သိုၵ်းမၢၼ်ႈ ဢဝ်ႁႅင်းသိုၵ်းတင်း ၶိူင်ႈၵွင်ႈၵၢင်ႇ ဢွၵ်ႇၼႄၵူၼ်းမိူင်း ဝဵင်းလၢင်းၶိူဝ်း တႃႇၵႃးသိုၵ်း 2 လမ်း ဢဵၼ်ႁႅင်း ၵူၼ်း ဢမ်ႇယွမ်း 80 ၵေႃႉ။
ဝၼ်းတီႈ 13/1/2024 ယၢမ်းၵၢင်ၼႂ် သိုၵ်းမၢၼ်ႈတင်း ၸုမ်းပျီႇတူႉၸိတ်ႉ ဢဝ်ႁႅင်းသိုၵ်းတင်း ၶိူင်ႈၵွင်ႈၵၢင်ႇ ဢမျွၵ်ႈ ၸိူဝ်း ၼႆႉ တၢင်ႇၵႃးသေ ပၼ်ႇလဵပ်ႇဝဵင်းလၢင်းၶိူဝ်း ၼႂ်းၸိုင်ႈတႆးပွတ်းၸၢၼ်း တႃႇႁႂ်ႈၵူၼ်းမိူင်းႁၼ်ဝႃႈ ဢဵၼ်ႁႅင်းသိုၵ်းၶဝ် တိုၵ်ႉမီး ၼမ်ယူႇ ဝႃႈၼႆ။
ၵူၼ်းပိုၼ်ႉတီႈ ဝဵင်းလၢင်းၶိူဝ်း လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈတင်း ပျီႇတူႉၸိတ်ႉ S3 တူဝ် ဢဝ်တၢင်းၵႃးလူင်ၶဝ် 2 လမ်းသေ လၢၵ်ႈဢမျွၵ်ႈ ပၼ်ႇလဵပ်ႈဝဵင်းၸိူင်ႉၼႆၶႃႈဢေႃႈ။ တႃႇလမ်းၼိုင်ႈ လူင်းၵႂႃႇတၢင်းဝၢၼ်ႈႁၢတ်ႇ၊ တႃႇလမ်းၼိုင်ႈ ဢွၵ်ႇ ၵႂႃႇတၢင်းမိူင်းပၼ်ႇ ၶဝ်လဵပ်ႈဝဵင်းၸိူင်ႉၼၼ်သေ ပၼ်ႇမိူဝ်းၶိုၼ်း တီႈတပ်ႉဢမျွၵ်ႈၶဝ်ပၢင်ပဝ်းၼၼ်ႉ ၶႃႈဢေႃႈ”- ဝႃႈၼႆ။
ယၢမ်းလဵဝ် ၼႂ်းၸႄႈဝဵင်းလၢင်းၶိူဝ်းၼႆႉ မီးဝႆႉတပ်ႉသိုၵ်းမၢၼ်ႈ 5 တပ်ႉၵွင် မိူၼ်ၼင်ႇ – တပ်ႉၶလယ 99 ၊ ၶလယ 525 ၊ ၶလယ 578 ၊ တပ်ႉဢမျွၵ်ႈ ပၢင်ပဝ်းလႄႈ တပ်ႉပိဝ်ႇႁႃႇ ၸိူဝ်းၼႆႉ။
“ၶဝ်ၶႂ်ႈမႃးၼႄဢဵၼ်ႁႅင်းၶဝ်ၵူၺ်း ပွင်ႇဝႃႈ ၶဝ်တိုၵ်ႉမီးႁႅင်းသိုၵ်းယူႇ လွင်ႈဢၼ်ၶဝ်မႃးပၼ်ႇလဵပ်ႈဝဵင်းၸိူင်ႉၼႆၼႆႉ။ ယူႇတီႈႁဝ်းၶႃႈ ၵူၼ်းမိူင်းတႄႉ မၼ်းဢမ်ႇလၢၵ်ႇလၢႆးသင် ယွၼ်ႉဝႃႈ တၢင်းၼႆႉ ဢမ်ႇမီးလွင်ႈသုၵ်ႉယုင်ႈလၢၵ်ႇလၢႆးသင်ၶႃႈလူး ၵွပ်ႈၼႆလႄႈ ၵူၼ်းမိူင်းတႄႉ ဢမ်ႇတိုၼ်ႇသၢၼ်ႈသင် မိူဝ်ႈၶဝ်မႃးပၼ်ႇလဵပ်ႈဝဵင်းၸိူင်ႉၼႆၼႆႉ”- ၵူၼ်းပိုၼ်ႉတီႈ ဝဵင်းလၢင်းၶိူဝ်း သိုပ်ႇလၢတ်ႈၼႄၼင်ႇၼႆ။
ၼႂ်းၸႄႈဝဵင်းလၢင်းၶိူဝ်းၼႆႉ လိူဝ်သေ သိုၵ်းမၢၼ်ႈတူင်ႉၼိုင်ယဝ်ႉ မိူၼ်ၼင်ႇ ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း သိုၵ်းတႆး RCSS ၊ ပျီႇတူႉၸိတ်ႉ S3 တူဝ်၊ ပျီႇတူႉၸိတ်ႉပၢင်ႇလႅင်းလႄႈ ပျီႇတူႉၸိတ်ႉၵူၼ်းမိူင်း ဝၢၼ်ႈႁၢတ်ႇ ၸိူဝ်းၼႆႉထႅင်ႈ။
ဢိင်ၼိူဝ် လွင်ႈသိုၵ်းမၢၼ်ႈ ဢဝ်ႁႅင်းသိုၵ်း/ ႁႅင်းၶိူင်ႈၵွင်ႈၵၢင်ႇ ဢွၵ်ႇပၼ်ႇၼႄၵူၼ်းမိူင်းလၢင်းၶိူဝ်း ၸိူင်ႉၼႆ ႁဵတ်းႁႂ်ႈ ၵူၼ်းမိူင်း ၵမ်ႈၼမ် ထတ်းသၢင်ဝႃႈ ယွၼ်ႉပၢင်တိုၵ်းတၢင်းပွတ်းႁွင်ႇၼၼ်ႉသေ ၶဝ်ၵူဝ်ၵူၼ်းမိူင်း – ၸုမ်းယိပ်းၵွင်ႈၵၢင်ႇ ႁၼ်ထိုင်ဝႃႈ ၶဝ် ဢမ်ႇမီးႁႅင်းသိုၵ်းယဝ်ႉၼႆသေ ၸင်ႇဢွၵ်ႇမႃးပၼ်ႇၼႄ ႁႂ်ႈႁၼ်ဝႃႈ ၶဝ်တိုၵ်ႉမီးႁႅင်းသိုၵ်းတင်းၼမ်ယူႇ ၼႆၼၼ်ႉၵူၺ်း – ၵူၼ်းပိုၼ်ႉတီႈ ဝဵင်းလၢင်းၶိူဝ်းလၢတ်ႈ။
