ၵူၼ်းၼမ်ႇၶမ်း မႆႈၸႂ် ၵူဝ်သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇၼႂ်းဝဵင်း မိူဝ်ႈၽွင်းဢမ်ႇႁူႉတူဝ် ယၢမ်းၵၢင်ၶမ်ႈ/ ၵၢင်ၶိုၼ်း။
တႄႇဢဝ် လိူၼ်ၵျႅၼ်ႊၼိဝ်ႊရီႊ 2024 ၼႆႉမႃး ၵူၼ်းဝဵင်းၼမ်ႉၶမ်း ၸိူဝ်းပၢႆႈၽေးသိုၵ်း ၵႂႃႇသွၼ်ႈဝႆႉတၢင်းမူႇၸေႊလႄႈ တၢင်း ထုင်ႉလွႆႁူဝ်သိူဝ် ၸိူဝ်းၼၼ်ႉ ဢွၼ်ၵၼ်ပွၵ်ႈၶိုၼ်းၸႂ်းႁိူၼ်းယေး ၽႂ်မၼ်းၵမ်ႈၽွင်ႈ မၢင်ၸိူဝ်းၼွၼ်းဢမ်ႇလပ်း ၽွင်းၵၢင် ၶမ်ႈၵၢင်ၶိုၼ်း ၵူဝ်သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ ၼႆယဝ်ႉ။
ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ၼႂ်းဝဵင်းၼမ်ႉၶမ်းၼႆႉ ပဵၼ်ၵႃႈ သိုၵ်းလွႆမူတ်း။ သိုၵ်း မၢၼ်ႈတႄႉ ဢမ်ႇမီးယဝ်ႉ။ ပၢင်တိုၵ်းၵေႃႈ ယဵၼ်မႃးၶၢဝ်းတၢင်း 3-4 ဝၼ်းယဝ်ႉ ၵူဝ်သိုၵ်းမၢၼ်ႈ ၸႂ်ႉၶိူင်ႈမိၼ်သေ မႃးပွႆႇမၢၵ်ႇ ယၢမ်းၵၢင်ၶမ်ႈ/ ၵၢင်ၶိုၼ်းၵူၺ်းယဝ်ႉ သိုၵ်းမၢၼ်ႈသမ်ႉ ၶဝ်ၵႆႉမႃးပွႆႇၶၢဝ်းၼၼ်ႉလႄႈ ႁဝ်းၶႃႈ ၵူၼ်းမိူင်းတႄႉ ၼွၼ်းပေႃးဢမ်ႇလပ်း လႆႈၼွၼ်းၾၢင်ႉ/ သတိဝႆႉယူႇ ၵူႈၶၢဝ်း။ သင်ဝႃႈ လႆႈငိၼ်းသဵင်ၵွင်ႈ ဢိတ်းဢွတ်းမေႃးယူႇတႄႉ ႁဝ်းၶႃႈ တေၸၢင်ႈတၼ်းဝႄႈလႆႈယူႇ တေႃႈလဵဝ် ယဵၼ်ဝႆႉၸိူင်ႉၼႆ လႆႈမႆႈၸႂ်ႁႅင်းဢေႃႈ”- ဝႃႈၼႆ။
ယၢမ်းလဵဝ် သိုၵ်းမၢၼ်ႈသမ်ႉ တူင်ႉၼိုင်ယူႇဝႆႉတၢင်းပွတ်းဝဵင်းမူႇၸေႊလႄႈ မၢၼ်ႈတၢတ်ႇ ၸိူဝ်းၼၼ်ႉ။ မိူဝ်ႈဝၼ်းတီႈ 7 ၼႆႉ သိုၵ်း TNLA ယိုဝ်းမၢၵ်ႇလူင် ဢွၵ်ႇတီႈတပ်ႉၸၶၢၼ်းတိတ်ႉ ဢၼ်မီးဝႆႉၾၢႆႇၸၢၼ်းဝဵင်းၼမ်ႉၶမ်းၼႆႉ သွင်လုၵ်ႈ။
“မိူဝ်ႈလဵဝ် ၵူၼ်းယူႇၼႂ်းဝဵင်းတႄႉ ဢေႇၼႃႇယဝ်ႉ။ ၵူၼ်းပႂ်ႉႁိူၼ်းၵေႃႈ ပဵၼ်ၵူၼ်းထဝ်ႈၵူၺ်း ၵူၼ်းၼုမ်ႇတႄႉ ၵမ်ႈၼမ် ပၢႆႈၵႂႃႇ တၢင်းမိူင်းၶႄႇ ဝဵင်းလိူဝ်ႇပူၼ်ႉမူတ်းယဝ်ႉ။ ပေႃးမီးၵေႃႈ တေမီးဢိတ်းဢွတ်းၵႃႈၼၼ်ႉၵူၺ်း။ ၵူဝ်မိူၼ်တၢင်းဝဵင်းပၢင်ႇသၢႆးၼၼ်ႉဢေႃႈ ၼၼ်ႉၵေႃႈ သိုၵ်းၵဝ်ႈၵၢင်ႉၶဝ် ၵဵပ်းသိုၵ်း။ မိူဝ်ႈႁူဝ်လိူၼ်ၼႆႉ သိုၵ်းလွႆၶဝ်သမ်ႉ လူင်းၵဵပ်းသဵၼ်ႈမၢႆ ႁၢၼ်ႉၶၢႆၶူဝ်းၵုၼ်ႇ၊ သဵၼ်ႈမၢႆႁူဝ်ၵူၼ်း ၼႂ်းဝဵင်းၼမ်ႉၶမ်း ႁိူၼ်းၼိုင်ႈလင် မီးၵူၼ်းလၢႆၵေႃႉ ဢႃယု မၢႆၾူၼ်း ၸိူဝ်း ၼႆႉ ၵဵပ်းၵႂႃႇမူတ်းလႄႈ ယွၼ်ႉၶဝ်ၵဵပ်းၸိူင်ႉၼႆသေ ၵူၼ်းၼုမ်ႇတႄႉ ၵူဝ်သေ ပၢႆႈၶႃႈယဝ်ႉ”- ၵူၼ်းပိုၼ်ႉတီႈ ဝဵင်းၼမ်ႉၶမ်း သိုပ်ႇလၢတ်ႈၼႄၼင်ႇၼႆ။
လိူဝ်ၼၼ်ႉ ၵူၼ်းၼမ်ႉၶမ်း မႆႈၸႂ်ထႅင်ႈ ၵူဝ်သိုၵ်း TNLA တင်း SSPP ယိုဝ်းၵၼ် ယွၼ်ႉဝႃႈ တၢင်းၾၢႆႇသိုၵ်း TNLA ဢဝ်ႁႅင်း သိုၵ်းတင်းၼမ် ဢိူမ်ႈၸမ် SSPP ဝႆႉ ဝႃႈၼႆ။
ၵူၼ်းၼုမ်ႇ ၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ဝၼ်းတီႈ 7 ယၢမ်းဝၢႆးဝၼ်း 3 မူင်းပၢႆ သိုၵ်းလွႆ ဢဝ်မၢၵ်ႇလူင် ယိုဝ်းၵႂႃႇ တူၵ်းၸမ် SSPP ဢၼ်မီးၼႂ်းၵႄႈဝၢၼ်ႈၼွင်မႃႉလႄႈ ဝၢၼ်ႈၼွင်ၵွင်ၼၼ်ႉ ယဝ်ႉၵေႃႈ ဢဝ်ႁႅင်းသိုၵ်းတင်းၼမ်သေ ဢိူမ်ႈ ၸမ် SSPP ထႅင်ႈ။ ယၢမ်းလဵဝ် သိုၵ်းလွႆ ဢဵၼ်ႁႅင်း 50-60 ၶၢမ်ႈၼမ်ႉမၢဝ်းၵႂႃႇထႅင်ႈသေ ၵူၼ်းမိူင်းတႄႉ မႆႈၸႂ်ၵူဝ်ၶဝ်ပဵၼ် ပၢင်တိုၵ်းၼၼ်ႉၶႃႈယဝ်ႉ”- ဝႃႈၼႆ။
တႄႇဢဝ် ဝၼ်းတီႈ 19/12/2023 ၼၼ်ႉမႃး သိုၵ်း TNLA ယိုတ်းလႆႈ တပ်ႉသိုၵ်းမၢၼ်ႈ ၸၶၢၼ်းတိတ်ႉ ဢၼ်မီးတၢင်းၾၢႆႇ ၸၢၼ်းဝဵင်းၼမ်ႉၶမ်းၼၼ်ႉသေ ယၢမ်းလဵဝ် ၼႂ်းဝဵင်းၼမ်ႉၶမ်းၼႆႉ သိုၵ်း TNLA ဢဝ်တီႈယူႇ တူင်ႉၼိုင်ၵႂႃႇမႃး ႁွၼ်ႈထဝ်ႇ ၶိူဝ်း ယႂ်းလႄႈ ၵူၼ်းမိူင်းမႆႈၸႂ် ၵူဝ်သိုၵ်းမၢၼ်ႈ ၸႂ်ႉၶိူင်ႈမိၼ်မႃးပွႆႇမၢၵ်ႇသႂ်ႇဝဵင်းလႅဝ်ၽႅဝ်ႉ (ယွၵ်းယွႆ) ၼႆယဝ်ႉ။
ၸွမ်းၼင်ႇ ၽႅၼ်ၵၢၼ် 1027 ၸုမ်းဢူၺ်းလီ ပွတ်းႁွင်ႇ 3 ၸုမ်း မိူၼ်ၼင်ႇ သိုၵ်း TNLA, MNDAA လႄႈ AA ၸိူဝ်းၼႆႉ ႁူမ်ႈၵၼ် လေႃႇတိုၵ်း တပ်ႉသိုၵ်းမၢၼ်ႈမႃး ၶၢဝ်းတၢင်း သွင်လိူၼ်ပၢႆၼႆႉ ယိုတ်းလႆႈ တပ်ႉပၢင်သဝ်း သိုၵ်းမၢၼ်ႈ ဢမ်ႇယွမ်း 300 ယဝ်ႉ။
