သိုၵ်းမၢၼ်ႈတင်း ၸုမ်းဢူၺ်းလီ ယိုဝ်းၵၼ်ထႅင်ႈ တီႈဝဵင်းသႅၼ်ဝီ မၢၵ်ႇလူင်တူၵ်းသႂ်ႇ တီႈၸလွပ်ႈ ဝတ်ႉၵုၼ်ၵွၵ်ႇ လူႉ ၵွႆတင်းလင်လႄႈ တိူဝ်ႉၺႃး ၵူၼ်းဝၢၼ်ႈ လူႉတၢႆၸွမ်းထႅင်ႈ ၵေႃႉၼိုင်ႈ။
မိူဝ်ႈဝႃး ဝၼ်းတီႈ 22/12/2023 ယၢမ်းႁူဝ်ၶမ်ႈ 5 မူင်း သိုၵ်းမၢၼ်ႈတင်း ၸုမ်းဢူၺ်းလီ ပဵၼ်ပၢင်တိုၵ်းၵၼ် ၼႂ်းဢိူင်ႇ ၵုၼ်ၵွၵ်ႇ ၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ႁဵတ်းႁႂ်ႈမၢၵ်ႇလူင်တူၵ်းသႂ်ႇ တီႈၸလွပ်ႈ ဝတ်ႉ ၵုၼ်ၵွၵ်ႇ လူႉၵွႆၸွမ်းတင်းလင်လႄႈ တိူဝ်ႉပႃး ၼၢင်းၶမ်းလူႇ လူႉတၢႆၸွမ်း ၵေႃႉၼိုင်ႈ ၼႆယဝ်ႉ။
ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်းၶဝ် မိူဝ်ႈၶမ်ႈဝႃးၼႆႉ ႁဵတ်းႁႂ်ႈႁဝ်းၶႃႈ ၵူၼ်းမိူင်း ဢမ်ႇႁတ်း ၼွၼ်းတင်းၶိုၼ်းၶႃႈယဝ်ႉ။ တီႈၵျွင်းၵုၼ်ၵွၵ်ႇသမ်ႉ မီးပီႈၼွင်ႉတၢင်းဢိူင်ႇၼမ်ႉၸလၢပ်ႈ ပၢႆႈၽေးသိုၵ်းမႃးယူႇဝႆႉၶႃႈဢေႃႈ။ ယွၼ်ႉပၢင်တိုၵ်းၶဝ်ၼၼ်ႉသေ မၢၵ်ႇမႃးတူၵ်းသႂ်ႇ တီႈၸလွပ်ႈ ဝတ်ႉၵုၼ်ၵွၵ်ႇ လူႉၵွႆမူတ်းၶႃႈ ယဝ်ႉၵေႃႈ ၸၢၵ်ႇမၢၵ်ႇတိူဝ်ႉသႂ်ႇ ၼၢင်းၶမ်းလူႇ လူႉတၢႆၵႂႃႇၵေႃႉၼိုင်ႈၶႃႈ”- ဝႃႈၼႆ။
ဢွင်ႇတီႈ မၢၵ်ႇမႃးတူၵ်းသႂ်ႇ တီႈၸလွပ်ႈ ဝတ်ႉၵုၼ်ၵွၵ်ႇၼႆႉ ၸမ်ဝႆႉႁိူၼ်း ၸဝ်ႈသိုၵ်းၵၼ်ႇၼ (ၵူၼ်းသိုၵ်းၵဝ်ႇ ပၢၼ် MTA) ၼၼ်ႉ ဝႃႈၼႆ။
“လွင်ႈတုမ်ႉတိူဝ်ႉ ႁိူၼ်းၸဝ်ႈၵၼ်ႇၼ ၼၼ်ႉ ႁဝ်းၶႃႈ ပႆႇႁူႉၶေႃႈမုလ်းႁူဝ်ယွႆႈမၼ်းတႅတ်ႈတေႃး။ ယွၼ်ႉဝႃႈ လႅင်း ၾူၼ်း၊ လႅင်းၼႅတ်ႇ၊ ၾႆးၾႃႉ ၸိူဝ်းၼႆႉ မွတ်ႇပႅတ်ႈမူတ်းလႄႈ ဢမ်ႇၸၢင်ႈၵပ်းသိုပ်ႇၸူးၽႂ်လႆႈ ယၢမ်းလဵဝ်ၼႆႉ”- ၵူၼ်းပိုၼ်ႉတီႈ ဝဵင်းသႅၼ်ဝီ သိုပ်ႇလၢတ်ႈၼႄၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 3/12/2023 ယၢမ်းၵၢင်ၼႂ်ၸဝ်ႉ ၼၼ်ႉၵေႃႈ မၢၵ်ႇလူင်သိုၵ်းမၢၼ်ႈ တူၵ်းသႂ်ႇၼႂ်းဝၢင်းဝတ်ႉ/ ၵျွင်း ၶမ်း ဢိူင်ႇၵွင်းႁေႃ ၸႄႈဝဵင်းသႅၼ်ဝီ တီႈမီးၵူၼ်းပၢႆႈၽေးသိုၵ်းသွၼ်ႈယူႇဝႆႉတင်းၼမ်ၼၼ်ႉ ၸၢၵ်ႇမၢၵ်ႇတိူဝ်ႉမၢတ်ႇထဝ်ႈယိင်း ဢႃ ယု 60 ပၢႆ 2 ၵေႃႉ ယဝ်ႉၵေႃႈ တူၵ်းၸႂ်သေလူႉတၢႆ ၵေႃႉၼိုင်ႈ။
