မိူဝ်ႈၼႆႉ ဝၼ်းတီႈ 18/1/2024 ယၢမ်းၵၢင်ဝၼ်းမွၵ်ႈ 12 မူင်း ၶူဝ်တႃႈလိူဝ်ႇ ၸတ်ႉတႅၵ်ႇ ဢၼ်ၵၢႆႇၸူးဝႆႉ ၼိူဝ်သဵၼ်ႈတၢင်း လူင် တႃႈၶီႈလဵၵ်း – ၵဵင်းတုင် တီႈဝဵင်းတႃႈလိူဝ်ႇ ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်းသေ ႁဵတ်းႁႂ်ႈ ၸဝ်ႈ ၵႃး ၵူၼ်း ဢွၵ်ႇတႃႈပႆတၢင်းလႄႈ ၵူၼ်းပိုၼ်ႉတီႈ ယၢပ်ႇၽိုတ်ႇလွင်ႈၵႂႃႇမႃး လိူဝ်ႁႅင်း ၼႆယဝ်ႉ။

ၸဝ်ႈၵႃး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၵႆႈၼႆႉ ပၼ်ၵႂႃႇဢိူဝ်ႈ တေႃႈလဵဝ် ပိၵ်ႉပႅတ်ႈယဝ်ႉ ၶဝ်ဝႃႈ ၶူဝ်ၵွႆတိုၵ်ႉမႄးယူႇ ၼႆဝႃႇ။ ၸဝ်ႈၼႃႈတီႈၶဝ် ဢမ်ႇပၼ်ၶၢမ်ႈၶူဝ် ၸိူဝ်းလုၵ်ႉတႃႈၶီႈလဵၵ်းမႃးၵေႃႈ ၶဝ်ၸႂ်ႉဝိၼ်ႇႁူဝ်ၵႃးပွၵ်ႈၶိုၼ်း၊ ဢၼ်လုၵ်ႉတၢင်း ၵဵင်းတုင်ၼၼ်ႉမႃးၵေႃႈ ၸႂ်ႉဝိၼ်ႇႁူဝ်ၵႃး ပွၵ်ႈမူတ်းၶႃႈ။ တီႈၶူဝ်ၼၼ်ႉ တၢင်းတႂ်ႈမၼ်း ၸတ်ႉတႅၵ်ႇဝႆႉ ႁဵတ်းၼၼ်ႉၶႃႈဢေႃႈ”- ဝႃႈ ၼႆ။

ဢိင်ၼိူဝ် လွင်ႈၶူဝ်တႃႈလိူဝ်ႇ ၸတ်ႉတႅၵ်ႇၼႆႉသေ တေႁၢမ်ႈရူတ်ႉၵႃးၵႂႃႇမႃး ၸူဝ်ႈၶၢဝ်း တႃႇၶၢဝ်းတၢင်း 2-3 ဝၼ်းၼႆႉ ၼႆယဝ်ႉ။

ၵူၼ်းပိုၼ်ႉတီႈ ဝဵင်းတႃႈလိူဝ်ႇ လၢတ်ႈတီႈၽူႈတွႆႇႁွၵ်ႈဝႃႈ – “လႆႈငိၼ်းဝႃႈ ၶူဝ်ၼႆႉ ၶဝ်တေပိၵ်ႉဝႆႉ ၸူဝ်ႈၶၢဝ်းမွၵ်ႈ 2 ဝၼ်းၼႆႉ တေဢမ်ႇပၼ် ရူတ်ႉၵႃးၵႂႃႇမႃး ယွၼ်ႉဝႃႈ ၵူဝ်ၶူဝ်ၼႆႉ ၵူၼ်ႇပင်းပႅတ်ႈ ႁဵတ်းၼၼ်ၶႃႈဢေႃႈ။ ၵူၺ်းၵႃႈ ပေႃးပဵၼ်ၵႃး ၸုမ်းပရႁိတတႄႉ ပၼ်ၵႂႃႇမႃးယူႇ”- ဝႃႈၼႆ။

ၶူဝ်တႃႈလိူဝ်ႇၼႆႉ မီးဝႆႉၼႂ်းၵႄႈ တႃႈၶီႈလဵၵ်း – တႃႈလိူဝ်ႇ ယဝ်ႉၵေႃႈ ပဵၼ်ၶူဝ်လမ်ႇလွင်း ၵၢၼ်ၵႃႉၶၢႆပၢႆးမၢၵ်ႈမီး လႅၼ်လိၼ်တႆး – ထႆး ဢၼ်ၼိုင်ႈ ၵေႃႈၸႂ်ႈ ဝႃႈၼႆ။