Thursday, June 20, 2024

ယေးငိုၼ်း (ပၢၼ်ႇ) တီႈဝဵင်းလႃႈသဵဝ်ႈ ပိၵ်ႉႁပ်ႉဢူၼ်းငိုၼ်း

Must read

ယေးငိုၼ်း ၶွင် KBZ Bank လႄႈ ME Bank ၼႂ်းဝဵင်းလႃႈသဵဝ်ႈ ဢမ်ႇႁပ်ႉဢူၼ်းငိုၼ်း ယွၼ်ႉငဝ်းလၢႆးဝၢၼ်ႈမိူင်း ဢမ်ႇ ၼိမ်သဝ်း ဝႃႈၼႆ။

ဝၼ်းတီႈ 10/1/2024 ယေးငိုၼ်း ၶွင်မိူင်းမၢၼ်ႈ (မြန်မာ့စီးပွားရေးဘဏ် – ME Bank) တင်း ၵမ်ႇပေႃးၸ (ကမ္ဘောဇဘဏ် – KBZ Bank) တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ထုၵ်ႇပိၵ်ႉႁပ်ႉ – ဢူၼ်းငိုၼ်း ၼႆယဝ်ႉ။

- Subscription -

ၼၢင်းယိင်း ဢႃယု 40 ပၢႆ ၵူၼ်းဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၶႃႈတေဢၢင်ႈၵႂႃႇဢူၼ်းငိုၼ်း၊  ၵူၼ်းပႂ်ႉပၢၼ်ႇၶဝ်သမ်ႉ လၢတ်ႈဝႃႈ ယၢမ်းလဵဝ် ၵိုတ်းယင်ႉ ၵၢၼ်ႁပ်ႉဢူၼ်းငိုၼ်းဝႆႉ။ ယွၼ်ႉသင်လႄႈ ၵိုတ်းယင်ႉဝႆႉတႄႉ ၶဝ်ဢမ်ႇႁူႉလီလီ ၶဝ်ဝႃႈ ယွၼ်ႉဝၢၼ်ႈမိူင်းဢမ်ႇၼိမ်သဝ်း ၼႆၼၼ်ႉၵူၺ်း။ ဢၼ်ႁဝ်းၶႃႈ လၢမ်းႁူႉတႄႉ ၶဝ်ဢမ်ႇၶႂ်ႈဝႆႉငိုၼ်း ၼႂ်းပၢၼ်ႇၼမ်”- ဝႃႈၼႆ။

ယေးငိုၼ်း ၸိူဝ်းဢၼ်ပိုတ်ႇ ၼႂ်းမိူင်းတႆးပွတ်းႁွင်ႇၼႆႉ ၵမ်ႈၼမ် တေဢမ်ႇႁပ်ႉဢူၼ်းငိုၼ်းၵႂႃႇတၢင်းလႂ် ၵူၺ်းၵႃႈ ပေႃး ၶႂ်ႈထွၼ်ငိုၼ်းဢွၵ်ႇသမ်ႉ ထွၼ်လႆႈယူႇ ဝႃႈၼႆ။

ၵူၼ်းပိုၼ်ႉတီႈ ဝဵင်းလႃႈသဵဝ်ႈ ၽူႈၸၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပေႃးၶႂ်ႈထွၼ်ငိုၼ်းတႄႉ ၶဝ်ပၼ်ထွၼ် ဢွၵ်ႇယူႇ။ ၵူၺ်းၼႃႇ ပေႃးၶႂ်ႈဢူၼ်းငိုၼ်း သူင်ႇပၼ်တၢင်ႇတီႈတၢင်ႇလႅၼ်တႄႉ ၶဝ်ဢမ်ႇႁပ်ႉ။ မိူဝ်ႈဢွၼ်တၢင်းၼႆႉ ပေႃး ၶဝ်ႁပ်ႉဢူၼ်းငိုၼ်းၸိုင် ၶဝ်ႁပ်ႉဢူၼ်းပၼ်လႆႈ တေႃႇဝၼ်း 10 ၵေႃႉ၊ ၼိုင်ႈၵေႃႉလႂ် 10 သႅၼ်ပျႃး မွၵ်ႈၼႆႉၵူၺ်း ”- ဝႃႈၼႆ။

တီႈဝဵင်းမူႇၸေႊၵေႃႈ မိူၼ်ၵၼ် လိူဝ်သေ ယေးငိုၼ်းမိူင်းမၢၼ်ႈ (မြန်မာ့စီးပွားရေးဘဏ်)တင်း ၵမ်ႇပေႃးၸ (ကမ္ဘောဇဘဏ်) ယဝ်ႉ ဢမ်ႇမီးယေးငိုၼ်းဢၼ်လႂ်ပိုတ်ႇ မိူၼ်ၼင်ႇ ယေးငိုၼ်း CB Bank ၵေႃႈ ထုၵ်ႇပိၵ်ႉဢိုတ်းဝႆႉ ၸူဝ်ႈၶၢဝ်း။

“ယၢမ်းလဵဝ် ၵူၼ်းၸိူဝ်းယူႇ ၼႂ်းမိူင်းတႆး ဢမ်ႇဢူၼ်းငိုၼ်း ၵႂႃႇတၢင်းမိူင်းတႆးပွတ်းႁွင်ႇလႆႈ ပေႃးတေဢူၼ်းၸိုင် ထုၵ်ႇ ၸႅတ်ႈထၢမ်တႂ်ႈတႂ်ႈၼိူဝ်ၼိူဝ်ႁၢဝ်ႈႁႅင်းလႄႈ တေလႆႈလၢတ်ႈပၼ် ႁူဝ်လၢႆးယွႆႈယႅမ်းမၼ်း မိူၼ်ၼင်ႇ – ၵူၼ်းႁပ်ႉငိုၼ်း၊ ၵူၼ်းဢူၼ်းငိုၼ်း ၸိူဝ်းၼႆႉ”- ၽူႈမီးတူဝ်ထူပ်း ၵေႃႉၼိုင်ႈလၢတ်ႈၼႄၼင်ႇၼႆ။

တႄႇဢဝ်ႁၢင်ပီ 2023 ၼၼ်ႉမႃး ယွၼ်ႉပၢင်တိုၵ်း သိုၵ်းမၢၼ်ႈတင်း ၸုမ်းဢူၺ်းလီပွတ်းႁွင်ႇ 3 ၸုမ်း ပိုတ်းယိုဝ်းၵၼ် မႃး ၼႂ်းၸိုင်ႈတႆးပွတ်းႁွင်ႇ ႁၢဝ်ႈႁႅင်းသေ ႁဵတ်းႁႂ်ႈသဵၼ်ႈတႃႈသၢႆတၢင်းလူႉၵွႆ/ ၶၢတ်ႇ။ ယဝ်ႉၵေႃႈ လႅင်းၾူၼ်း၊ လႅင်း ဢိၼ်ႊထိူဝ်ႊၼႅတ်ႊ ၸိူဝ်းၼႆႉၵေႃႈ ထုၵ်ႇပိၵ်ႇဢိုတ်းထႅင်ႈလႄႈ ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇၽိုတ်ႇ ဢမ်ႇၸၢင်ႈၵပ်းသိုပ်ႇ ႁႃၵၼ်လႆႈ။ ၵွပ်ႈၼႆလႄႈ ႁဵတ်းႁႂ်ႈယေးငိုၼ်း ၸိူဝ်းၼႆႉ ဢမ်ႇထၢင်ႇႁၢင်ႈပၼ်ႇၵၢၼ် လႆႈလီပႃး ၼႆယဝ်ႉ။

ပူၼ်ႉမႃး မိူဝ်ႈဝၼ်းတီႈ 6/11/2023 ယၢမ်းႁူဝ်ၶမ်ႈ ၼၼ်ႉၵေႃႈ မီးၸုမ်းဢမ်ႇႁူႉၾၢႆႇ မႃးပွႆႇမၢၵ်ႇသႂ်ႇတီႈယေးငိုၼ်း CB Bank ဝဵင်းသႅၼ်ဝီသေ ၶဝ်ႈၸူၼ်ဢဝ်ငိုၼ်းၵႂႃႇတင်းၼမ်လႄႈ ႁဵတ်းႁႂ်ႈၵူၼ်းမိူင်း ၸိူဝ်းယူႇႁိမ်းႁွမ်းၼၼ်ႉ တူၵ်းၸႂ် ၵူဝ်ႁႄ ၼႆယဝ်ႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း