ၶူဝ်ၼႃးၵွၼ်း ဢၼ်ၵၢႆႇၸူးဝႆႉ ၼႂ်းၵႄႈၼမ်ႉတူႈ – လႃႈသဵဝ်ႈၼႆႉ ထုၵ်ႇမၢၵ်ႇလူင်ပွႆႇသႂ်ႇ လူႉၵွႆႁၵ်းပႅတ်ႈသေ ႁဵတ်းႁႂ်ႈ ၵူၼ်းမိူင်းၵႂႃႇမႃး ယၢပ်ႇၽိုတ်ႇႁႅင်း။

ဝၼ်းတီႈ 11/1/2024 ယၢမ်းၵၢင်ၶမ်ႈ မီးၸုမ်းယိပ်းၵွင်ႈၵၢင်ႇ ဢမ်ႇႁူႉၾၢႆႇ ပွႆႇမၢၵ်ႇသႂ်ႇတီႈၶူဝ်ဝၢၼ်ႈၼႃးၵွၼ်း ဢၼ်ၵၢႆႇ ၸူးဝႆႉ ၼႂ်းၵႄႈလႃႈသဵဝ်ႈ – ၼမ်ႉတူႈ ၼႂ်းၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ယၢမ်းလဵဝ် ၶူဝ်ၼႆႉ လူႉၵွႆႁၵ်းပႅတ်ႈယဝ်ႉ ဝႃႈၼႆ။

ၸဝ်ႈၵႃး လႃႈသဵဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ၶူဝ်တႄႉ ႁၵ်းၵႂႃႇယဝ်ႉ။ ဢမ်ႇၸၢင်ႈၶၢမ်ႈၵႂႃႇမႃးယဝ်ႉ။ တေၶဝ်ႈ ၵႂႃႇလႃႈသဵဝ်ႈၵေႃႈ ဢမ်ႇၸၢင်ႈ။ တၢင်းမၢင်သဵၼ်ႈမီးယူႇသေတႃႉၵေႃႈ ၵူၺ်းၵႃႈ သဵၼ်ႈတၢင်းဢမ်ႇလီလႄႈ တေၵႂႃႇမႃး ယၢပ်ႇ”- ဝႃႈၼႆ။

ၶူဝ်ၼႃးၵွၼ်းၼႆႉ တေယၢၼ်ၵႆဝဵင်းလႃႈသဵဝ်ႈ 6 လၵ်း ယဝ်ႉၵေႃႈ ပဵၼ်ၶူဝ်ဢၼ် ၵူၼ်းမိူင်းလႆႈၸႂ်ယႂ်ႇ။ ယၢမ်းလဵဝ် ၶူဝ် ၼႂ်း ၸႄႈဝဵင်းလႃႈသဵဝ်ႈ ဢၼ်ထုၵ်ႇလူႉၵွႆဝႆႉသမ်ႉ မိူၼ်ၼင်ႇ ၶူဝ်ဢီႇၼၢႆး၊ ၶူဝ်ၸႄႈဢႅၼ် ၸိူဝ်းၼႆႉ။

မိူၼ်ၼႆၼင်ႇၵဝ်ႇ မိူဝ်ႈဝၼ်းတီႈ 28/12/2023 ၼၼ်ႉၵေႃႈ ၶူဝ်ဢၼ်မီးၼႂ်းၵႄႈၼမ်ႉတူႈ – သီႇပေႃႉၼႆႉ ထုၵ်ႇမၢၵ်ႇပွႆႇယႃႉၵွႆၵူၼ်ႇပင်း လင်ၼိုင်ႈ။

ပေႃးဢဝ်ၸွမ်းပိူင် ၵျီႊၼီႊပိူဝ်ႊ ၶွၼ်ႊပႅၼ်ႊသျိၼ်ႊဝႃႈၸိုင် ဢမ်ႇဝႃႈသိုၵ်းၸုမ်းလႂ် တၵ်းတေဢမ်ႇလႆႈမီး ပၢင်တိုၵ်း သိုၵ်းသိူဝ် ၸွမ်းၼႂ်းမူႇဝၢၼ်ႈ ဢွင်ႈတီႈၵူၼ်းမိူင်းယူႇသဝ်း၊ ဢွင်ႈတီႈၶူဝ်းၶွင်ၵိုၵ်းပိုၼ်း၊ ဢွင်ႈတီႈသႃႇသၼႃႇ ၸိူဝ်းၼႆႉ ယဝ်ႉၵေႃႈ တေလႆႈဝႆႉ ၵူၼ်းမိူင်းပဵၼ်လွင်ႈယႂ်ႇ ဝႃႈၼႆ။