သိုၵ်းမၢၼ်ႈတင်း ၸုမ်းဢူၺ်းလီ ယိုဝ်းၵၼ် ႁၢဝ်ႈႁႅင်း တီႈဝဵင်းၵူတ်ႉၶၢႆ မၢၵ်ႇလူင် တူၵ်းသႂ်ႇၵူၼ်းမိူင်း လူႉတၢႆထင်တီႈ 2 ၵေႃႉ။

ဝၼ်းတီႈ 2/1/2024 ယၢမ်းၵၢင်ၼႂ်မွၵ်ႈ 10 မူင်းၶိုင်ႈ မၢၵ်ႇလူင် တူၵ်းသႂ်ႇ ၸၢႆးၶမ်းၶိူဝ်း ဢႃယု 50 ပၢႆ လူႉတၢႆ တီႈပွၵ်ႉ 5 ဝဵင်း ၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ယွၼ်ႉသိုၵ်းမၢၼ်ႈတင်း ၸုမ်းဢူၺ်းလီ ပွတ်းႁွင်ႇ 3 ၸုမ်း ယိုဝ်းၵၼ် ႁၢဝ်ႈ ႁႅင်း။

ၵူၼ်းပိုၼ်ႉတီႈ ဝဵင်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇၸုမ်းလႂ် ယိုဝ်းမႃးတူၵ်းသႂ်ႇတႄႉ ဢမ်ႇႁူႉ တိူဝ်ႉသႂ်ႇ ၸၢႆး ၶမ်းၶိူဝ်း ဢႃယု 50 ပၢႆ လူႉတၢႆထင်တီႈ ၵမ်ႈလဵဝ်ဢေႃႈ။ ယူႇတီႈ ၸုမ်းပရိႁတၶဝ် မႃးတေႃႉဢဝ်ၵႂႃႇတီႈႁူင်းယႃသေ ပူၼ်ႉ ၶၢပ်ႈတူဝ် ၵမ်းလဵဝ်ဢေႃႈ ဢမ်ႇတၼ်းလႆႈႁဵတ်းပၢင်မႃႇသႃႇပၼ်သင်ၶႃႈ”- ဝႃႈၼႆ။

ယွၼ်ႉပၢင်တိုၵ်းၼႆႉသေ ၸၢၵ်ႇမၢၵ်ႇ တိူဝ်ႉသႂ်ႇႁိူၼ်းယေး ၵူၼ်းဝၢၼ်ႈ လူႉၵွႆၸွမ်းထႅင်ႈ လၢႆလင် ၾၢႆႇသိုၵ်းမၢၼ်ႈသမ်ႉ  ၸႂ်ႉၶိူင်ႈ မိၼ်တိုၵ်း မႃးယိုဝ်းၸွႆႈ ဢမ်ႇယွမ်း 2 လမ်း မိူဝ်ႈၽွင်းၵၢင်ဝၼ်း 12 မူင်း။

“ဝၢႆးပၢင်တိုၵ်း ၶဝ်ယဵၼ်လူင်းၵႂႃႇယဝ်ႉ တီႈပွၵ်ႉ 5 ၼႆႉၵူၺ်း ၵႃးၸုမ်းပရႁိတၶဝ် မႃးတေႃႉၵူၼ်းတီႈပွၵ်ႉၼႆႉ ၵႂႃႇထႅင်ႈ 2 လမ်း ၼၼ်ႉတႄႉ တၢႆႁႃႉ မၢတ်ႇႁႃႉ ဢၼ်ဝႃႈၼၼ်ႉ ပႆႇႁူႉၶႃႈ။ ယွၼ်ႉပၢင်တိုၵ်း ပဵၼ်ႁႅင်းသေ ႁဝ်းၶႃႈ ဢမ်ႇႁတ်းဢွၵ်ႇႁိူၼ်း ဢွၼ် ၵၼ် မူၵ်းယူႇဝႆႉ တႂ်ႈႁိူၼ်းၶႃႈဢေႃႈ။ မိူဝ်ႈယၢမ်းၵၢင်ၼႂ် မွၵ်ႈ 9 မူင်းၼၼ်ႉၵေႃႈ မၢၵ်ႇလူင် တူၵ်းသႂ်ႇၵူၼ်းမိူင်း တၢႆ 1 မၢတ်ႇ 1 ဢွင်ႈတီႈလႅင်းၵႃး (ကားဂိတ်) ၼႂ်းၵၢင်ဝဵင်းၼႆႉ”- ၵူၼ်းပိုၼ်ႉတီႈ ဝဵင်းၵူတ်ႉၶၢႆ သိုပ်ႇလၢတ်ႈၼႄ ၼင်ႇၼႆ။

ၵဵဝ်ႇလူၺ်ႈ လွင်ႈပၢင်တိုၵ်းၼႆႉ ၾၢႆႇသိုၵ်းမၢၼ်ႈသမ်ႉ ဢဝ်တီႈယူႇဝႆႉ တီႈၼိူဝ်လွႆ ၵွင်းမူးၵူတ်ႉၶၢႆ ပွၵ်ႉ 5 ၸုမ်းဢူၺ်းလီ 3 ၸုမ်း ၼၼ်ႉသမ်ႉ ယူႇတီႈ ပွၵ်ႉ 8 ၼၼ်ႉသေ ပွႆႇမၢၵ်ႇသႂ်ႇ ဝႃႈၼႆ။

ယၢမ်းလဵဝ် တီႈဝဵင်းၵူတ်ႉၶၢႆၼႆႉ မီးဝႆႉ တပ်ႉသိုၵ်းမၢၼ်ႈ မိူၼ်ၼင်ႇ – 241-242 လႄႈ 45 ၸိူဝ်းၼႆႉ တူင်ႉၼိုင်ယူႇဝႆႉ ဝႃႈၼႆ။

ၼွၵ်ႈလိူဝ်သေ ပၢင်တိုၵ်း တီႈဝဵင်းၵူတ်ႉၶၢႆ ၼႂ်းဝၼ်းတီႈ 2/1/2024 ၼႆႉယဝ်ႉ တီႈဝဵင်းသႅၼ်ဝီၵေႃႈ သိုၵ်းမၢၼ်ႈတင်း ၸုမ်း ဢူၺ်းလီ ပွတ်းႁွင်ႇ 3 ၸုမ်း ပဵၼ်ပၢင်တိုၵ်းၵၼ် ႁၢဝ်ႈႁႅင်းထႅင်ႈ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းမၢတ်ႇၸဵပ်းၸွမ်းထႅင်ႈ လႂ်ၵေႃႉ ၼၼ်ႉတႄႉ ပႆႇႁူႉႁူဝ်ယွႆႈမၼ်း – ၵူၼ်းပိုၼ်ႉတီႈ ဝဵင်းသႅၼ်ဝီလၢတ်ႈ။

ယၢမ်းလဵဝ် ၵူၼ်းမိူင်းၵူတ်ႉၶၢႆ – သႅၼ်ဝီ ဢွၼ်ၵၼ်ပၢႆႈၽေးသိုၵ်း ႁွတ်ႈထိုင်ဝႆႉ တီႈဝတ်ႉသၢႆးၶၢဝ် ဢၼ်မီး ၼႂ်းၵႄႈသႅၼ်ဝီ – ၵူတ်ႉၶၢႆဝႆႉၼၼ်ႉ ရူတ်ႉၵႃး ဢမ်ႇယွမ်း 10 ၼႆယဝ်ႉ။