ၽူႈၸၢႆး ဢႃယု 50 ပၢႆ ၵေႃႉၼိုင်ႈ ပၢႆႈမူၵ်းၼႂ်းလုၵ်းပဵမ်ႇသေ ဢဝ်လူႉတၢႆပႅတ်ႈ ယွၼ်ႉၶၢတ်ႇလူမ်းထူၺ်ႈၸႂ် (ဢွၼ်ႊသီႊ ၵျိၼ်ႊ)။
ဝၼ်းတီႈ 10/1/2024 ယၢမ်းၵၢင်ၶမ်ႈ ၽူႈၸၢႆး ဢႃယု 56 ပီ ၵေႃႉၼိုင်ႈ ၵူၼ်းဝၢၼ်ႈႁူဝ်ပိုၵ်ႉ ၸႄႈဝဵင်းလႃႈသဵဝ်ႈ ၸိုင်ႈ တႆးပွတ်းႁွင်ႇ ပၢႆႈမူၵ်းၼႂ်းလုၵ်းပဵမ်ႇ (လုၵ်းလိၼ်) ယွၼ်ႉၵူဝ်မၢၵ်ႇလူင်တူၵ်းသႂ်ႇၼႆသေ ဢဝ်လူႉတၢႆၵႂႃႇ လူၺ်ႈၶၢတ်ႇလူမ်း ထူၺ်ႈၸႂ် ၼႆယဝ်ႉ။
ၵူၼ်းပိုၼ်ႉတီႈ ဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၸၢႆး ၶဝ်ႈၵႂႃႇယူႇၼႂ်းလုၵ်းလိၼ် ၸဵမ်မိူဝ်ႈၵၢင် ၶမ်ႈၼၼ်ႉၶႃႈ။ ထိုင်မႃးမိူင်းလႅင်းၵေႃႈ ဢမ်ႇႁၼ်ဢွၵ်ႇမႃးလႄႈ ၸင်ႇၶဝ်ႈၵႂႃႇတူၺ်းသေ လႆႈႁၼ်မၼ်းၸၢႆးပေႃးၼွၼ်း ၶႅင်ဝႆႉယဝ်ႉ။ မၼ်းၸၢႆးသမ်ႉ ၸူးၾႆးဢွမ်ႇၼႂ်းလုၵ်းလိၼ်လႄႈ ႁဵတ်းႁႂ်ႈၶၢတ်ႇလူမ်းထူၺ်ႈၸႂ်။ ထၢင်ႇတႄႉ မၼ်းၸၢႆး လႅပ်ႈ တၢႆ ၸဵမ်မိူဝ်ႈၵၢင်ၶိုၼ်းၼၼ်ႉယဝ်ႉ”- ဝႃႈၼႆ။
မိူၼ်ၼႆ ၼင်ႇၵဝ်ႇ မိူဝ်ႈဝၼ်းတီႈ 1/1/2024 ထဝ်ႈယိင်း ဢႃယု 60 ပီ ၵေႃႉၼိုင်ႈ တီႈဢိူင်ႇၼမ်ႉၽၵ်းၵႃ ၸႄႈဝဵင်းၵူတ်ႉၶၢႆ ၼၼ်ႉၵေႃႈ ၸူးၾႆးဢွမ်ႇၼႂ်းလုၵ်းပဵမ်ႇသေ ထိုင်တီႈၶၢတ်ႇလူမ်းထူၺ်ႈၸႂ် လူႉတၢႆၵႂႃႇ ဝႃႈၼႆ။
ယွၼ်ႉၶၢဝ်ႇလိုဝ်းဢွၵ်ႇမႃးဝႃႈ ၸုမ်းဢူၺ်းလီ 3 ၸုမ်း တေၶဝ်ႈလေႃႇတိုၵ်း တပ်ႉသိုၵ်းမၢၼ်ႈ ၼႂ်းဝဵင်းလႃႈသဵဝ်ႈ ႁၢဝ်ႈႁႅင်း ၼႆလႄႈ ႁဵတ်းႁႂ်ႈၵူၼ်းမိူင်း ဢွၼ်ၵၼ် ၽူင်ႉပၢႆႈ ဢွၵ်ႇဝဵင်းတင်းၼမ်လၢႆ။
“ဢၼ်ပၢႆႈဢွၵ်ႇဝဵင်းၼႆႉ ၼမ်ဝႃႈၼမ်ၼၼ်ႉယဝ်ႉ ၵမ်ႈၼမ် ပဵၼ်ၸၢဝ်းၶႄႇ။ ၶဝ်ၵူဝ်သိုၵ်းၵဝ်ႈၵၢင်ႉ ၶဝ်ႈဝဵင်းမႃးတီႉၺွပ်း ဢဝ် ၵႂႃႇႁဵတ်းသိုၵ်းၼႆၶႃႈဢေႃႈ။ ႁဝ်းၸိူဝ်းၼႆႉၵေႃႈ ႁၢင်ႈႁႅၼ်းဝႆႉ တႃႇပၢႆႈမိူၼ်ၵၼ်ယဝ်ႉၶႃႈဢေႃႈ”- ၵူၼ်းပိုၼ်ႉတီႈ ဝဵင်းလႃႈ သဵဝ်ႈ သိုပ်ႇလၢတ်ႈၼႄၼင်ႇၼႆ။
တႄႇဢဝ် ႁူဝ်ပီ 2024 ၼႆႉမႃး ၵူၼ်းဝဵင်းၼမ်ႉၶမ်း ၸိူဝ်းပၢႆႈၽေးသိုၵ်း ၵႂႃႇသွၼ်ႈဝႆႉတၢင်းမူႇၸေႊလႄႈတၢင်း ထုင်ႉလွႆႁူဝ် သိူဝ် ၸိူဝ်းၼၼ်ႉ ဢွၼ်ၵၼ်ပွၵ်ႈၶိုၼ်းၸႂ်းႁိူၼ်းယေး ၽႂ်မၼ်း ၵမ်ႈၽွင်ႈ မၢင်ၸိူဝ်း ၼွၼ်းဢမ်ႇလပ်း ၽွင်းၵၢင်ၶမ်ႈၵၢင် ၶိုၼ်း ယွၼ်ႉၵူဝ်သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ