သိုၵ်းမၢၼ်ႈၸႂ်ႉၶိူင်ႈမိၼ်တိုၵ်း ပိုတ်းယိုဝ်းသႂ်ႇဝၢၼ်ႈႁိူၼ်း ၵူၼ်းမိူင်းၼမ်ႉတူႈ ၾႆးမႆႈလူႉၵွႆလင်ၼိုင်ႈ။

မိူဝ်ႈဝၼ်းတီႈ 24/12/2023 ၶၢဝ်းယၢမ်းၵၢင်ၶိုၼ်း 12 မူင်းၶိုင်ႈၼႆႉ ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇတူၵ်းသႂ်ႇ ႁိူၼ်းၵူၼ်းဝၢၼ်ႈၼႃးလိၼ်း ဢိူင်ႇမိူင်းယဵၼ် ၸေႊဝဵင်းၼမ်ႉတူႈ ၾႆးမႆႈလူႉၵွႆလင်ၼိုင်ႈ ။

ၵူၼ်းမိူင်းၼႂ်းပိုၼ်ႉတီႈမိူင်းယဵၼ် ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၶိူင်ႈမိၼ်လူင်ၼၼ်ႉ ယိူင်းၸူးတပ်ႉသိုၵ်းၶၢင်။ ၵူၺ်းၵႃႈသမ်ႉဢမ်ႇထိုင်ၼႂ်းတပ်ႉ သမ်ႉၽႅဝ်ၼႂ်းဝၢၼ်ႈၵူၼ်း တူၵ်းတီႈၼႂ်းဝဵင်းတိူဝ်ႉႁိူၼ်းလင်ၼိုင်ႈ ႁိူၼ်းၾႆးမႆႈၵႂႃႇဢေႃႈ။ ၵူၼ်းမၢတ်ႇၸဵပ်းတေႉဢမ်ႇမီး   ။ ပီႈၼွင်ႉၼႃးလိၼ်းၶဝ် ငိူင်ႉပေႃးမီး 3 ဝၼ်းယဝ်ႉ။ ႁေႃၼႃးလႄႈၼႃးလိၼ်းတေႉ ပၢႆႈတင်းဝၢၼ်ႈယဝ်ႉ။ ဢၼ်ယိုဝ်းၼႆႉတေႉ ပဵၼ်သိုၵ်းမၢၼ်ႈယိုဝ်း ” –  ဝႃႈၼႆ။

ၼႂ်းၸႄႈဝဵင်းၼမ်ႉတူႈၼႆႉ ယွၼ်ႉသိုၵ်းမၢၼ်ႈတင်း သိုၵ်းတဢၢင်း TNLA ၶဵင်ႈၶႅင်ၵၼ်ဝႆႉလႄႈ ၵူၼ်းဝၢၼ်ႈၵူၼ်းမိူင်းၶဝ် ၵူဝ်ဢမ်ႇလွတ်ႈၽေးၼႆသေ ဢွၼ်ပၢႆႈၶဝ်ႈၸူး ဝဵင်းလႃႈသဵဝ်ႈၵေႃႈ မီးတင်းၼမ်။ 

ၵူၼ်းမိူင်းၼႂ်းပိုၼ်ႉတီႈ ဝဵင်းၼမ်ႉတူႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ပေႃးၵၢင်ၶိုၼ်းၼႆ သဵင်ၵွင်ႈသဵင်မၢၵ်ႇတႄႉငိၼ်းယူႇ လႅပ်ႈၶဝ်တေယိုဝ်းၾၢႆႇလဵဝ် ။ လွင်ႈမႆႈၸႂ်တႄႉ ဢမ်ႇၸၢင်ႈလၢတ်ႈသင်ယဝ်ႉ မၼ်းမိူၼ်ၼင်ႇဝႃႈၼၼ်ႉယဝ်ႉ ဢမ်ႇၶႂ်ႈႁႂ်ႈမၼ်းပဵၼ်ၵေႃႈမၼ်းပဵၼ်မႃးယဝ်ႉလႄႈ ဢမ်ႇၸၢင်ႈႁဵတ်းႁိုဝ်။ ဢၼ်ပၢႆႈၵေႃႈ ပၢႆႈမိူင်းပေႃးႁၢမ်းယဝ်ႉ တေမီးၵူၼ်းပႂ်ႉမၼ်းၼိုင်ႈၵေႃႉ ၼိုင်ႉၵေႃႉၸိူင်ႉၼၼ်ၵူၺ်း။ မၢင်ႁိူၼ်းၵေႃႈ ၶတ်းသေႃး သေၵႂႃႇ ၸိူင်ႉၼၼ်ဢေႃႈ ” – ဝႃႈၼႆ။

ၵူၼ်းမိူင်းဝဵင်းၼမ်ႉတူႈၼႆႉ ၵမ်ႈၼမ်တေပၢႆႈၵႂႃႇတင်း ဝၢၼ်ႈၸၢမ်၊ မိူင်းမူႉ ၊ မိူင်းယဵၼ် လႃႈသဵဝ်ႈလႄႈ ၵမ်ႈၽွင်ႈ ၸိူဝ်းမီးပီႈၼွင်ႉတင်း မိူင်းတႆးပွတ်းၸၢၼ်းၵေႃႈ ဢွၼ်ပၢႆႈၵႂႃႇၵေႃႈမီး ဝႃႈၼႆ။

မိူဝ်ႈဝၼ်းတီႈ 21/12/2023 ယၢမ်း ၵၢင်ဝၼ်းၼၼ်ႉၵေႃႈ သိုၵ်းမၢၼ်ႈလၢမ်းလိမ်းယိုဝ်းၵွင်ႈလူင်ၵႂႃႇလၢႆပႃႈလၢႆၾၢႆႇလႄႈ မၢၵ်ႇလူင်တူၵ်းသႂ်ႇ တီႈဝၢၼ်ႈလွႆပႅၵ်ႇ  ၸႄႈဝဵင်းၵူတ်ႉၶၢႆ ၵူၼ်းၸၢႆးၵေႃႉၼိုင်ႈ လူႉတၢႆထင်တီႈ လိူဝ်ၼၼ်ႉ မႄႈလုၵ်ႈဢွၼ်ႇလဵၵ်ႉ 2 ၵေႃႉ မၢတ်ႇၸဵပ်းၸွမ်း။