သိုၵ်းမၢၼ်ႈ တင်ႈၸႂ် ၸႂ်ႉၶိူင်ႈမိၼ် ယိုဝ်းသႂ်ႇႁိူဝ်းၸၢၵ်ႈ တေႃႉသူင်ႇ ၵူၼ်းပၢႆႈၽေးသိုၵ်း တီႈဝဵင်းၾၢႆၶုၼ် လွင်ႈမၢတ်ႇၸဵပ်း လူႉတၢႆတႄႉ ဢမ်ႇမီး။
ပူၼ်ႉမႃး မိူဝ်ႈဝၼ်းတီႈ 7/1/2024 ၼႆႉ ႁိူဝ်းၸၢၵ်ႈ လမ်းၼိုင်ႈ ဢၼ်တိုၵ်ႉတေၵႂႃႇႁပ်ႉ ၵူၼ်းပၢႆႈၽေးသိုၵ်း တၢင်းၾၢႆႇတူၵ်း ၼမ်ႉၼွင်ၽီလူး (ဖယ်ခုံအင်း) ၼၼ်ႉသေ တေတေႃႇသူင်ႇမႃးဝႆႉ တၢင်းဢွၵ်ႇၼမ်ႉၼွင်ၽီလူး ႁိမ်းဝၢၼ်ႈလွႆပေႃး ၸႄႈဝဵင်း ၾၢႆၶုၼ် ၸိုင်ႈတႆးပွတ်းၸၢၼ်းၼႆႉ ထုၵ်ႇသိုၵ်းမၢၼ်ႈ ၸႂ်ႉၶိူင်ႈမိၼ်ယိုဝ်းသႂ်ႇ ၼႆယဝ်ႉ။
ၵူၼ်းပၢႆႈၽေးသိုၵ်း ဝဵင်းၾၢႆၶုၼ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ဝၼ်းၼၼ်ႉ ယွၼ်ႉပၢင်တိုၵ်းယဵၼ်ဝႆႉလႄႈ ၵူၼ်း မိူင်းဢွၼ်ၵၼ်ပၢႆႈဢွၵ်ႇမႃး။ မိူဝ်ႈႁိူဝ်းလမ်းၼိုင်ႈ တိုၵ်ႉမႃး ႁပ်ႉၵူၼ်းပၢႆႈၽေး တၢင်းၾၢႆႇတူၵ်းၼမ်ႉၽီလူးၼၼ်ႉ ထုၵ်ႇသိုၵ်း မၢၼ်ႈ ၸႂ်ႉၶိူင်ႈမိၼ်မႃးယိုဝ်းသႂ်ႇဢေႃႈ။ ပဵၼ်ၵွင်ႈဢွၼ်ႇယိုဝ်းၵူၺ်း။ မၢၵ်ႇၵွင်ႈဢၼ်ၶဝ်ယိုဝ်းမႃးၼၼ်ႉ တိူဝ်ႉၺႃးႁိူဝ်း ဢေႃႈ။ ၸဝ်ႈႁိူဝ်းတႄႉ ဢမ်ႇတၼ်းတိူဝ်ႉၺႃးၶႃႈ”- ဝႃႈၼႆ။
ၵူၼ်းပၢႆႈၽေးသိုၵ်း ၸိူဝ်းတေၶၢမ်ႈၾင်ႇ ၵႂႃႇတၢင်းဝၢၼ်ႈလွႆပေႃး တေမီးႁူဝ်ၵူၼ်းၼပ်ႉပၢၵ်ႇ။ ၵမ်ႈၼမ် ပဵၼ်ၵူၼ်းမိူင်း လုၵ်ႉတၢင်းမိူင်းပၢႆးလႄႈ လွႆၶေႃ ၸိူဝ်းၼၼ်ႉ ပၢႆႈမႃးသွၼ်ႈဝႆႉတီႈၾၢႆၶုၼ်။ ၵူၼ်းပၢႆႈၽေးသိုၵ်းၼႆႉ ၵမ်ႈၼမ် ပၢႆႈမႃးၸဵမ်မိူဝ်ႈ သိုၵ်းမၢၼ်ႈ ယိုတ်းမိူင်းမႃး မိူဝ်ႈပီ 2021 ၼၼ်ႉ။
“ၵူၼ်းမိူင်း ၸိူဝ်းယူႇၸမ်ၼမ်ႉၼွင်ၽီလူးၼႆႉ ဢမ်ႇၸၢင်ႈပၢႆႈၵႂႃႇ ယူႇသဝ်းတီႈလႂ် လိူဝ်သေ ၶၢမ်ႈၾင်ႇၵႂႃႇသေႃႉယူႇဝႆႉ ၸွမ်း ၾၢႆႇဢွၵ်ႇၼမ်ႉၼၼ်ႉၵူၺ်း။ ယၢမ်းလဵဝ် ၽႃႈႁူမ်ႇၶူဝ်းၼွၼ်းၵေႃႈ ဢမ်ႇၸေးၵၼ် ပၢႆပဵၼ်ၶၢဝ်းၵတ်းထႅင်ႈလႄႈ ဢွၼ်ၵၼ် ထူပ်းတၢင်းယၢပ်ႇၽိုတ်ႇႁႅင်းၶႃႈဢေႃႈ” – ၵူၼ်းပၢႆႈၽေးသိုၵ်း သိုပ်ႇလၢတ်ႈၼင်ႇၼႆ။
ၵွၼ်ႇသိုၵ်းမၢၼ်ႈ ပႆႇယိုဝ်းသႂ်ႇႁိူဝ်းၸၢၵ်ႈၼႆႉ ၶဝ်ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ တီႈဝတ်ႉမုၼ်ၸဝ်ႈ ဝၢၼ်ႈဝဵင်းလွႆ ၸႄႈဝဵင်း ၾၢႆၶုၼ် လူႉၵွႆ လင်ၼိုင်ႈ။
“သိုၵ်းမၢၼ်ႈၼႆႉ ယိုဝ်းသႂ်ႇ ၵူၼ်းၼႂ်းဝၢၼ်ႈဝဵင်းလွႆ (မြို့ကုန်းရွာ) ဢွၼ်တၢင်း။ ယွၼ်ႉမီးၸုမ်း PDF ယူႇဝႆႉႁိမ်းဝၢၼ်ႈၼၼ်ႉ လႄႈ ၶဝ်ယိုဝ်းတိူဝ်ႉသႂ်ႇဝတ်ႉမုၼ်ၸဝ်ႈ ဝၢၼ်ႈဝဵင်းလွႆ လူႉၵွႆ။ ၵူၺ်းၵႃႈ လွင်ႈတုမ်ႉတိူဝ်ႉ ၵူၼ်းမၢတ်ႇၸဵပ်းလူႉတၢႆတႄႉ ဢမ်ႇ မီး။ ၶဝ်ႁၼ်ႁိူဝ်းၸၢၵ်ႈ တေႃႉသူင်ႇၶၢမ်ႈၼမ်ႉမႃးလႄႈ ၶဝ်ထၢင်ႇပဵၼ် PDF သေ ၸင်ႇယိုဝ်းသႂ်ႇၶႃႈဢေႃႈ ထၢင်ႇတႄႉ ”- ၵူၼ်းပိုၼ်ႉတီႈ ဝဵင်းၾၢႆၶုၼ်လၢတ်ႈ။
ဝၼ်းတီႈ 11/1/2024 ၼႆႉၵေႃႈ တပ်ႉသိုၵ်းယၢင်းလႅင်တင်း ၸုမ်းၵႅတ်ႇၶႄၵူၼ်းမိူင်း PDF ပိုတ်းယိုဝ်း တပ်ႉသိုၵ်းမၢၼ်ႈ ထႅင်ႈႁၢဝ်ႈႁႅင်း။ ၵူၼ်းဝဵင်းၾၢႆၶုၼ် ၵမ်ႈၼမ် ဢွၼ်ၵၼ်ၽူင်ႉပၢႆႈ ၵႂႃႇသွၼ်ႈယူႇၸွမ်းသၢပ်ႇဝဵင်းပၢင်လွင်း။ ယဝ်ႉၵေႃႈ မီး ၶၢဝ်ႇ လိုဝ်းဢွၵ်ႇမႃးဝႃႈ တႄႇဢဝ် ဝၼ်းတီႈ 10 ထိုင် 12 လိူၼ်ၼႆႉ ႁႂ်ႈၵူၼ်းမိူင်း ၸိူဝ်းမီးၼႂ်းဝဵင်းၾၢႆၶုၼ်ၼႆႉ ႁႂ်ႈၶၢႆႉ ဢွၵ်ႇဝဵင်း တင်းမူတ်း ဝႃႈၼႆ။
တင်ႈတႄႇ တပ်ႉသိုၵ်းယၢင်းလႅင်တင်း ၸုမ်းၵႅတ်ႇၶႄၵူၼ်းမိူင်း PDF တႄႇၽႅၼ်တိုၵ်း 1111 သေ ႁူမ်ႈၵၼ် လေႃႇ တိုၵ်းတပ်ႉသိုၵ်းမၢၼ်ႈမႃး ႁၢဝ်ႈႁႅင်းၼႆႉ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်မႃးပွႆႇမၢၵ်ႇသႂ်ႇ တီႈဝဵင်းၾၢႆၶုၼ် ၵူႈဝၼ်း ၼႆယဝ်ႉ။
