ပွႆးၵႂၢႆးတေႃး တီႈမိူင်းယၢင်း ပီၼႆႉ တေၸတ်းယႂ်ႇထႅင်ႈ  

ပွႆးၵႂၢႆးတေႃး ၸိုဝ်ႈသဵင်ယႂ်ႇၼႂ်းၸိုင်ႈတႆးပွတ်းဢွၵ်ႇ ပီၼႆႉ တေၸတ်းႁဵတ်းယႂ်ႇလူင်ထႅင်ႈ တီႈဝဵင်းမိူင်းယၢင်း တေမီးၵႂၢႆးၶဝ်ႈ တေႃးၶဵင်ႇၵၼ် ဢမ်ႇယွမ်း 10 တူဝ်။

တႄႇဢဝ် ဝၼ်းတီႈ 9-16/1/2024 ယူႇတီႈ ၵူၼ်းပိုၼ်ႉတီႈ မိူင်းယၢင်း တေဢွၼ်ၵၼ် ၸတ်းႁဵတ်းပွႆးၵႂၢႆးတေႃး တီႈပၢင် လဵၼ်ႈမၢၵ်ႇၼင် ၵၢင်ဝဵင်းမိူင်းယၢင်း ၸိုင်ႈတႆးပွတ်းဢွၵ်ႇၶူင်း ၸွမ်းၼင်ႇ ၾိင်ႈႁိၵ်ႈႁွႆး ၼႂ်းပိုၼ်ႉတီႈ ဝႃႈၼႆ။

ၸၢႆးလိူၼ်ၶမ်း ၽူႈတူင်ႉၼိုင် တူင်ႇဝူင်းၵူၼ်း ဝဵင်းမိူင်းယၢင်း လၢတ်ႈတီႈၽူႈတွႆႇႁွၵ်ႈဝႃႈ – “တေႃႈလဵဝ်ၼႆႉ တိုၵ်ႉဢုပ်ႇ ၵၼ်ဝႃႈ ၵႂၢႆးၼႆႉ တေတေႃး 2 ပွၵ်ႈႁႃႉ 3 ပွၵ်ႈႁႃႉ ၼႆယူႇ။ ပၢင်ပွႆးတႄႉ တေတႄႇၼႂ်းဝၼ်းတီႈ 9 ၵႂႃႇ ဝၼ်းပွႆးၵႂၢႆးတေႃး ၵၼ်သမ်ႉ တေ ပဵၼ် ဝၼ်းတီႈ 11 ၵမ်းၼိုင်ႈ၊ ဝၼ်းတီႈ 16 ၵမ်းၼိုင်ႈ။ ပေႃးဝႃႈ တေတေႃး 3 ပွၵ်ႈၸိုင် ၼႂ်းဝၼ်းတီႈ 21 ထႅင်ႈၵမ်းၼိုင်ႈ။ ပီၼႆႉ ၵႂၢႆးတေမႃးတေႃး တေၼမ်လိူဝ်ပီၵၢႆ ယွၼ်ႉဝႃႈ တၢင်းဢိူင်ႇမိူင်းသိုဝ်လိုဝ်း ၼႂ်းၼႃႈလိၼ်ၶိုၵ်ႉတွၼ်းမၢႆ 4 ၼၼ်ႉၵေႃႈ တေဢဝ်ၵႂၢႆးမႃးတေႃးထႅင်ႈ”- ဝႃႈၼႆ။

သိုပ်ႇလၢတ်ႈဝႃႈ – “ပီၼႆႉ တေမီးငိုၼ်းသူးတွၼ်ႈထိုင် ၵႂၢႆးတူဝ်ပေႉ/ တူဝ်ၵၼ်ႉယူႇ ၵူၺ်းၵႃႈ တေတွၼ်ႈၵႃႈႁိုဝ်တႄႉ ပႆႇလႆႈ ဢုပ်ႇ ဢူဝ်းၵၼ်။ ယွၼ်ႉဝႃႈ ၵႂၢႆးၸိူဝ်းတေႃးယဝ်ႉၼၼ်ႉ ၶဝ်တေဢဝ်ၵႂၢႆး ပၼ်ႇဢႅဝ်ႇတူၵ်းသူး ၸွမ်းၼႂ်းပၢင်ပွႆးထႅင်ႈ ၼၼ်ႉတႄႉ ၵမ်ႉၸႂ် ၸေႇတႃႇၼ တီႈၵူၼ်းၶၢႆၶူဝ်း ၵူၼ်းမႃးပွႆးၶဝ် တွၼ်ႈပၼ်”- ဝႃႈၼႆ။

ပွႆးၵႂၢႆးတေႃးၼႆႉ ပေႃးဢဝ်ၸွမ်းပိုၼ်းၵူၼ်းပိုၼ်ႉတီႈ ဝဵင်းမိူင်းယၢင်း ယုမ်ႇယမ်ၸိုင် ဢွၼ်တၢင်းသုတ်း တေလႆႈၸတ်းႁဵတ်း တီႈ ဢိူင်ႇမိူင်းလူၺ် ယဝ်ႉၵေႃႈ မိူင်းယၢင်း လိုၼ်းသုတ်းယဝ်ႉတီႈ မိူင်းၵွႆ။ ယၢမ်းလဵဝ် တီႈဢိူင်ႇမိူင်းလူၺ်တႄႉ ၸတ်းႁဵတ်းၵႂႃႇ ယဝ်ႉတူဝ်ႈလီငၢမ်း ၼႂ်းဝၼ်းလဵဝ် ဝၼ်းတီႈ 18/12/2023 ၼႆယဝ်ႉ။