မိူဝ်ႈၼႆႉ ဝၼ်းတီႈ 17/01/2024 ယၢမ်းဝၢႆးဝၼ်း 2 မူင်းပၢႆ ၵူၼ်းမဝ်းယႃႈ ဢႃယု 30 ပၢႆ ၵေႃႉၼိုင်ႈ ပႃးၽႃႉသၢင်ႈလူင်သေ ၶဝ်ႈၼႂ်းယေးငိုၼ်း ၵမ်ႇပေႃးၸ KBZ ဢၼ်ပိုတ်ႇဝႆႉ တီႈပွၵ်ႉ 1 ဝဵင်းပၢင်လူင် ၸႄႈဝဵင်းလွႆလႅမ် ၸိုင်ႈတႆးပွတ်း ၸၢၼ်း ဝႃႈတေ ထုၵ်ႈထွၼ်ငိုၼ်းၼႆသေ ႁဵတ်းႁႂ်ႈၵူၼ်းၼႂ်းယေးငိုၼ်းလႄႈ ၵူၼ်းႁိမ်းႁွမ်းတူၵ်းၸႂ်။
ၵူၼ်းယူႇႁိမ်းယေးငိုၼ်းၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “မီးၵူၼ်းၸၢႆးၵေႃႉၼိုင်ႈ မိူၼ်ၵူၼ်းမဝ်းယႃႈဝႆႉ၊ ယိပ်းၽႃႉသၢင်ႈ (မိတ်ႈလူင်) သေ ၶဝ်ႈၵႂႃႇတီႈယေးငိုၼ်း၊ ယွၼ်းထုၵ်ႈငိုၼ်း၊ ငိုၼ်းဢၼ်သူင်ႇၶဝ်ႈမႃးလူၺ်ႈသဵၼ်ႈၸိုဝ်ႈမၼ်းသမ်ႉ ဢမ်ႇမီး၊ မၼ်းၸၢႆးသမ်ႉ ၶႂ်ႈထုၵ်ႈထွၼ်ငိုၼ်းၼႆယူႇတိၵ်းတိၵ်းလႄႈ ထိုင်တီႈၾၢႆႇယေးငိုၼ်း လႆႈဢဝ်ၵူၼ်းပႂ်ႉႁူမ်ႇလူမ်ႈ မႃးလိုပ်ႈဢွၵ်ႇ ယေးငိုၼ်း။ ၵူၼ်းယိပ်းၽႃႉမိတ်ႈၼၼ်ႉသမ်ႉ လႅၼ်ႈပၢႆႈသေ ၵူၼ်းဢဝ်ႁူမ်ႇလူမ်ႈသမ်ႉလမ်းၸွမ်း ႁဵတ်းႁႂ်ႈၵူၼ်းၼႂ်းယေးငိုၼ်း တူၵ်းၸႂ်ၵူၺ်းဢမ်ႇၵႃး ၵူၼ်းႁိမ်းႁွမ်းၼၼ်ႉၵေႃႈ တူၵ်းၸႂ်ပႃးထႅင်ႈလႄႈ ဢဝ်ပဵၼ်ၶၢဝ်ႇလိုဝ်းဝႃႈ ၵူၼ်းၶဝ်ႈၸူၼ်ယေးငိုၼ်းၼႆ ၶႃႈဢေႃႈ”- ဝႃႈၼႆ။
ဝၢႆးပိူင်ပဵၼ်ၼႆႉယဝ်ႉ ပလိၵ်ႈမၢၼ်ႈ/ သိုၵ်းမၢၼ်ႈ မႃးဢဝ်လွင်ႈႁူမ်ႇလူမ်ႈ တီႈယေးငိုၼ်းၼၼ်ႉ ပေႃးတဵမ်ဝႆႉမူတ်း။ ယေးငိုၼ်း ၵေႃႈ ထုၵ်ႇပိတ်ႉဢိုတ်း ၵင်ႈႁူဝ်ႉလဵၵ်းဝႆႉ ဝႃႈၼႆ။
ၵူၼ်းပိုၼ်ႉတီႈ ထႅင်ႈၵေႃႉၼိုင်ႈ ၵေႃႈလၢတ်ႈဝႃႈ -“ဝၢႆးလင် ၺႃးၸူၼ်ႁၢၼ်ႉၶိူင်ႈၾႆးၾႃႉလႄႈ ႁၢၼ်ႉၶၢႆၶမ်း ယဝ်ႉၼႆႉ ၵူၼ်းဝဵင်း ပၢင်လူင် တူၵ်းၸႂ်ၵူဝ်ႁႄဝႆႉယူႇၵူႈၶၢဝ်းယၢမ်း။ ဢွၼ်ၵၼ်ၾၢင်ႉယူႇၾၢင်ႉၵိၼ်ဝႆႉယူႇတႃႇသေႇ။ ၵွပ်ႈၼႆလႄႈ ၶၢဝ်ႇလွင်ႈၸူၼ် လွင်ႈလၵ်ႉႁိမ်ၶူဝ်းၶွင်ၵၼ်ၼႆႉ သင်ဝႃႈ တေလၢတ်ႈၸိုင် ၶႂ်ႈႁႂ်ႈၾၢင်ႉသေလၢတ်ႈ၊ ပေႃးဢမ်ႇႁူႉတႅတ်ႈတေႃး ဢမ်ႇၶႂ်ႈႁႂ်ႈလၢတ်ႈ ၸၢင်ႈႁဵတ်းႁႂ်ႈၵူၼ်းမိူင်းတူၵ်းၸႂ်ၵူဝ်ႁႄ။ ၵူၼ်းထွမ်ႇၵေႃႈ ႁႂ်ႈၾၢင်ႉသေထွမ်ႇ၊ ယႃႇၵိုင်ႉၵၢင်ႉယုမ်ႇသေ ၵိုင်ႉၵၢင်ႉၵူဝ်ႁႅင်းပူၼ်ႉတီႈ” – ဝႃႈၼႆ။
ၸူဝ်ႈသိုၵ်းမၢၼ်ႈ ယိုတ်းဢႃႇၼႃႇ ဝၢၼ်ႈမိူင်းမႃးၼႆႉ ၽူႈလၵ်ႉၸၵ်ႉၶုတ်ႈလႄႈ ၵူၼ်းၸူၼ်လိူင်ႇၼမ် ၼႂ်းၸႄႈတွၼ်ႈလွႆလႅမ်။ ဢၼ်ၶဝ်ႈၸူၼ်ႁၢၼ်ႉၶၢႆၶိူင်ႈၾႆးၾႃႉ မိူဝ်ႈႁၢင်လိူၼ်တီႊသႅမ်ႊပိူဝ်ႊၼၼ်ႉ ထိုင်တီႈၵူၼ်းတၢႆ 4 ၵေႃႉ ပဵၼ်ငဝ်းလၢႆးႁၢႆႉႁႅင်းသုတ်း လႄႈ ႁဵတ်းႁႂ်ႈၵူၼ်းမိူင်းတူၵ်းၸႂ် တိုၼ်ႇႁႅင်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ