ထဝ်ႈယိင်း ဢႃယု 60 ပၢႆ ၵေႃႉၼိုင်ႈ ၵႂႃႇတူၺ်းသူၼ်ၼႆသေ ၽႃႇၺႃးမၢၵ်ႇ တႅၵ်ႇသႂ်ႇသေ လႆႈတိူဝ်ႉမၢတ်ႇၸဵပ်းႁႅင်း ယၢမ်းလဵဝ် လႆႈသူင်ႇယူတ်းယႃတူဝ် ဝႆႉတီႈႁူင်းယႃ။
ပူၼ်ႉမႃး ဝၼ်းတီႈ 16/1/2024 ယၢမ်းၵၢင်ၼႂ် 8 မူင်း ပႃႈပိင်းသူၺ်ႇ ဢႃယု 60 ပၢႆ ၵူၼ်းဝၢၼ်ႈဝဵင်းၼၢင်း ၸႄႈဝဵင်းမူႇ ၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ၵႂႃႇတူၺ်းသူၼ်ၼႆသေ ၽႃႇၺႃးမၢၵ်ႇတႅၵ်ႇသႂ်ႇ တိူဝ်ႉၸွမ်းၼႃႈ လႆႈမၢတ်ႇၸဵပ်းႁၢဝ်ႈႁႅင်း ၼႆယဝ်ႉ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၼၢင်း ၵႂႃႇၵူၼ်ႇသူၼ်သေ ထုၵ်ႇမၢၵ်ႇတႅၵ်ႇသႂ်ႇၼႃႈ၊ ၸွမ်းၶႅၼ်၊ ၸွမ်းတူဝ် ၸိူဝ်းၼႆႉ လႆႈတိူဝ်ႉမၢတ်ႇၸဵပ်းႁၢဝ်ႈႁႅင်းၶႃႈဢေႃႈ။ ယၢမ်းလဵဝ် လႆႈသူင်ႇယူတ်းယႃ ဝႆႉတီႈႁူင်းယႃသူၺ်ႇမူႇၸေႊယဝ်ႉ”- ဝႃႈၼႆ။
မၢၵ်ႇဢၼ်တႅၵ်ႇတိူဝ်ႉသႂ်ႇ ပႃႈပိင်းသူၺ်ႇ ဢႃယု 60 ပၢႆၼႆႉ ပဵၼ်မၢၵ်ႇၽႂ် ၼမ်ႉမိုဝ်းၽႂ် မႃးႁၢင်ႈၵၢင်ဝႆႉတႄႉ ပႆႇႁူႉ ဝႃႈၼႆ။
ၼႂ်းလိူၼ်ၵျႅၼ်ႊၼိဝ်ႊရီႊ 2024 ၼႆႉ ၵူၼ်းမူႇၸေႊ ယဵပ်ႇၺႃးမၢၵ်ႇ ဢမ်ႇယွမ်း 3 ၵေႃႉယဝ်ႉ မိူဝ်ႈဝၼ်းတီႈ 14 ယၢမ်းၵၢင်ၼႂ် ၼၼ်ႉၵေႃႈ ၵူၼ်းမၢၼ်ႈမႂ်ႇ ၵေႃႉၼိုင်ႈ ယဵပ်ႇၺႃးမၢၵ်ႇ။ ထိုင်မႃး ယၢမ်းဝၢႆးဝၼ်းသမ်ႉ ၵူၼ်းပွၵ်ႉၸွၼ်တူဝ်ႇ ၵေႃႉ ၼိုင်ႈ ယဵပ်ႇၺႃး မၢၵ်ႇထႅင်ႈ။
မိူဝ်ႈဝၼ်းတီႈ 11/1/2024 ယၢမ်းဝၢႆးဝၼ်း 2 မူင်းၶိုင်ႈပၢႆ ၸၢႆးသၢမ်ၶွင်ႇ ဢႃယု 53 ပီ ၵူၼ်းပွၵ်ႉၶူးဝဵင်း ၼၼ်ႉၵေႃႈ ၽႃႇ ၺႃးမၢၵ်ႇ။ လိူဝ်ၼၼ်ႉ ဢွၼ်ႇၸၢႆး (ၸၢဝ်းၶႄႇ) ၵေႃႉၼိုင်ႈ ၵူၼ်းဝၢၼ်ႈဝဵင်းၼၢင်း ၵႂႃႇၽႃႇၺႃးမၢၵ်ႇ တႅၵ်ႇသႂ်ႇ ထိုင်တီႈလႆႈမၢတ်ႇ ၸဵပ်းႁႅင်း ယဝ်ႉၵေႃႈ ၵႂၢႆးတၢႆၸွမ်းထႅင်ႈ တူဝ်ၼိုင်ႈ။
