မိူဝ်ႈၼႆႉ ဝၼ်းတီႈ 18/1/2024 တႄႇဢဝ် ယၢမ်းၵၢင်ၼႂ် 5:45 မူင်း သိုၵ်းၶၢင် KIA တင်း ၸုမ်းၵႅတ်ႇၶႄၵူၼ်းမိူင်း PDF ႁူမ်ႈ ၵၼ် ၶဝ်ႈယိုဝ်းတပ်ႉပိဝ်ႇႁႃႇလႄႈ ႁူင်းပလိၵ်ႈမၢၼ်ႈ ၼႂ်းဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ ႁၢဝ်ႈႁႅင်း ၾၢႆႇသိုၵ်းမၢၼ်ႈ ၸႂ်ႉၶိူင်ႈ မိၼ်တိုၵ်း ယိုဝ်းၸွႆႈထႅင်ႈ။

ၵူၼ်းပိုၼ်ႉတီႈ ဝဵင်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် သိုၵ်း KIA, PDF ႁူမ်ႈၵၼ် ၶဝ်ႈလူမ်ႇယိုဝ်း တီႈတပ်ႉ သိုၵ်းမၢၼ်ႈ၊ ႁူင်းပလိၵ်ႈမၢၼ်ႈ ၼႂ်းဝဵင်းမိူင်းမိတ်ႈၼႆႉဢေႃႈ သိုၵ်း TNLA ပႃးဢမ်ႇပႃးတႄႉ ဢမ်ႇႁူႉၶႃႈ။ တေႃႇထိုင် ယၢမ်းလဵဝ် သဵင်ၵွင်ႈပႆႇယဵၼ် ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း Jetfighter 2 လမ်း မႃးပွႆႇမၢၵ်ႇယိုဝ်းၸွႆႈ။ လွင်ႈၵူၼ်းမၢတ်ႇၸဵပ်းလူႉ တၢႆလႄႈ လွင်ႈတုမ်ႉတိူဝ်ႉ ႁိူၼ်းယေး ၵူၼ်းမိူင်းလူႉၵွႆတႄႉ မီးၼမ်ဢေႃႈ။ ယၢမ်းလဵဝ် ႁဝ်းၶႃႈ တိုၵ်ႉဢွၼ်ၵၼ်ပၢႆႈဝႆႉလႄႈ ပႆႇလႆႈ ႁူႉ ၶေႃႈမုလ်းတႅတ်ႈတေႃးၶႃႈ”- ဝႃႈၼႆ။

ယွၼ်ႉၼိူဝ်ပၢင်တိုၵ်းၼႆႉသေ ၵူၼ်းမိူင်းမိတ်ႈ ၵမ်ႈၼမ် ဢွၼ်ၵၼ်ၶမ်ဝႆႉ ၼႂ်းပၢင်တိုၵ်းၵေႃႈမီး၊ မၢင်ၸိူဝ်း ပၢႆႈလူင်းၵႂႃႇတၢင်းဝဵင်း လိူဝ်ႇလႄႈ မိူင်းၵုတ်ႈ ၸိူဝ်းၼၼ်ႉၵေႃႈမီးၼမ် ၼႆယဝ်ႉ။

ပၢင်တိုၵ်း ဝၼ်းမိူဝ်ႈၼႆႉ ယူႇတီႈ သိုၵ်း KIA တင်း PDF ႁူမ်ႈၵၼ် ဢဵၼ်ႁႅင်းမွၵ်ႈ 500 ၵေႃႉ ဝႃႈၼႆ။

တႄႇဢဝ် လိူၼ်ၵျႅၼ်ႊၼိဝ်ႊရီႊ 2024 ၼႆႉမႃး သိုၵ်းၶၢင် KIA ၊ သိုၵ်း TNLA လႄႈ PDF ႁူမ်ႈၵၼ် လေႃႇတိုၵ်း တပ်ႉသိုၵ်း မၢၼ်ႈ မႃးႁၢဝ်ႈႁႅင်း ၼႂ်းၸႄႈဝဵင်းမိူင်းမိတ်ႈၼႆႉသေ ၵုမ်းလႆႈ တပ်ႉသိုၵ်းမၢၼ်ႈ တီႈဝၢၼ်ႈပၢတ်ႈ၊ ဝၢၼ်ႈၸၢင်ႈၵၢင်ႇလႄႈ ဝၢၼ်ႈ ၼမ်ႉၶွႆႈ ၸိူဝ်းၼႆႉ။