ဢွၼ်ႇယိင်းတႆး ဢႃယု 20 ပၢႆ ၵူၼ်းၼမ်ႉၶမ်း ၵေႃႉၼိုင်ႈ ထုၵ်ႇဢူၺ်းၵေႃႉ လွၵ်ႇလႅၼ်ၵႂႃႇ ႁဵတ်းၵၢၼ်ၶၢႆတူဝ် တၢင်းဝဵင်းမိူင်းလႃး ဝႃႈၼႆ။

တႄႇဢဝ် ဝၼ်းတီႈ 12/9/2023 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် မီးၶၢဝ်းတၢင်း 4 လိူၼ်ပၢႆၼႆႉ ၼၢင်းမူဝ်ၶမ်း ဢေး ဢႃယု 21 ပီ ၵူၼ်းမၢၼ်ႈသွၼ်း ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ထုၵ်ႇ ဢူၺ်းၵေႃႉ လွၵ်ႇလႅၼ်ၶၢႆၵႂႃႇ တၢင်းဝဵင်းမိူင်းလႃး ၼႆယဝ်ႉ။

ပႃႈၶမ်းလူႇ ၵေႃႉပဵၼ်မႄႈ ၼၢင်းမူဝ်ၶမ်းဢေး လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈတႄႇမၼ်း ႁဵတ်းၼႆ ဢူၺ်းၵေႃႉမၼ်း တၢင်ႉ ယၢၼ်း ႁွင်ႉၵႂႃႇႁဵတ်းၵၢၼ် တီႈမူႇၸေႊ။ ၵမ်းၼႆႉ ၶႃႈၵေႃႈ ထူဝ်းႁႃဢူၺ်းမၼ်းဝႃႈ ႁဵတ်းၵၢၼ် တီႈမူႇၸေႊၵူၺ်း ၼႆလႄႈ လုၵ်ႈ ယိင်းၶႃႈၸင်ႇၵႂႃႇၸွမ်း။ တီႈတႄႉမၼ်း ထုၵ်ႇဢူၺ်းၵေႃႉမၼ်းၼၢင်း လႅၼ်ၵႂႃႇၶၢႆ တၢင်းမိူင်းလႃးၼၼ်ႉ ဢေႃႈ။ ၼႂ်းၶၢဝ်းတၢင်း 3-4 လိူၼ်ၼႆႉ ၶႃႈၵပ်းၾူၼ်းၸူးၵေႃႈ ဢမ်ႇလႆႈ။ ပူၼ်ႉမႃး 2-3 ဝၼ်းၼႆႉ လုၵ်ႈၶႃႈ ၵပ်းၾူၼ်းမႃးၸူးၶိုၼ်းလႄႈ ၸင်ႇႁူႉလွင်ႈ တၢင်းမၼ်း ထုၵ်ႉဢူၺ်းၵေႃႉၶၢႆၵႂႃႇ တၢင်းမိူင်းလႃးပူၼ်ႉ”- ဝႃႈၼႆ။

ယၢမ်းလဵဝ် ၼၢင်းမူဝ်ၶမ်းဢေး ဢႃယု 21 ပီၼႆႉ ထုၵ်ႇပေႃႈလဵင်ႉၶႄႇ ၵုမ်းတူဝ်ဝႆႉ တီႈဝဵင်းမိူင်းလႃး သင်ဝႃႈ ၶႂ်ႈလႆႈတူဝ် ၶိုၼ်းၸိုင် တေလႆႈဢဝ်ငိုၼ်းၶႄႇ 2 မိုၼ်ႇယႂၼ်ႊ ၵႂႃႇထုတ်ႇတူဝ်ဢွၵ်ႇ ဝႃႈၼႆ။

“မၼ်းၼၢင်း ထုၵ်ႇၶၢႆၵႂႃႇတၢင်းမိူင်းလႃးသေ ပေႃႈလဵင်ႉၶႄႇ ၸႂ်ႉႁဵတ်းၵၢၼ်လၢၼ်ႉ KTV ။ ယဝ်ႉၵေႃႈ ၸႂ်ႉႁဵတ်း ၵၢၼ်မေႃ ၼူတ်ႈ။ ၵမ်ႉၼႆႉ ၸႂ်ႉႁဵတ်းၵၢၼ်ၶၢႆတူဝ် မၼ်းၼၢင်းဢမ်ႇယွမ်းႁဵတ်းလႄႈ ထုၵ်ႇပေႃႈလဵင်ႉၶႄႇၼၼ်ႉ ၵုမ်းၶင်တူဝ်ဝႆႉ သွင်ဝၼ်း လဵင်ႉၶဝ်ႈၼိုင်ႈတႃႇ။ ယဝ်ႉၵေႃႈ လၢတ်ႈဝႃႈ သင်ၶႂ်ႈလႆႈတူဝ်မၼ်းၼၢင်းၶိုၼ်းၼႆ တေလႆႈဢဝ်ငိုၼ်းၶႄႇ 2 မိုၼ်ႇယႂၼ်ႊ ၵႂႃႇ ထုတ်ႇတူဝ်ဢွၵ်ႇမႃး ၼႆႉဝႃႈ လုၵ်းယိင်းၶႃႈဝႃႈ။ ႁဝ်းၶႃႈ ဢမ်ႇမီးငိုၼ်းၼမ်တၢၼ်ႇၼၼ်ႉ တေႁဵတ်းႁိုဝ်ၵႂႃႇဢဝ် တူဝ်မၼ်းဢွၵ်ႇ မႃး တုၵ်းယွၼ်းထိုင် ႁႂ်ႈၽူႈမီးပုၼ်ႈၽွၼ်း ၼႂ်းပိုၼ်ႉတီႈၶဝ် ၸွႆႈႁႂ်ႈဢဝ်ဢွၵ်ႇမႃးပၼ်ၽွင်ႈၶႃႈ ႁဝ်းၶႃႈ ၵေႃႉပဵၼ်မႄႈ မႆႈၸႂ်ၶႃႈ ဢေႃႈ”-  ပႃႈၶမ်းလူႇ သိုပ်ႇလၢတ်ႈၼႄၼင်ႇၼႆ။

ၼၢင်းမူဝ်ၶမ်းဢေး ဢႃယု 21 ပီၼႆႉ ပဵၼ်လုၵ်ႈယိင်း လုင်းထုၼ်းၵျေႃႇလႄႈ ပႃႈၶမ်းလူႇ ယွၼ်ႉဝႃႈ ၵေႃႉပဵၼ် ပႃႈၶမ်းလူႇ ၼႆႉ ၶိုၼ်းသိုပ်ႇၵႂႃႇတႄႇၼႃးႁိူၼ်းၵိုတ်းၸွမ်း ဢေၸၢႆး တီႈမၢၼ်ႈသွၼ်း ဝဵင်းၼမ်ႉၶမ်းထႅင်ႈသေ ၼၢင်းမူဝ်ၶမ်း ဢေး ၸင်ႇၵႂႃႇယူႇ ၸွမ်းမႄႈ တီႈၼၼ်ႈ မီးၶၢဝ်းတၢင်း 5 ပီပၢႆယဝ်ႉ။

ၼၢင်းမူဝ်ၶမ်းဢေးၼႆႉ တႄႇၼႃႈႁိူၼ်း တီႈဝဵင်းၼမ်ႉၶမ်းၼႆႉသေ မီးဝႆႉ လုၵ်ႈယိင်းဢွၼ်ႇ ဢႃယု 3 ၶူပ်ႇပၢႆဝႆႉ ၵေႃႉၼိုင်ႈ။ ၵေႃႉ ပဵၼ်ၸဝ်ႈၽူဝ်လႄႈ မၼ်းၼၢင်းတႄႉ ၶၢတ်ႇၵၼ်ယဝ်ႉ။ လုၵ်ႈယိင်းဢွၼ်ႇၶဝ်တႄႉ ယူႇဝႆႉၸွမ်း ဢေႇၸၢႆးလႄႈ ပႃႈၶမ်းလူႇ လဵင်ႉလူလုမ်းလႃးဝႆႉ ဝႃႈၼႆ။