ၵူၼ်းမိူင်း ဢွၼ်ၵၼ်မႆႈၸႂ် ၵူဝ်သိုၵ်းမၢၼ်ႈ ပွႆႇမၢၵ်ႇလူင် လူမ်ႇယိုဝ်းဝဵင်းလႅဝ်ၽႅဝ်ႉ (ယွၵ်းယွႆ) ဝၢႆးသိုၵ်း TNLA ယိုတ်းဝဵင်းၼမ်ႉၶမ်းမႃး ၶၢဝ်းတၢင်းၽၢၵ်ႇလိူၼ်ၼႆႉ။
တႄႇဢဝ် ဝၼ်းတီႈ 19/12/2023 ၼၼ်ႉမႃး ႁၢၼ်ႇတေႃႇထိုင်ယၢမ်းလဵဝ် သိုၵ်းတဢၢင်း TNLA ယိုတ်းလႆႈ တပ်ႉပၢင်သဝ်း သိုၵ်းမၢၼ်ႈ တီႈၸၶၢၼ်းတိတ်ႉ ဢၼ်မီးဝႆႉတၢင်းၾၢႆႇၸၢၼ်းဝဵင်း ၼႂ်းၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်း ႁွင်ႇ လႅၼ်လိၼ်တႆး – ၶႄႇၼႆႉ ၵူၼ်းမိူင်းမႆႈၸႂ် ၵူဝ်သိုၵ်းမၢၼ်ႈ ႁၢင်ႈႁႅၼ်း ဢဝ်ၶိူင်ႈမိၼ်၊ မၢၵ်ႇလူင် မႃးလူမ်ႇယိုဝ်း ႁၢဝ်ႈႁႅင်း သေ ၵူဝ်ဝဵင်းလႆႈလူႉၵွႆလႅဝ်ၽႅဝ်ႉ ပႅတ်ႈတင်းဝဵင်း ၼႆယဝ်ႉ။
ၵူၼ်းဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းပၢႆႈၽေးတႄႉ ပွၵ်ႈမႃးၶိုၼ်းႁိူၼ်းယေးၵၼ် ၵမ်ႈၽွင်ႈယဝ်ႉ။ မၢင်ၸိူဝ်း ပေႃးပဵၼ်ႁိူၼ်းပႅၼ်ႈ/ ၽႃ ၸိူဝ်းၼႆႉ ဢမ်ႇမီးၽႂ်ႁတ်းၼွၼ်း။ မႆႈၸႂ်ၵူဝ်သိုၵ်းမၢၼ်ႈၶဝ် ဢဝ်ၶိူင်ႈမိၼ်၊ ဢဝ်မၢၵ်ႇလူင်မႃးပွႆႇသႂ်ႇ ဝဵင်းလႅဝ်ၽႅဝ်ႉၶႃႈဢေႃႈ။ ပေႃးၵၢင်ၶမ်ႈတႄႉ ဢွၼ်ၵၼ်ပၢႆႈၵႂႃႇၼွၼ်းႁိူၼ်းယေး ပီႈၼွင်ႉ ၸိူဝ်းႁိူၼ်းၶိူင်ႇ ၶမ်ႉႁိူၼ်းဢုတ်ႇလႄႈ ၵျွင်းမုၼ်ၸဝ်ႈ ၸိူဝ်းၼႆႉ။ ပေႃးၵၢင်ၼႂ်သမ်ႉ ဢွၼ်ၵၼ်ပွၵ်ႈမႃးယူႇမႃးၵိၼ်တီႈႁိူၼ်း၊ ပေႃးၵၢင်ဝၼ်း 12 မူင်းၵႂႃႇတႄႉ ဢမ်ႇမီး ၵူၼ်းၵႂႃႇမႃးယဝ်ႉ ယဵၼ်ၸိပ်း ၼႂ်းဝဵင်းတႄႉ”- ဝႃႈၼႆ။
ယၢမ်းလဵဝ် ၼႂ်းဝဵင်းၼမ်ႉၶမ်းၼႆႉ သိုၵ်း TNLA ၶီႇရူတ်ႉၶိူင်ႈ/ ၵႃးသေ ႁွၼ်ႈထဝ်ႇၵႂႃႇ ၸွမ်းၼႂ်းၵၢင်ဝဵင်း ၶိူဝ်းယႂ်း။
“ၵူၼ်းမိူင်းတႄႉ ဢမ်ႇႁတ်းဢွၵ်ႇၵႂႃႇလႂ် လိူဝ်သေ ၵႂႃႇမႃးၸွမ်းၼႂ်းပွၵ်ႉယွမ်ႇၽႂ်မၼ်း ယဝ်ႉၵေႃႈ ၸွမ်းၵၢတ်ႇ၊ ၼႂ်းၵၢင်ဝဵင်း ၸိူဝ်း ၼႆႉၵူၺ်း ပေႃးပူၼ်ႉ ဢွၵ်ႇၼွၵ်ႈဝဵင်းၵႂႃႇတႄႉ ဢမ်ႇမီးၽႂ်ႁတ်းၵႂႃႇယဝ်ႉ ယွၼ်ႉဝႃႈ သိုၵ်းလွႆၶဝ် တင်ႈလၢၼ်ႇဝႆႉ”- ၵူၼ်းပိုၼ်ႉတီႈ ဝဵင်းၼမ်ႉၶမ်း သိုပ်ႇလၢတ်ႈၼႄၼင်ႇၼႆ။
ဝၢႆးသိုၵ်း TNLA ယိုတ်းလႆႈ ဝဵင်းၼမ်ႉၶမ်းၼႆႉမႃး ၶၢဝ်းတၢင်းၽၢၵ်ႇလိူၼ်ၼႆႉ ၶဝ်မွၵ်ႇႁွင်ႉ ၽူႈၵွၼ်းပွၵ်ႉ၊ ပူႇၵႄႇလႄႈ ၸဝ်ႈႁိူဝ်း ၸိူဝ်းၼႆႉ ၵႂႃႇဢုပ်ႇၶဝ် တီႈႁူင်းႁေႃ သိူဝ်ၽိူၵ်ႇဝဵင်းၼမ်ႉၶမ်း မိူဝ်ႈႁူဝ်လိူၼ်ၼႆႉ ဝႃႈၼႆ။
ယဝ်ႉၵေႃႈ ယူႇတီႈ သိုၵ်း TNLA သေ လူင်းပိုၼ်ႉတီႈ ၸွမ်းပွၵ်ႉယွမ်ႇ ၵဵပ်းသဵၼ်ႈမၢႆႁၢၼ်ႉၶၢႆၶူဝ်းၵုၼ်ႇ ယဝ်ႉၵေႃႈ ၵဵပ်းပႃးသဵၼ်ႈ မၢႆ ႁူဝ်ၵူၼ်းထႅင်ႈ မိူၼ်ၼင်ႇ မီးၵူၼ်းႁိူၼ်းလၢႆၵေႃႉ၊ လုၵ်ႈလၢင်းလၢႆၵေႃႉလႄႈ ဢႃယု ၸိူဝ်းၼႆႉ – ၵူၼ်းပိုၼ်ႉတီႈ ဝဵင်းၼမ်ႉၶမ်းလၢတ်ႈ။
 ဝၢႆးသိုၵ်း TNLA ယိုတ်းဝဵင်းၼမ်ႉၶမ်းမႃး ၶၢဝ်းတၢင်းၽၢၵ်ႇလိူၼ်ၼႆႉ။){kind=link}