ထဝ်ႈယိင်း ဢႃယု 85 ပီ ၵေႃႉၼိုင်ႈ တူၵ်းၸႂ်သဵင်ၵွင်ႈလူင်သေ ပလၢတ်ႈတူၵ်းၶိုၼ်ႈလႆ လႆႈဢဝ်လုပ်ႇၵူၼ်ႈႁၵ်း ယၢမ်းလဵဝ် သူင်ႇယူတ်းယႃတူဝ် ဝႆႉတီႈဝဵင်းလႃႈသဵဝ်ႈ။
ပူၼ်ႉမႃး မိူဝ်ႈဝၼ်းတီႈ 2/1/2024 ထဝ်ႈယိင်း တေႃႇတိၼ်ႇပု ဢႃယု 85 ပီ ၵူၼ်းဝၢၼ်ႈ ပွၵ်ႉတုင်းၸၢမ် ဝဵင်းသီႇပေႃႉ ၸႄႈ တွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ယွၼ်ႉတူၵ်းၸႂ် သဵင်ၵွင်ႈလူင်သေ ၼႅတ်ႈပၢႆႈလူင်းႁိူၼ်း ဢဝ်ပဵၼ်ၽေးၵိုင်ႉၵၢင်ႉ ပလၢတ်ႈ တူၵ်းၶိုၼ်ႈလႆ လႆႈတိူဝ်ႉမၢတ်ႇၸဵပ်း ႁၢဝ်ႈႁႅင်း ထိုင်တီႈလုပ်ႇၵူၼ်ႈပေႃးႁၵ်း ၼႆယဝ်ႉ။
ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ထဝ်ႈယိင်း ၸိုဝ်ႈႁွင်ႉ တေႃႇတိၼ်ႇပု ဢႃယု 85 ပီ ယွၼ်ႉတူၵ်းၸႂ် ငိၼ်းသဵင်မၢၵ်ႇလူင်သေ ပလၢတ်ႈတူၵ်းၶိုၼ်ႈလႆသေ လူမ်ႉလူင်းမႃး ထိုင်တီႈဢဝ်လုပ်ႇၵူၼ်ႈမၼ်းၼၢင်း ႁၵ်း ၵႂႃႇၶႃႈဢေႃႈ။ ယၢမ်းလဵဝ် လႆႈမႆႈဝႆႉ ယွၼ်ႉဝႃႈ ပဵၼ်ၵူၼ်းထဝ်ႈလႄႈ တႃႇတေယူတ်းယႃ ႁႂ်ႈမိူၼ်ၵဝ်ႇၶိုၼ်းတႄႉ တေယၢပ်ႇ တေ ၼၢၼ်းႁၢႆၼၼ်ႉၶႃႈယဝ်ႉ”- ဝႃႈၼႆ။
တီႈဝဵင်းသီႇပေႃႉၼႆႉ သိုၵ်းမၢၼ်ႈ ယူႇတီႈၼႂ်းတပ်ႉၶဝ်သေ ၵႆႉယိုဝ်းမၢၵ်ႇလူင် ဢွၵ်ႇတၢင်းၼွၵ်ႈတပ်ႉၶဝ် ယၢမ်းၵၢင်ၶမ်ႈ/ ၵၢင် ၶိုၼ်း ၼႆယဝ်ႉ။
“ပေႃးၵၢင်ၶမ်ႈ တႄႇဢဝ် 8 မူင်း ထိုင် 10 မူင်းၼႆႉ သိုၵ်းမၢၼ်ႈ တီႈတပ်ႉ 503 – 504 ၼၼ်ႉ ၶဝ်ၵႆႉယိုဝ်းမၢၵ်ႇလူင် ဢွၵ်ႇမႃး တၢင်းၼွၵ်ႈ ၵႆႉယိုဝ်းၵႂႃႇတၢင်းဝၢၼ်ႈၵွင်းၶႃး၊ ဝၢၼ်ႈဢုမ်မူႉ ၸိူဝ်းၼႆႉၶႃႈဢေႃႈ။ ၵူၺ်းၵႃႈ ၶဝ်တေယိုဝ်းၾၢႆႇလဵဝ်ၵူၺ်း”- ၵူၼ်း ပိုၼ်ႉတီႈ ဝဵင်းသီႇပေႃႉ သိုပ်ႇလၢတ်ႈၼႄၼင်ႇၼႆ။
ဢိင်ၼိူဝ် လွင်ႈသိုၵ်းမၢၼ်ႈ ၵႆႉယိုဝ်းၵွင်ႈလူင် ဢွၵ်ႇၼႂ်းတပ်ႉၶဝ် ၸိူင်ႉၼႆၼႆႉ ႁဵတ်းႁႂ်ႈၵူၼ်းမိူင်း လႆႈမႆႈၸႂ် ၵူဝ်မၢၵ်ႇလူင် တူၵ်း သႂ်ႇ ၸဵမ်ၸိူဝ်းၼႆႉ။
ပူၼ်ႉမႃး မိူဝ်ႈဝၼ်းတီႈ 1/1/2024 ယၢမ်းႁူဝ်ၶမ်ႈမွၵ်ႈ 6 မူင်းၶိုင်ႈ သိုၵ်းမၢၼ်ႈ ၶမယ 503-504 ၼႆႉၵူၺ်း လၢမ်းလိမ်းယိုဝ်း ၵွင်ႈလူင် ၵႂႃႇတၢင်းဝၢၼ်ႈမေႃႇၵိူဝ်၊ ၼႃးၶၢႆးလႄႈ တႃႈတေႈ ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ