ဢွင်ႈတီႈ ပၢင်သဝ်းၵူၼ်းပၢႆႈၽေးသိုၵ်း တီႈဝဵင်းသႅၼ်ဝီ ထုၵ်ႇမၢၵ်ႇတရူၼ်းမႃးပွႆႇသႂ်ႇ တႅၵ်ႇတိူဝ်ႉ ဢွၼ်ႇယိင်း ဢႃယု 16 ပီ ၵေႃႉၼိုင်ႈ လူႉတၢႆထင်တီႈလႄႈ မၢတ်ႇၸဵပ်းၸွမ်းထႅင်ႈ 8 ၵေႃႉ။

မိူဝ်ႈဝႃး ဝၼ်းတီႈ 3/1/2024 ယၢမ်းဝၢႆးဝၼ်း 1 မူင်း ဢွင်ႈတီႈပၢင်သဝ်းၵူၼ်းပၢႆႈၽေးသိုၵ်း တီႈတိူၵ်ႈသွၼ်လိၵ်ႈသင်ၶ ၸဝ်ႈ ဝတ်ႉ/ ၵျွင်းၶမ်း ဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇၼႆႉ ထုၵ်ႇတရူၼ်းမႃးပွႆႇမၢၵ်ႇသႂ်ႇ ဢမ်ႇယွမ်း 4 လုၵ်ႈ တႅၵ်ႇတိူဝ်ႉသႂ်ႇ ၵူၼ်းပၢႆႈၽေးသိုၵ်းလႄႈ ဝတ်ႉမုၼ်ၸဝ်ႈ လူႉၵွႆၸွမ်းထႅင်ႈၼမ်။  

ၵူၼ်းပိုၼ်ႉတီႈ ဝဵင်းသႅၼ်ဝီ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၶၢဝ်းၼၼ်ႉ ဢမ်ႇငိၼ်းသဵင်ၵွင်ႈသဵင်ႈမၢၵ်ႇသင်။ ၵူၺ်းၵႃႈ ငိၼ်းသဵင် တရူၼ်းမိၼ်မႃးသေ မႃးပွႆႇမၢၵ်ႇသႂ်ႇ မွၵ်ႈ 4-5 ၵမ်းၼႆႉဢေႃႈ။ ၸၢၵ်ႇမၢၵ်ႇၼၼ်ႉ တိူဝ်ႉသႂ်ႇ ဢွၼ်ႇယိင်း ဢႃယု 16 ပီ လူႉတၢႆ ၵေႃႉၼိုင်ႈ။ လိူဝ်ၼၼ်ႉ တိူဝ်ႉသႂ်ႇ လုၵ်ႈဢွၼ်ႇမၢတ်ႇၸဵပ်းၸွမ်းထႅင်ႈ ႁၢဝ်ႈႁႅင်း 6 ၵေႃႉ။ ယဝ်ႉၵေႃႈ ၵူၼ်းလူင်ထႅင်ႈ 2 ၵေႃႉ”- ဝႃႈၼႆ။

ဢွၼ်ႇယိင်း ဢႃယု 16 ပီ ဢၼ်လႆႈလူႉတၢႆၵႂႃႇၼၼ်ႉ ပဵၼ်လုၵ်ႈႁဵၼ်းၸၼ်ႉ 10 ၸိုဝ်ႈႁွင်ႉ ၼၢင်းငဵင်းသုၸႃႇ၊ လုၵ်ႈဢွၼ်ႇ လႄႈ ၵူၼ်းလူင် ၸိူဝ်းမၢတ်ႇၸဵပ်းၸွမ်းၼၼ်ႉတႄႉ လႆႈမႆႈၸႂ်ႁႅင်းဝႆႉ ယၢမ်းလဵဝ် လႆႈသူင်ႇယူတ်းယႃ ဝႆႉတီႈဝဵင်းလႃႈသဵဝ်ႈ။

လိူဝ်ၼၼ်ႉ ဝတ်ႉ/ ၵျွင်းၶမ်းၼႆႉၵေႃႈ လႆႈလူႉၵွႆၸွမ်းထႅင်ႈတင်းၼမ်။ မၢၵ်ႇတရူၼ်း ဢၼ်မႃးပွႆႇသႂ်ႇၼႆႉ ပဵၼ်ၼမ်ႉမိုဝ်းၽႂ် ၸုမ်းလႂ်မႃးပွႆႇသႂ်ႇတႄႉ ပႆႇႁူႉ။

“မၢၵ်ႇတရူၼ်းၼၼ်ႉ ပဵၼ်ၼမ်ႉမိုဝ်းၽႂ်ၸုမ်းလႂ် မႃးပွႆႇတႄႉ ဢမ်ႇႁူႉ။ မၢၵ်ႇတရူၼ်းၼၼ်ႉ မႃးပွႆႇသႂ်ႇ သိုဝ်ႈၵျွင်းၵမ်းလဵဝ် ဢေႃႈ။ ၽႃလႄႈ လဵၵ်းမုင်းၵျွင်းတႄႉ လူႉၵွႆၸွမ်းတင်းၼမ်ဢေႃႈ။ သိုၵ်းၶဝ်ၼႆႉ ဢမ်ႇဝႆႉဝတ်ႉဝႃးသင် ၶဝ်ၶႂ်ႈယိုဝ်းတီႈလႂ် ၵေႃႈယိုဝ်း လီၵူဝ်တႄႉၶႃႈ။ မိူဝ်ႈလဵဝ် ပၢႆႈၵႂႃႇယူႇတီႈလႂ်ၵေႃႈ ဢမ်ႇလွတ်ႈၽေးယဝ်ႉ” – ၵူၼ်းပိုၼ်ႉတီႈ ဝဵင်းသႅၼ်ဝီ သိုပ်ႇ လၢတ်ႈၼႄၼင်ႇၼႆ။

မိူဝ်ႈၼႆႉ ဝၼ်းတီႈ 4/1/2024 ယၢမ်းၵၢင်ၼႂ် သိုၵ်းမၢၼ်ႈ ယိုဝ်းမၢၵ်ႇသျွတ်ႉ တူၵ်းသႂ်ႇ တီႈဝတ်ႉ/ ၵျွင်းၶမ်း ဝဵင်းသႅၼ်ဝီၼႆႉ ထႅင်ႈ ႁဵတ်းႁႂ်ႈထဝ်ႈယိင်း ဢႃယု 60 ပီ ၵေႃႉၼိုင်ႈ တူၵ်းၸႂ်သေ ထိုင်တီႈလႆႈလူႉတၢႆ။ လိူဝ်ၼၼ်ႉ ၼၢင်းယိင်း 2 ၵေႃႉ တိူဝ်ႉၺႃးၸၢၵ်ႇမၢၵ်ႇသေ လႆႈမၢတ်ႇၸဵပ်းၸွမ်းထႅင်ႈ။

လွင်ႈဝႃႈ ၸုမ်းယိပ်းၵွင်ႈၵၢင်ႇ ႁူမ်ႈလူၺ်ႈ သိုၵ်းမၢၼ်ႈ ပဵၼ်ပၢင်တိုၵ်းၵၼ် ၸွမ်းဢွင်ႈတီႈ သႃသၼႃ ၊ ဢွင်ႈတီႈ ၵူၼ်း မိူင်း ၵႂႃႇမႃးယူႇသဝ်း ၸိူင်ႉၼႆၼႆႉ ပဵၼ်ဢၼ်ၽိတ်းပၵ်းပိူင် (Geneva Convention) ဝႃႈၼႆသေတႃႉၵေႃႈ ထိုင်မိူဝ်ႈ လဵဝ် ၵူၼ်းမိူင်းတႆး တိုၵ်ႉလႆႈၶၢမ်ႇတၢမ်ႇသိုၵ်းသိူဝ်ၼႆႉမႃး ၶိူဝ်းယႂ်းယူႇ ဝႃႈၼႆ။