သိုၵ်းမၢၼ်ႈ လၢမ်းလိမ်းယိုဝ်းၵွင်ႈလူင်ၵႂႃႇ ၵူႈႁူးၵူႈတၢင်း ၼႂ်းဝဵင်းၾၢႆၶုၼ်သေ ႁဵတ်းႁႂ်ႈတုမ်ႉတိူဝ်ႉဝတ်ႉဝႃးၽႃသိူဝ်ႇလူႉ ၵွႆ ၸွမ်းၵမ်ႈၽွင်ႈလႄႈ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းလူႉတၢႆၵေႃႉၼိုင်ႈ။
ဝၼ်းတီႈ 2/1/2024 ယၢမ်းဝၢႆးဝၼ်း သိုၵ်းမၢၼ်ႈ ယိုတ်းမိူင်း လၢမ်းလိမ်းယိုဝ်းၵွင်ႈလူင် ၾၢႆႇလဵဝ် သႂ်ႇၼႂ်းဝၢၼ်ႈလူင်ၵႃ တင်း ဝၢၼ်ႈၵုင်းၸူင် ၼႂ်းဝဵင်းၾၢႆၶုၼ် ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း။
ၵူၼ်းပိုၼ်ႉတီႈ ဝဵင်းၾၢႆၶုၼ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇဢၼ်ၶဝ် ပွႆႇမႃးၼႆႉ တူၵ်းသႂ်ႇၼႂ်းဝၢၼ်ႈလူင် ၵႃ ၸၢၵ်ႇမၢၵ်ႇတိူဝ်ႉၺႃး ၽူႈၸၢႆး ဢႃယု 40 ပီ ၵေႃႉၼိုင်ႈ လူႉတၢႆထင်တီႈ။ ယဝ်ႉၵေႃႈ တူၵ်းသႂ်ႇတီႈဝၢၼ်ႈၵုင်းၸူင်ထႅင်ႈ ၼၼ်ႉၵေႃႈ တိူဝ်ႉၺႃး ဝတ်ႉမုၼ်ၸဝ်ႈ လူႉၵွႆၸွမ်းတင်းၼမ် လိူဝ်ၼၼ်ႉ ႁိူၼ်းယေး ၵူၼ်းဝၢၼ်ႈ ႁိမ်းႁွမ်းၼၼ်ႉ ၵေႃႈ လူႉၵွႆၸွမ်းထႅင်ႈ ၵမ်ႈၽွင်ႈ။ ၵူၺ်းၵႃႈ ဢမ်ႇမီးၽႂ် ႁတ်းပွၵ်ႈမိူဝ်းတူၺ်းလႄႈ ပႆႇမီးၽႂ်ႁူႉၸွမ်းႁူဝ်ယွႆႈမၼ်းၶႃႈ ဝႃႈလူႉၵွႆလႂ် လင် ၸဵမ်ၸိူဝ်းၼႆႉ”- ဝႃႈၼႆ။
ၸွမ်းၼင်ႇ ၽႅၼ်ၵၢၼ် 1111 ဢၼ်ယူႇတီႈ တပ်ႉသိုၵ်းယၢင်းလႅင်တင်း ၸုမ်းၵႅတ်ႇၶႄၵူၼ်းမိူင်း PDF ႁူမ်ႈၵၼ် လေႃႇ တိုၵ်း တပ်ႉသိုၵ်းမၢၼ်ႈ မႃးၶိူဝ်းယႂ်းသေ ႁဵတ်းႁႂ်ႈတုမ်ႉတိူဝ်ႉ ၵူၼ်းမိူင်းထူပ်းတၢင်းယၢပ်ႇၽိုတ်ႇၵိၼ်းၸႂ် လႆႈဢွၼ်ၵၼ် ပၢႆႈ ၽေးသိုၵ်းတင်းၼမ်။
“တီႈၾၢႆၶုၼ်ၼႆႉ ထိုင်မိူဝ်ႈလဵဝ်ၵေႃႈ တိုၵ်ႉပဵၼ်ပၢင်တိုၵ်းယူႇ။ ၵူၼ်းမိူင်းတႄႉ ၵုမ်ႇလႆႈပၢႆႈၽေးသိုၵ်းယူႇၵူၺ်း။ မၢင်ၸိူဝ်း ၵူၼ်းမိူင်း ပွၵ်ႈမိူဝ်းႁိူၼ်း ယူႇဢမ်ႇႁိုင်သင် လႆႈပၢႆႈထႅင်ႈ။ မၢင်ၸိူဝ်း ႁိူၼ်းယေးလူႉၵွႆမူတ်းယဝ်ႉလႄႈ ပွၵ်ႈမိူဝ်းၵေႃႈ ဢမ်ႇ ၸၢင်ႈယူႇတီႈလႂ်။ ထႅင်ႈလွင်ႈၼိုင်ႈသမ်ႉ သိုၵ်းမၢၼ်ႈၵႆႉၸႂ်ႉၶိူင်ႈမိၼ်မႃးပွႆႇမၢၵ်ႇလူင်သႂ်ႇလႄႈ ၽႂ်ၵေႃႈ ဢမ်ႇႁတ်းယူႇၼႂ်း ဝၢၼ်ႈၼႂ်းသူၼ် ၵူဝ်မၢၵ်ႇတူၵ်းသႂ်ႇဢေႃႈ” – ၵူၼ်းပိုၼ်ႉတီႈ ဝဵင်းၾၢႆၶုၼ် သိုပ်ႇလၢတ်ႈၼႄ ၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 11/12/2023 ၼၼ်ႉၵေႃႈ သိုၵ်းမၢၼ်ႈ ယိုတ်းမိူင်းတင်း သိုၵ်းယၢင်းလႅင် ပဵၼ်ပၢင်တိုၵ်း ထပ်း ၵၼ်မႃး ႁၢဝ်ႈႁႅင်း ၼႂ်းၶၢဝ်းတၢင်း 7 ၸူဝ်ႈမူင်းလႄႈ ၾၢႆႇသိုၵ်းယၢင်းလႅင် တီႈဝဵင်းမိူင်းပၢႆး – ၾၢႆၶုၼ် ယိုတ်းလႆႈ တပ်ႉပၢင် သဝ်းမၢၼ်ႈ ဢၼ်မီးၾၢႆႇၼိူဝ် ဝၢၼ်ႈသွင်ၼမ်ႉၵေးၼၼ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ