင်း ထုၵ်ႇၾႆးမႆႈ လူႉၵွႆၼမ်။ ၸိူဝ်းၵူၼ်း မၢတ်ႇၸဵပ်းလူႉတၢႆၵေႃႈ မီး။ ယွၼ်ႉသိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇၼၼ်ႉၶႃႈယဝ်ႉ”- ဝႃႈၼႆ။

ယွၼ်ႉပၢင်တိုၵ်းၼႆႉသေ ဝၼ်းတီႈ 16 ၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ တီႈဢိူင်ႇၼမ်ႉၽၵ်းၵႃၼႆႉ တိူဝ်ႉသႂ်ႇႁိူၼ်း ယေး ၵူၼ်းဝၢၼ်ႈ လူႉၵွႆၸွမ်းၼမ် ယဝ်ႉၵေႃႉ တိူဝ်ႉသႂ်ႇၵူၼ်းမိူင်း လူႉတၢႆ 2 ၵေႃႉ။

ယဝ်ႉၵေႃႈ ၵူၼ်းၼမ်ႉၽၵ်းၵႃၼႆႉၵူၺ်း ထုၵ်ႇယိုဝ်းတၢႆထႅင်ႈ 2 ၵေႃႉ ယွၼ်ႉပၢင်တိုၵ်းပဵၼ်ႁႅင်း ဢမ်ႇႁတ်းယူႇၼႂ်းႁိူၼ်းယေး လႄႈ ဢွၼ်ၵၼ်ပၢႆႈဢွၵ်ႇႁိူၼ်းသေ ထုၵ်ႇယိုဝ်းတၢႆ။

ယၢမ်းလဵဝ် ၵူၼ်းၼႂ်းဢိူင်ႇၼမ်ႉၽၵ်းၵႃ တႃႇ 90 % ၼႆႉ ဢွၼ်ၵၼ်ပၢႆႈၽေးသိုၵ်း ၵႂႃႇသွၼ်ႈဝႆႉ တၢင်းဝဵင်းၼမ်ႉၶမ်း – မူႇၸေႊ ၸိူဝ်းၼၼ်ႉဝႆႉ။

ၸွမ်းၼင်ႇ ၽႅၼ်ၵၢၼ်ယၼ်ႇသိုၵ်း 1027 ၸုမ်းဢူၺ်းလီ ပွတ်းႁွင်ႇ 3 ၸုမ်းၼၼ်ႉသေ ၼႂ်းၸႄႈဝဵင်းၵူတ်ႉၶၢႆၼႆႉ ၵူၼ်းမိူင်း လူႉတၢႆၸွမ်း 34 ၵေႃႉယဝ်ႉ ၼႂ်းၼၼ်ႉ ပႃးၼၢင်းယိင်း 10 ၵေႃႉလႄႈ လုၵ်ႈဢွၼ်ႇ 6 ၵေႃႉ။ ယဝ်ႉၵေႃႈ မၢတ်ႇၸဵပ်း ဢမ်ႇယွမ်း 50 ၵေႃႉ – လႆႈႁူႉၸွမ်းၼင်ႇ ၵူၼ်းပိုၼ်ႉတီႈလၢတ်ႈ။  

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း