ပွႆးၵႂၢႆးတေႃး တီႈဝဵင်းမိူင်းယၢင်း ပႆႇယဝ်ႉ သိုပ်ႇၶၢႆႉၵႂႃႇၸတ်း တီႈဝၢၼ်ႈမိူင်းၵွႆထႅင်ႈ ၼႂ်းၸႄႈဝဵင်းမိူင်းယၢင်း တႃႇၶၢဝ်းတၢင်း 11 ဝၼ်း။

တႄႇဢဝ် ဝၼ်းတီႈ 5-15/2/2023 ပွႆးၵႂၢႆးတေႃး သိုပ်ႇၶၢႆႉၵႂႃႇၸတ်း တီႈဝၢၼ်ႈမိူင်းၵွႆ ဢၼ်မီးဝႆႉ ၼႂ်းၼႃႈလိၼ်ၽွင်းငမ်းတူဝ် ၵဝ်ႇ “ဝႃႉ” UWSA ၼႂ်းၸႄႈဝဵင်းမိူင်းယၢင်း ၸိုင်ႈတႆးပွတ်းဢွၵ်ႇၶူင်း တေၸတ်းပၢင်တေႃးၵၼ်တႃႇ 3 ပွၵ်ႈ ၼႆယဝ်ႉ။

ၸၢႆးလိူၼ်ၶမ်း ၽူႈတူင်ႉၼိုင် ၼႂ်းတူင်ႇဝူင်းၵူၼ်း ဝဵင်းမိူင်းယၢင်း လၢတ်ႈတီႈၽူႈတွႆႇႁွၵ်ႈဝႃႈ – “ပေႃးဢဝ်ၸွမ်းၾိင်ႈထုင်း ၼႂ်း ပိုၼ်ႉတီႈဝႃႈၸိုင် ပွႆးၵႂၢႆးတေႃးၼႆႉ တေပၼ်ႇပုတ်ႈၵၼ် ၸတ်းႁဵတ်း 3 ဢွင်ႈတီႈ။ တေပဵꧣ် မိူင်းလူၺ်၊ မိူင်းယၢင်းလႄႈ မိူင်းၵွႆ။ မိူင်းလူၺ်တင်း မိူင်းယၢင်းတႄႉ ၸတ်းၵႂႃႇယဝ်ႉတူဝ်ႈလီငၢမ်းယဝ်ႉ။ ယၢမ်းလဵဝ် သိုပ်ႇၶၢႆႉၵႂႃႇၸတ်းတီႈမိူင်းၵွႆ”- ဝႃႈၼႆ။

ပွႆးၵႂၢႆးတေႃး တီႈမိူင်းၵွႆၼႆႉ တေတေႃးၵၼ် 3 ပွၵ်ႈ။ တေပဵၼ်ဝၼ်းတီႈ 5 ၼႆႉ ပွၵ်ႈၼိုင်ႈ။ ဝၼ်းတီႈ 10 တေႃး ထႅင်ႈပွၵ်ႈၼိုင်ႈလႄႈ ဝၼ်းတီႈ 15 တေႃးထႅင်ႈပွၵ်ႈၼိုင်ႈ။

တီႈဝဵင်းမိူင်းယၢင်းသမ်ႉ တႄႇဢဝ် ဝၼ်းတီႈ 31/1/2023 တေႃႇထိုင် 5/2/2023 ၵႂၢႆးၶဝ်ႈတေႃး မီး 30 တူဝ်ပၢႆ ၶဵင်ႇတေႃးၵၼ် 2 ပွၵ်ႈ။ မိူဝ်ႈဝၼ်းတီႈ 31/1/2023 ၼၼ်ႉ ပွၵ်ႈၼိုင်ႈ တေမီးၵႂၢႆးမွၵ်ႈ 30 တူဝ်။ ၼႂ်းၼၼ်ႉ ၵႂၢႆးဢၼ်ဢွင်ႇပေႉထီႉ ၼိုင်ႈ ပဵၼ်ၵႂၢႆးၵူၼ်းဝၢၼ်ႈမွၼ်ႈၵေး။ ၵႂၢႆးဢၼ်ပေႉထီႉသွင်သမ်ႉ ဝၢၼ်ႈႁူ ၼႂ်းဢိူင်ႇသိူဝ်လိုဝ်း။ ဝၼ်းတီႈ 5 ၼႆႉသမ်ႉ တေႃးထႅင်ႈ ပွၵ်ႈၼိုင်ႈ မီးၵႂၢႆးၶဝ်ႈတေႃး တင်းမူတ်း 8 တူဝ် ၸၢႆးလိူၼ်ၶမ်း သိုပ်ႇလၢတ်ႈၼင်ႇၼႆ။

ပွႆးၵႂၢႆးတေႃးၼႆႉ ယူႇတီႈ ၵူၼ်းပိုၼ်ႉတီႈ ဝဵင်းမိူင်းယၢင်း ယုမ်ႇယမ်ၵၼ်ဝႃႈ သင်ၸတ်းႁဵတ်းပွႆးၵႂၢႆးတေႃးၼႆႉၸိုင် မၢၵ်ႇၶဝ်ႈတဝ်ႈ ၼမ်ႉ တေပူင်းမၢၵ်ႈလီ၊ တၢင်းပဵၼ်တူဝ်သတ်း မႃႉလႃးဝူဝ်းၵႂၢႆး တေယူႇလီၵိၼ်ဝၢၼ်လႄႈ ဝၢၼ်ႈမိူင်းၵတ်းယဵၼ်ၼိမ်သဝ်းလီ ၸၢႆးလိူၼ်ၶမ်းလၢတ်ႈ။