ၼုမ်ႇၸၢႆးမူႇၸေႊၵေႃႉၼိုင်ႈ ယဵပ်ႇၺႃးမၢၵ်ႇမႅင်းမၢတ်ႇၸဵပ်းၼမ် ၽွင်းၵႂႃႇလဵင်ႉဝူဝ်း။

မိူဝ်ႈဝၼ်းတီႈ 23/12/2023 ယၢမ်းၵၢင်ဝၼ်း 1 မူင်းၼၼ်ႉ ၵူၼ်းၸၢႆးၵေႃႉၼိုင်ႈ ၵႂႃႇလဵင်ႉဝူဝ်းတီႈႁိမ်းပွၵ်ႉႁူဝ်မူၼ်ႇ ၾင်ႇၼမ်ႉမၢဝ်းၼၼ်ႉသေ ယဵပ်ႇၺႃးမၢၵ်ႇမႅင်း မၢတ်ႇၸဵပ်းႁၢဝ်ႈႁႅင်းၼႆယဝ်ႉ။

ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ပေႃးဝႃႈ ယဵပ်ႇၺႃးၼႆၵေႃႈ ၶႃမၼ်းယွၵ်းယွႆလူင်ၵႂႃႇဢေႃႈၼၼ်ႉ။ မၼ်းတိုၵ်ႉပဵၼ်ၵူၼ်းၼုမ်ႇၵူၺ်း ။ မၼ်းၵေႃႉလဵဝ်ၵူၺ်းၼင်ႇၵဝ်ႇ ဢၼ်ၵႂႃႇတီႈၼၼ်ႈ။တီႈၼၼ်ႈ မီးၶွၵ်ႈဝူဝ်းဝႆႉဢေႃႈ မၼ်းတေၵႂႃႇလဵင်ႉဝူဝ်းသေ လႄႈၵႂႃႇယဵပ်ႇၺႃးၵႂႃႈ။ဢၼ်ယဵပ်ႇၺႃးၼႆႉ လႅပ်ႈတေပဵၼ်မၢၵ်ႇမႅင်းသႅၼ်းလဵၵ်ႉ ” – ဝႃႈၼႆ။

မိူဝ်ႈဝၼ်းတီႈ 17/12/2023 ၼၼ်ႉၵေႃႈ ဢဵၼ်ႁႅင်းသိုၵ်းမၢၼ်ႈၼပ်ႉႁူဝ်ပၢၵ်ႇ မႃးဢဝ်တီႈယူႇ ၸွမ်းပွၵ်ႉႁူဝ်မူၼ်ႇ ၸမ်ၶူင်ႇႁိူဝ်းမိၼ်ၸိူဝ်းၼၼ်ႉလႄႈ ၵူၼ်းမိူင်းလွမ်မႆႈၸႂ် ၵူဝ်တူၵ်းပဵၼ်တူဝ်ယိူဝ်ႇ မၢၵ်ႇၵွင်ႈၸိုၼ်းယၢမ်းထႅင်ႈ။လွင်ႈၵူၼ်းမိူင်းယဵပ်ႇၺႃးမၢၵ်ႇၼၼ်ႉၵေႃႈ ၵူၼ်းမိူင်းထၢင်ႇထိူမ်ဝႃႈ ပဵၼ်ႁွႆးမိုဝ်းသိုၵ်းမၢၼ်ႈၵူၺ်းၼႆယဝ်ႉ ။

ၵူၼ်းၼႂ်းပိုၼ်ႉတီႈ ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ဢၼ်သိုၵ်းမၢၼ်ႈၶဝ် ထႅမ်ႁႅင်းသိုၵ်းၶဝ် မႃးပႂ်ႉဝႆႉ တီႈၾင်ႇၼမ်ႉမၢဝ်းၼႆႉ ယွၼ်ႉဝႃႈ ၶဝ်တေလႆႈၶၢဝ်ႇ သိုၵ်းဢူၺ်းလီ ပွတ်းႁွင်ႇၶဝ် မႃးဢဝ်တီႈယူႇၸွမ်းသၢပ်ႇၼမ်ႉမၢဝ်းၼႆႉ လႄႈ ၶဝ်ၸင်ႇမႃးယူႇၸိူဝ်းၼႆႉ ” – ဝႃႈၼႆ။

ယွၼ်ႉသိုၵ်းမၢၼ်ႈယိုတ်းမိူင်းလႄႈ ၸုမ်းဢူၺ်းလီပွတ်းႁွင်ႇ တိုၵ်းတေႃးၵၼ်မႃးၶိူဝ်းယႂ်းလႄႈ ၵူၼ်းမိူင်းမူႇၸေႊ ၊ ၼမ်ႉၶမ်း ၸိူဝ်းလႆႈပၢႆႈသွၼ်ႈ ယူႇဝႆႉၸွမ်းဝတ်ႉဝႃးၽႃသိူဝ်ႇလႄႈ ၸလွပ်ႈ ၸိူဝ်းၼႆႉ မီး 8 ႁဵင်ပၢႆ ၸုမ်းၸွႆႈၵူၼ်းပၢႆႈၽေးလၢတ်ႈဢွၵ်ႇဝႆႉ ၼင်ႇၼႆ။