သိုၵ်းမၢၼ်ႈ ဢွၼ်ၸတ်းပၢင်သၢၼ်ၶတ်း လွင်ႈသိုၵ်းၵဝ်ႈၵၢင်ႉ ယႃႉၵွင်းမူး

သိုၵ်းမၢၼ်ႈ တီႈမိူင်းသၢတ်ႇ ဢွၼ်ႁူဝ်ၸတ်းႁဵတ်းပၢင်သၢၼ်ၶတ်း လွင်ႈသိုၵ်းၵဝ်ႈၵၢင်ႉ ယႃႉၵွင်းမူး တီႈဝဵင်းလၢဝ်ႇၵၢႆး ၼၼ်ႉ။

ဝၼ်းတီႈ 13/1/2024 ယၢမ်းၵၢင်ၼႂ် 9 မူင်း သိုၵ်းမၢၼ်ႈ ဢဝ်လွင်ႈတၢင်း လွင်ႈသိုၵ်းၵဝ်ႈၵၢင်ႉ MNDAA ထုပ်ႉယႃႉၵွင်း မူး တီႈဝဵင်းလၢဝ်ႇၵၢႆးၼၼ်ႉသေ ၸင်ႇဢွၼ်ႁူဝ်ၵူၼ်းသိုၵ်းလႄႈ ႁွင်ႈၵၢၼ်လူင်ပွင်ၸိုင်ႈ ဢၼ်ယူႇတႂ်ႈၶဝ် ၵုမ်းၵမ် ၸိူဝ်း ၼၼ်ႉ တီႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇ ဢွၵ်ႇၼႄၵၢင်ၸႂ် သၢၼ်ၶတ်း ဢမ်ႇႁၼ်လီၸွမ်း လွင်ႈႁဵတ်းသၢင်ႈ သိုၵ်းၵဝ်ႈၵၢင်ႉ ဝႃႈၼႆ။

ၵူၼ်းပိုၼ်ႉတီႈ ဝဵင်းမိူင်းသၢတ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ၸႅၼ်ႇထႅဝ်ၵူၼ်းၶဝ် တီႈဝတ်ႉသပိင်ႇၺူႉ (သဗ္ဗညုဘုန်း တော်ကြီးကျောင်း) ၼၼ်ႉသေ လဵပ်ႈၵႂႃႇတၢင်းဝၢၼ်ႈၵျတႄႇ တေႃႇထိုင်တၢင်းၽႄၵၢတ်ႇလူင်လႄႈ ႁူင်းႁဵၼ်း ၸၼ်ႉသုင် ပုၼ်ႉဢေႃႈ။ တူၺ်းတႄႉ ပဵၼ်ၵူၼ်းႁွင်ႈၵၢၼ်လူင်ပွင်ၸိုင်ႈ ဢၼ်ယူႇတႂ်ႈသိုၵ်းမၢၼ်ႈ ၵုမ်းၵမ်။ ဢၼ် ဢွၼ်ၸတ်းၵေႃႈ ပဵၼ်သိုၵ်းမၢၼ်ႈၵမ်းလဵဝ်ယဝ်ႉ”- ဝႃႈၼႆ။

ၵူၼ်းၸိူဝ်းၶဝ်ႈႁူမ်ႈ တီႈၼႂ်းပၢင်သၢၼ်ၶတ်း တီႈဝဵင်းမိူင်းသၢတ်ႇၼႆႉ ဢွၼ်ၵၼ်ႁွင်ႉသႅၼ်ႇဝႃႈ – တႃႇပႂ်ႉပႃး ၵႅတ်ႇၶႄ ႁႄႉၵင်ႈပၼ်သႃႇသၼႃႇလႄႈ ၸိုင်ႈမိူင်းၼႆႉ ပဵၼ်ပုၼ်ႈၽွၼ်းၵူၼ်းမိူင်း ၵူႈၵေႃႉယဝ်ႉ။ ၵူၼ်းၸိူဝ်းပဵၼ်ၸၢဝ်းပုတ်ႉထ ၼႂ်း မိူင်းႁူမ်ႈတုမ်မၢၼ်ႈ ထုၵ်ႇလီလႆႈလုၵ်ႉၼႄၵၢင်ၸႂ် သၢၼ်ၶတ်းၵူၼ်းယႃႉၵဝ်းသႃႇသၼႃႇ။ ပေႃးလူဝ်ႇ လွင်ႈ ၵမ်ႉထႅမ်ၸိုင်  ၾၢႆႇတပ်ႉမတေႃႇ တေၽွမ်ႉၸွႆႈယူႇတႃႇသေႇ – ဝႃႈၼႆ။

ၼႂ်းဝၼ်းတီႈ 13 ၼႆႉ ယူႇတီႈ ၾၢႆႇသိုၵ်းမၢၼ်ႈ ဢွၼ်ႁူဝ်ၸတ်းႁဵတ်း ပၢင်ၼႄၵၢင်ၸႂ်သၢၼ်ၶတ်းၼႆႉ ဢမ်ႇၸႂ်ႈတီႈဝဵင်း မိူင်းသၢတ်ႇ တီႈလဵဝ်ၵူၺ်း ၼႂ်းမိူင်းတႆး လၢႆၸႄႈဝဵင်းၵေႃႈ ၶဝ်ဢွၼ်ၸတ်းႁဵတ်း မိူၼ်ၼင်ႇ – ဝဵင်းမိူင်းၽျၢၵ်ႈ ၸိူဝ်းၼႆႉ။ ယဝ်ႉၵေႃႈ ဝဵင်းလူင်တူၼ်ႈတီး ၸိူဝ်းၼၼ်ႉထႅင်ႈ။

ဢိင်ၼိူဝ် လွင်ႈထုပ်ႉယႃႉၵွင်းမူး တီႈဝဵင်းလၢဝ်ႇၵၢႆးၼႆႉသေ မီးတၢင်ႇမူႇ/ ၸုမ်း ဢဝ်တိုဝ်ႉတၢင်းလီ သႄႇသူၼ်းႁႂ်ႈၸၢဝ်းၶိူဝ်း၊ ၽႃႇသႃႇ၊ သႃႇ သၼႃႇ တႅၵ်ႇယႅၵ်ႈၵၼ်ထႅင်ႈလႄႈ ယူႇတီႈ တပ်ႉသိုၵ်းၵဝ်ႈၵၢင်ႉ MNDAA ၸင်ႇဢွၵ်ႇလိၵ်ႈ ပိုၼ်ၽၢဝ်ႇ မိူဝ်ႈဝၼ်းတီႈ 9/1/2024 ၼၼ်ႉဝႃႈ တေပၼ်တူတ်ႈတၢမ်ႇ ၵူၼ်းသိုၵ်းၶဝ် ဢၼ်ထုပ်ႉယႃႉၵွင်းမူးၼၼ်ႉ ဝႃႈၼႆ။