ထဝ်ႈၸၢႆး ဢႃယု 80 ပၢႆ ၵေႃႉၼိုင်ႈ တိူဝ်ႉၺႃးၸၢၵ်ႇမၢၵ်ႇ ၶိူင်ႈမိၼ်သိုၵ်းမၢၼ်ႈ တူၵ်းသႂ်ႇ လူႉတၢႆထင်တီႈ ၵိုၵ်းႁိူၼ်း တီႈဝဵင်းသႅၼ်ဝီ။
ဝၼ်းတီႈ 3/1/2024 ယၢမ်းၵၢင်ဝၼ်း သိုၵ်းမၢၼ်ႈ ၸႂ်ႉၶိူင်ႈမိၼ် 2 လမ်း မႃးပွႆႇမၢၵ်ႇသႂ်ႇတီႈဝဵင်းသႅၼ်ဝီ ၸၢၵ်ႇမၢၵ်ႇတိူဝ်ႉသႂ်ႇ ထဝ်ႈၸၢႆး ၸိုဝ်ႈႁွင်ႉ လုင်းသၢင်ႇသၢမ် ဢႃယု 80 ပီ ၵူၼ်းဝၢၼ်ႈပၢင်ႇလေႃႉ ဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆး ပွတ်း ႁွင်ႇ လႆႈလူႉတၢႆၵႂႃႇ ၼႆယဝ်ႉ။
ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “ၼႂ်းဝၼ်းၼၼ်ႉ ပၢင်တိုၵ်း ဢမ်ႇပဵၼ်ၶႃႈ သိုၵ်းမၢၼ်ႈ တင်ႈၸႂ် ဢဝ် ၶိူင်ႈမိၼ် မႃးပွႆႇမၢၵ်ႇသႂ်ႇဢေႃႈ။ ယွၼ်ႉဝႃႈ ၶဝ်ႁူႉ သိုၵ်းၵဝ်ႈၵၢင်ႉ မႃးမီးဝႆႉၸွမ်းဝၢၼ်ႈလႄႈ ၶဝ်ဢဝ်မၢၵ်ႇမႃးပွႆႇ တူၵ်းသႂ်ႇႁိူၼ်း ယေး ၵူၼ်းဝၢၼ်ႈပၢင်ႇလေႃႉ ၸွမ်းၶၢင်ႈတၢင်းလူင်ၸိူဝ်းၼၼ်ႉ လူႉၵွႆၸွမ်းၼမ်ဢေႃႈ။ ယဝ်ႉၵေႃႉ တိူဝ်ႉပႃးၵူၼ်းထဝ်ႈ လုင်း သၢင်ႇသၢမ် ဢႃယု 80 ပၢႆ လူႉတၢႆ ထင်တီႈ ၵေႃႉၼိုင်ႈ”- ဝႃႈၼႆ။
ၼႂ်းဝၼ်းၼၼ်ႉၵူၺ်း ၵူၼ်းဝၢၼ်ႈဝဵင်းလႅင် ၽူႈၸၢႆး ဢႃယု 40 ပၢႆ ၵေႃႉၼိုင်ႈ ၽွင်းတိုၵ်ႉႁေႃႈရူတ်ႉၶိူင်ႈယူႇၼၼ်ႉ တိူဝ်ႉၺႃး ၸၢၵ်ႇမၢၵ်ႇထႅင်ႈ တီႈဝၢၼ်ႈပၢင်ႇလေႃႉ။ ယဝ်ႉၵေႃႈ ပီႈၼွင်ႉၸၢဝ်းၶႄႇ တီႈဝၢၼ်ႈပၢင်ႇလေႃႉၵေႃႈ တိူဝ်ႉၺႃး ၸၢၵ်ႇမၢၵ်ႇသေ လႆႈမၢတ်ႇၸဵပ်းၸွမ်းထႅင်ႈ 4-5 ၵေႃႉ ဝႃႈၼႆ။
“တီႈဝဵင်းသႅၼ်ဝီၼႆႉ ယွၼ်ႉဢမ်ႇလႆႈလႅင်းၾူၼ်းဢေႃႈ လွင်ႈၵူၼ်းမၢတ်ႇၸဵပ်းၼၼ်ႉ လႆႈသူင်ႇၵႂႃႇယူတ်းယႃတူဝ် ဝႆႉတီႈလႂ် ၸိူဝ်းၼၼ်ႉၵေႃႈ ပႆႇႁူႉ။ ယဝ်ႉၵေႃႈ ႁိူၼ်းယေး ၵူၼ်းဝၢၼ်ႈလူႉၵွႆလူႉသုမ်း ၸွမ်းလၢႆလင် ၸိူဝ်းၼၼ်ႉၵေႃႈ ပႆႇလႆႈႁူႉၶေႃႈမုလ်း ၶႃႈ”- ၵူၼ်းပိုၼ်ႉတီႈ ဝဵင်းသႅၼ်ဝီ သိုပ်ႇလၢတ်ႈၼႄၼင်ႇၼႆ။
ယၢမ်းလဵဝ် ႁိူၼ်းယေး ၵူၼ်းဝၢၼ်ႈ ၼႂ်းဢိူင်ႇပၢင်ႇလေႃႉ ဢၼ်ထုၵ်ႇမၢၵ်ႇၶိူင်ႈမိၼ် သိုၵ်းမၢၼ်ႈ တူၵ်းသႂ်ႇသေ လူႉၵွႆဝႆႉၼၼ်ႉ တင်းမူတ်းမီးလၢႆလင် ယဝ်ႉၵေႃႈ လူႉသုမ်းၶၼ်ငိုၼ်းမွၵ်ႈႁိုဝ် ၸိူဝ်းၼႆႉၵေႃႈ ပႆႇမီးၽႂ်ႁူႉလႆႈၶေႃႈမုလ်းတႅတ်ႈတေႃး။
ၼႂ်းဝၼ်းတီႈ 3 ယၢမ်းဝၢႆးဝၼ်း ၼၼ်ႉၵေႃႈ မၢၵ်ႇတရူၼ်း တူၵ်းသႂ်ႇ ဢွင်ႈတီႈၵူၼ်းပၢႆႈၽေးသိုၵ်း ဝတ်ႉ/ ၵျွင်းၶမ်း ဝဵင်းသႅၼ်ဝီ တိူဝ်ႉသႂ်ႇ ဢွၼ်ႇယိင်း ဢႃယု 16 ပီ ၵေႃႉၼိုင်ႈလူႉတၢႆထင်တီႈလႄႈ မၢတ်ႇၸဵပ်းထႅင်ႈ 8 ၵေႃႉ။
ထိုင်မႃး ဝၼ်းတီႈ 4 ယၢမ်းၵၢင်ၼႂ် သိုၵ်းမၢၼ်ႈ ယိုဝ်းမၢၵ်ႇသျွတ်ႉ တူၵ်းသႂ်ႇ တီႈဝတ်ႉ/ ၵျွင်းၶမ်းထႅင်ႈ ႁဵတ်းႁႂ်ႈထဝ်ႈယိင်း ဢႃယု 60 ပီ ၵေႃႉၼိုင်ႈ တူၵ်းၸႂ်သေ ထိုင်တီႈလႆႈလူႉတၢႆ ။ ယဝ်ႉၵေႃႈ ၸၢၵ်ႇမၢၵ်ႇ တိူဝ်ႉသႂ်ႇ ၼၢင်းယိင်းထႅင်ႈ 2 ၵေႃႉ လႆႈတိူဝ်ႉမၢတ်ႇ ၸဵပ်းၸွမ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ