သိုၵ်း KIA, PDF တင်း သိုၵ်းမၢၼ်ႈ ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းၸႄႈဝဵင်းမိူင်းမိတ်ႈထႅင်ႈ ႁဵတ်းႁႂ်ႈၵူၼ်းမိူင်း ဢွၼ် ၵၼ် ၽူင်ႉပၢႆႈဢွၵ်ႇဝၢၼ်ႈ။
မိူဝ်ႈဝႃး ဝၼ်းတီႈ 3/1/2024 တႄႇဢဝ် ယၢမ်းႁူဝ်ၶမ်ႈ 5:30 မူင်း သိုၵ်းၶၢင် KIA တင်း ၸုမ်းၵႅတ်ႇၶႄၵူၼ်းမိူင်း PDF ႁူမ်ႈၵၼ် လေႃႇတိုၵ်း တပ်ႉသိုၵ်းမၢၼ်ႈ ဢၼ်ပၵ်းဝႆႉတီႈ ဝၢၼ်ႈၸၢင်ႈၵၢင်ႇ ၼႂ်းၸႄႈဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ ႁၢဝ်ႈ ႁႅင်ႈ။
ၵူၼ်းပိုၼ်ႉတီႈ ဝဵင်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈသမ်ႉ ပၵ်းဝႆႉတီႈ ဝၢၼ်ႈၸၢင်ႈၵၢင်ႇ ဢၼ်မီးဝႆႉ တၢင်း ၾၢႆႇႁွင်ႇၼမ်ႉမိတ်ႈ။ သိုၵ်း KIA, PDF သမ်ႉ မီးၾၢႆႇၸၢၼ်းၼမ်ႉမိတ်ႈ ယူႇတီႈ ဝၢၼ်ႈသၢႆးလႅင်သေ သွင်ၾၢႆႇပိုတ်းယိုဝ်းၵၼ် ႁၢဝ်ႈႁႅင်းၶႃႈဢေႃႈ။ ႁၢၼ်ႉတေႃႇထိုင် ယၢမ်းလဵဝ် ၾၢႆႇသိုၵ်း KIA, PDF ၶဝ် ပႆႇသိမ်းလႆႈ တပ်ႉသိုၵ်းမၢၼ်ႈ တီႈဝၢၼ်ႈၸၢင်ႈ ၵၢင်ႇၼၼ်ႉၶႃႈ”- ဝႃႈၼႆ။
မိူဝ်ႈဝၼ်းတီႈ 2/1/2024 ပူၼ်ႉမႃးၼႆႉ သိုၵ်း KIA, PDF ၶဝ် တူင်ႉၼိုင်ၶဝ်ႈမႃး တၢင်းဝၢၼ်ႈသၢႆးလႅင်လႄႈ ဝၢၼ်ႈၸၢင်ႈ ၵၢင်ႇသေ ႁဵတ်းႁႂ်ႈၵူၼ်းဝၢၼ်ႈၵူဝ် ဢွၼ်ၵၼ် ပၢႆႈၶဝ်ႈဝဵင်း မႃးသွၼ်ႈယူႇၸွမ်းႁိူၼ်းယေး ပီႈၼွင်ႉၽႂ်မၼ်းဝႆႉ ဝႃႈၼႆ။
“မိူဝ်ႈၽွင်း ပဵၼ်ပၢင်တိုၵ်းၼၼ်ႉ သိုၵ်းၸုမ်းလႂ်ဢမ်ႇႁူႉ ၸႂ်ႉတရူၼ်းသေ ႁႃၸွပ်ႇၵမ်းၼိုင်ႈ ယဝ်ႉၵေႃႈ ယူႇတီႈ တပ်ႉသိုၵ်း မၢၼ်ႈ ဢၼ်မီးဝႆႉတီႈ ၼႂ်းဝဵင်းမိူင်းမိတ်ႈၼႆႉ လၢမ်းယိုဝ်းမၢၵ်ႇလူင် ၵႂႃႇတၢင်းၸဵင်ႇႁွင်ႇဝၼ်းဢွၵ်ႇၼၼ်ႉၶႃႈဢေႃႈ။ မိူဝ်ႈၶမ်ႈဝႃး ၼႆႉ ၾၢႆႇသိုၵ်းမၢၼ်ႈၶဝ် ထႅမ်ႁႅင်းသိုၵ်းထႅင်ႈတင်းၼမ် တင်းသွင်ၾၢၵ်ႇၶၢင်ႈၼမ်ႉမိတ်ႈၼႆႉ သိုၵ်းမၢၼ်ႈၶဝ် ဢဝ်တီႈယူႇ ပႂ်ႉၵူႈ တီႈၶႃႈယဝ်ႉ”- ၵူၼ်းပိုၼ်ႉတီႈ ဝဵင်းမိူင်းမိတ်ႈ သိုပ်ႇလၢတ်ႈၼႄၼင်ႇၼႆ။
မိူဝ်ႈဝၼ်းတီႈ 1/1/2024 ယၢမ်းၵၢင်ၼႂ် 6 မူင်း ၼၼ်ႉၵေႃႈ သိုၵ်းၶၢင် KIA တင်း ၸုမ်းၵႅတ်ႇၶႄၵူၼ်းမိူင်း PDF ႁူမ်ႈၵၼ် ဢဵၼ်ႁႅင်း 100 ပၢႆ လေႃႇတိုၵ်း တပ်ႉသိုၵ်းမၢၼ်ႈ တပ်ႉၵွင် 276 ဢၼ်ပၵ်းဝႆႉတီႈ ႁိမ်းဝတ်ႉတေႃးယႃႉ ၾၢႆႇၼိူဝ်ဝၢၼ်ႈပၢတ်ႈ ၼႂ်းၸႄႈဝဵင်းမိူင်းမိတ်ႈ သွင်ၾၢႆႇပဵၼ်ပၢင်တိုၵ်းၵၼ် ႁၢဝ်ႈႁႅင်း။ ၾၢႆႇသိုၵ်း KIA, PDF ၸင်ႇယိုတ်းလႆႈ တပ်ႉပၢင်သဝ်းသိုၵ်း မၢၼ်ႈ တီႈဝၢၼ်ႈပၢတ်ႈ ၼႆယဝ်ႉ။
