Thursday, July 18, 2024

လုမ်းလဝၵ တီႈဝဵင်းၵေးသီး ၵဵပ်းငိုၼ်းၵူၼ်းမိူင်းၼမ်

Must read

ၵူၼ်းမိူင်းၵေးသီး ဢွၼ်ၵၼ်ၶၢင်းပွင်ႉ လွင်ႈလုမ်းလဝၵ ယွၼ်းငိုၼ်းၵူၼ်းမိူင်းၸိူဝ်းၵႂႃႇႁဵတ်းမၢႆၾၢင် (မၢတ်ႇပူင်ႇတိၼ်ႇ) ၼမ်ႁႅင်း။

ယၢမ်းလဵဝ် တီႈလုမ်းၵူတ်ႇထတ်းၵူၼ်းၶဝ်ႈမိူင်း (လဝၵ) ဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ယွၼ်း ငိုၼ်းၵူၼ်းမိူင်းၵႂႃႇႁဵတ်းမၢႆၾၢင် ၼိုင်ႈလႆႈပၼ် 30,000 ပျႃးထိုင် 50,000 ပျႃး ၵူႈပွၵ်ႈလႆႈပၼ် ၼိုင်ႈၵေႃႉ 5,000 ပျႃး ၵူၺ်း ဝႃႈၼႆ။

- Subscription -

ၵူၼ်းပိုၼ်ႉတီႈ ဝဵင်းၵေးသီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ ပေႃးထၢမ်ၶဝ်လူင်ႈၼႃႈဝႃႈ တေလႆႈသဵင်ႈၵႃႈႁိုဝ်ၼႆ ၶဝ်ဢမ်ႇလၢတ်ႈၼႄ။ ပေႃးၵႂႃႇႁဵတ်းတႄႉၸိုင် ၶဝ်ယွၼ်းၵႃႈၼၼ်ႉ ၵႃႈၼႆႉ ၼႆၵမ်းလဵဝ်ဢေႃႈ။ မိူဝ်ႈလဵဝ် ဝၢၼ်ႈမိူင်းၵေႃႈ ဢမ်ႇၼိမ်သဝ်းလႄႈ ၵူၼ်းမိူင်း ၵမ်ႈၼမ် ၶႂ်ႈပၢႆႈဢွၵ်ႇမိူဝ်းႁဵတ်းၵၢၼ်တၢင်ႇတီႈ။ ၵူၺ်းၵႃႈ မၢင်ၸိူဝ်း ပႆႇမီးမၢႆၾၢင်လႄႈ ဢွၼ်ၵၼ်ၵႂႃႇႁဵတ်း။ ၵူၼ်းလုမ်းၶဝ်သမ်ႉ ဢဝ်တိုဝ်ႉတၢင်းၼႆႉသေ ယွၼ်းငိုၼ်းၼမ်ဢေႃႈ” – ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈၽူႈတွႆႇႁွၵ်ႈ ၵပ်းသိုပ်ႇၸူးလုမ်းလဝၵ ၵေးသီးၵေႃႈ ၵပ်းသိုပ်ႇဢမ်ႇလႆႈ။

ယၢမ်းလဵဝ် ၸဵမ်ၵၢၼ်မိူင်း၊ ၵၢၼ်သိုၵ်း ၸိူဝ်းၼႆႉ ဢမ်ႇၼိမ်သဝ်းလႄႈ ႁဵတ်းႁႂ်ႈတုမ်ႉတိူဝ်ႉ ၵၢၼ်ပၢႆးမၢၵ်ႈမီး ႁႃၵိၼ်လဵင်ႉ တွင်ႉယၢပ်ႇၽိုတ်ႇၵူႈလွင်ႈ ဢမ်ႇထၢင်ႇႁၢင်ႈလႆႈႁဵတ်းႁႃၵိၼ်လႄႈ ၵူၼ်းမိူင်း ၵမ်ႈၼမ် ဢွၼ်ၵၼ်ပၢႆႈဢွၵ်ႇမိူင်း ၵႂႃႇႁႃႁဵတ်း ၵၢၼ် တၢင်ႇတီႇသီႇလႅၼ် မိူၼ်ၼင်ႇ တင်းမိူင်းထႆး – မိူင်းၶႄႇ ၸိူဝ်းၼၼ်ႉ။

သိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်းၸမ် 3 ပီၼႆႉ လုမ်းၵူတ်ႇထတ်းၵူၼ်းၶဝ်ႈမိူင်း (လဝၵ) မိူင်းႁူမ်ႈတုမ်မၢၼ်ႈ ၵဵပ်း ငိုၼ်း ၵူၼ်းမိူင်းၸိူဝ်းၵႂႃႇႁဵတ်း မၢႆၾၢင်ၼမ်ႁႅင်း ပဵၼ်လၢႆပုၼ်ႈ။

ၼွၵ်ႈလိူဝ်ၼၼ်ႉ ၵူၼ်းမိူင်းၶႄႇ ၸိူဝ်းမႃးႁဵတ်း မၢႆၾၢင် ဢမ်ႇၸွမ်းပိူင် ၸိူဝ်းၼၼ်ႉၵေႃႈ ၶဝ်ယွၼ်းငိုၼ်းၼပ်ႉႁူဝ်သိပ်း သႅၼ်ပျႃးသေ ၸင်ႇႁဵတ်းပၼ်ၵေႃႈမီး – ၽူႈႁူႉႁၼ်ၸွမ်းၵေႃႉၼိုင်ႈလၢတ်ႈ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း