ဝၼ်းတီႈ 17/1/2024 ယၢမ်းၵၢင်ၼႂ် 7 မူင်းၶိုင်ႈၼႆႉ ၵူၼ်းၸၢႆးၵျွၵ်ႉမႄးၵေႃႉၼိုင်ႈ  ၺႃးၸုမ်းဢမ်ႇႁူႉ ၾၢႆႇယိုဝ်း မၢတ်ႇ ၸဵပ်းႁႅင်း ထိုင်တီႈလႆႈႁၢမ်သူင်ႇႁူင်းယႃ။

ၵူၼ်းၼႂ်းဝဵင်းၵျွၵ်ႉမႄးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈၼႆႉ မီးၵူၼ်းၺႃးယိုဝ်း ၵေႃႉၼိုင်ႈ ။ ၾၢႆႇတၢင်းလင်ၵျွင်းၽႃႉပွတ်း ၼၼ်ႉဢေႃႈ ။ မၼ်းၵႂႃႇမီးလိူင်ႈၸွမ်းပိူၼ်ႈၸိူင်ႉႁိုဝ်လႄႈ ထိုင်တီႈ ယိုဝ်း မၼ်းတႄႉ ဢမ်ႇႁူႉၸွမ်း ။ မၢၵ်ႇၵွင်ႈတိူဝ်ႉတီႈပုမ် သႆႈမၼ်းပေႃးလၼ်ဢွၵ်ႇမႃးဢေႃႈ ” – ဝႃႈၼႆ။

ၵူၼ်းၸၢႆးၵေႃႉဢၼ်ၺႃးယိုဝ်းၼႆႉ ၸိုဝ်ႈ ၸၢႆးၶုၼ်ႇၶဵဝ်ႇ ဢႃယု 27 ပီ ၺႃးယိုဝ်းတီႈၵွင်းလင် ပွင်ႇထိုင် ၼႃႈတွင်ႉ မိူဝ်ႈလဵဝ် လႆႈသူင်ႇယူတ်းယႃတူဝ်ဝႆႉ တီႈဝဵင်းလိူဝ်ႇ ဝႃႈၼႆ။

ၵူၼ်းၼႂ်းပိုၼ်ႉတီႈၵေႃႉၼိုင်ႈသိုပ်ႇလၢတ်ႈဝႃႈ – “ မၼ်း ပဵၼ်ၵူၼ်းႁႃၸဝ်ႉၵိၼ်ၶမ်ႈလႄႈ တေလႅပ်ႈ ယၢပ်ႇၸႂ် ယူႇ။ ပေႃးယူတ်းယႃလႆႈတဵမ်ထူၼ်ႈၵေႃႈ လႅပ်ႈတေလွတ်ႈ ပေႃးဢမ်ႇမီးငိုၼ်းယူတ်းယႃ တေႉ တေႉၸိုင် လႅပ်ႈတေလႆႈမႆႈၸႂ် ယူႇ ။ ပီႈၼွင်ႉမၼ်းၵေႃႈ မီးယူႇ ၵူၺ်းၼႃႇ ၶဝ်ၵေႃႈႁႃၸဝ်ႉ ၵိၼ်ၶမ်ႈ မိူၼ်ၵၼ် ၵူၺ်းလႄႈ ယၢပ်ႇၽိုတ်ႇလွင်ႈငိုၼ်းတွင်းဝႆႉ ” – ဝႃႈၼႆ။

မိူဝ်ႈလဵဝ် တီႈၵျွၵ်ႉမႄးၼႆႉ ၵႆႉမီးၸုမ်းဢမ်ႇႁူႉၾၢႆႇ ပိုတ်းယိုဝ်းလႄႈ တီႉၺွပ်းၵူၼ်းမိူင်း လူၺ်ႈဢမ်ႇႁူႉၸွမ်းလွင်ႈတၢင်းသင် ။ ယၢမ်းလဵဝ်ပဵၼ်ၽႂ်လူင်းမိုဝ်းယိုဝ်းၵေႃႈ ဢမ်ႇလႆႈႁူႉၸွမ်းလွင်ႈတၢင်း ၵူၼ်းပိုၼ်ႉတီႈလၢတ်ႈၼင်ႇၼႆ။

မိူဝ်ႈႁူဝ်လိူၼ်ၼႆႉၵေႃႈ ၽူႈၶဝ်ႈၸုမ်းၸွႆႈတူင်ႇဝူင်းၵူၼ်း ၼႂ်းဢိုမ်းတမၢဝ်း “ အိုမ်တမာဝ်း ” ၵေႃႉၼိုင်ႈ ၺႃးၸုမ်းဢမ်ႇ ႁူႉၾၢႆႇ တီႉၺွပ်းၵႂႃႇၵုမ်းၶင် ထိုင်မိူဝ်ႈလဵဝ် ပႆႇႁၼ်လွတ်ႈမႃး။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈဝႃႈ – “ ၼႂ်းၸုမ်း ဢိုမ်းတမၢဝ်းၼႆႉ ဢၼ်လႆႈငိၼ်းၸွမ်း ၺႃးၺွပ်း ဢမ်ႇယွမ်း 5 ၵေႃႉယဝ်ႉၼႆဢေႃႈ ။ ယွၼ်ႉသင်လႄႈ ၺွပ်းဢမ်ႇႁူႉ ။ ႁိုင်လၢႆဝၼ်းယဝ်ႉပႆႇလွတ်ႈမႃး ။ ၸုမ်းဢၼ်မႃးၺွပ်းၶဝ်ၵေႃႈ ၼုင်ႈၶူဝ်းၵူၼ်းႁိူၼ်းၵူၺ်း ဢမ်ႇႁူႉဝႃႈ ပဵၼ်ၸုမ်းလႂ် ” – ဝႃႈၼႆ။

မိူဝ်ႈဝၼ်းတီႈ 13/1/2024 ၼၼ်ႉၵေႃႈ ၵူၼ်းၸၢႆး ဢႃယု 30 ၵေႃႉၼိုင်ႈတီႈၵျွၵ်ႉမႄး ၺႃးမၢပ်ႇၼႄးဝႃႈ တေႃႉသူင်ႇပၼ် ၶူဝ်းၶွင်ၵိၼ်ယႅမ်ႉသိုၵ်းမၢၼ်ႈၼႆသေ ၸုမ်းသိုၵ်းဢူၺ်းလီပွတ်းႁွင်ႇ တီႉၺွပ်းၵုမ်းၶင်ဝႆႉ။

မိူဝ်ႈဝၼ်းတီႈ 16/1/2024 ၼၼ်ႉၵေႃႈ ဢွၵ်ႇၼွၵ်ႈၶၢဝ်းယၢမ်းဢၼ်ႁေႉႁၢမ်ႈဝႆႉၼႆသေ သိုၵ်းမၢၼ်ႈယိုဝ်းၵူၼ်းမိူင်းလႃႈသဵဝ်ႈလူႉတၢႆၵေႃႉၼိုင်ႈ။