သိုၵ်းမၢၼ်ႈတင်းသိုၵ်းတဢၢင်း ပိုတ်းယိုဝ်းၵၼ်တီႈၸႄႈဝဵင်းၼမ်ႉတူႈႁၢဝ်ႈႁႅင်းလႄႈ  ၵူၼ်းပိုၼ်ႉတီႈ ဢမ်ႇၸၢင်ႈယူႇသဝ်းလီလီ။

မိူဝ်ႈဝၼ်းတီႈ 20/12/2023 ယၢမ်းႁူဝ်ၶမ်ႈ 5 မူင်းၼၼ်ႉ တပ်ႉမၢၼ်ႈ ၶမရ 324 လႄႈ သိုၵ်းတဢၢင်း TNLA ၸႂ်ႉ ၵွင်ႈလူင်ပိုတ်းယိုဝ်းၵၼ်ႁၢဝ်ႈႁႅင်း ၵူၼ်းမိူင်းၸိူဝ်းယူႇၸမ်ပၢင်တိုၵ်း တူၵ်းၸႂ်ၵူဝ်ႁေၽူင်ႉပၢႆႈ။

ၵူၼ်းၼႂ်းပိုၼ်ႉတီႈ ဢႃယု 40 ပီၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၶဝ် ယိုဝ်းၵွင်ႈလူင်သႂ်ႇၵၼ်ၼႆႉ တင်းၶိုၼ်း တေႃႇမိူင်းလႅင်း ။ မိူဝ်ႈၼႆႉၵေႃႈ ၶဝ်ဢဝ်မၢၵ်ႇလူင်ယိုဝ်းသႂ်ႇၵၼ်ဢမ်ႇယွမ်း 10 ၵမ်း။ၵူၼ်းဝၢၼ်ႈတႄႉ ပၢႆႈၽွင်ႈယဝ်ႉ။ မၢင်ၸိူဝ်းၵေႃႈ ဢွၼ်ၵၢၼ်ပၢႆႈမိူဝ်ႈၼႆႉ ” – ဝႃႈၼႆ။

ယွၼ်ႉပၢင်တိုၵ်းသိုၵ်းမၢၼ်ႈယိုတ်းမိူင်းလႄႈ သိုၵ်းတဢၢင်း ပိုတ်းယိုဝ်းၵၼ်ႁၢဝ်ႈႁႅင်းလႄႈ ၵူၼ်းမိူင်းၼမ်ႉတူႈ လႆႈပၢႆႈ ပဵၼ်လၢႆဝၢၼ်ႈ မိူၼ်ၼင်ႇ ဝၢၼ်ႈသႅင်ႇၸႃႇ ၊ ဝၢၼ်ႈၽုၺ်း ၊ ဝၢၼ်ႈၵွင်းသႃႇ ၊ ဝၢၼ်ႈႁၢတ်ႇလႅင် ၊ ဝၢၼ်ႈပဵင်းလွင်း ၊ ဝၢၼ်ႈပၢင်မၢၼ်ႈ ၊ ဝၢၼ်ႈၼမ်ႉၵၢၼ်ႇ ၊ ဝၢၼ်ႈသၢႆးၶၢဝ် ၊ ဝၢၼ်ႈၼမ်ႉမႅင်းသေႃႉ ၊ ဝၢၼ်ႈပၢင်ဝူဝ်း  ၸိူဝ်းၼႆႉ။ယူႇတီႇၾၢႆႇ သိုၵ်းတဢၢင်းၵေႃႈ ႁႂ်ႈၵူၼ်းမိူင်းၶၢႆႉပၢႆႈဝႆႉ ၼႆယဝ်ႉ။

ၵူၼ်းၼႂ်းပိုၼ်ႉတီႈၸႄႈ ဝဵင်းၼမ်ႉတူႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်းလွႆ ၵေႃႈ ၸႂ်ႉၵူၼ်းမိူင်းပၢႆႈဝႆႉဢေႃႈ ၸိူဝ်းယူႇၸမ်ၸိူဝ်းၼၼ်ႉ။ ၵူၼ်းမိူင်းတႄႉ ပၢႆႈၵႂႃႇတၢင်း မၢတ်ႈၸၢမ် ၊ မိူင်းယဵၼ် ၸိူဝႅးပုၼ်ႉဢေႃႈ။ လိူဝ်သေ ၵူၼ်းယူႇ ၶႅပ်ႇဝဵင်းၸိူဝ်းၼၼ်ႉယဝ်ႉ မိူၼ်ၼင်ႇ ၵူၼ်းၼႂ်းဝဵင်း ပွၵ်ႉ 1 လႄႈ ပွၵ်ႉ 8 ၸိူဝ်းၼႆႉၵေႃႈ ယွၼ်ႉသိုၵ်းလွႆယူႇၼမ်လႄႈ ၵူၼ်းမိူင်းဢွၼ်ၵၼ်ပၢႆႈၽွင်ႈယဝ်ႉ” – ဝႃႈၼႆ။

ၵူၼ်းမိူင်းလႆႈၵိုင်ႈၵၢင်ႉပၢႆႈလႄႈ ယၢပ်ႇၽိုတ်ႇတီႈယူႇတီႈၵိၼ် ၵမ်ႈၽွင်ႈလႆႈပၢႆႈၶဝ်ယူႇၸွမ်းထဵင်ၼႃး မိူဝ်ႈလဵဝ် ၵူၼ်းပၢႆႈ ၽေးၼပ်ႉႁူဝ်ပၢၵ်ႇ ဢွၼ်ၵၼ်ၵူဝ်သိုၵ်းဢဝ်မၢၵ်ႇပွႆႇသႂ်ႇ ။ ပၢင်တိုၵ်းပွၵ်ႈၼႆႉ လွင်ႈလူႉသုမ်းလႄႈ ႁူဝ်ၼပ်ႉၵူၼ်းပၢႆႈ ၽေးတႄႉ ပႆႇႁူႉ  တႅတ်ႈတေႃး။

တႄႇဢဝ် ႁူဝ်လိူၼ်တီႊသိမ်ႊပိူဝ်ႊၼႆႉမႃး သိုၵ်းတဢၢင်းတင်း သိုၵ်းမၢၼ်ႈ ၶဵင်ႈၶႅင်ၵၼ်မႃးႁႅင်းလႄႈ ၾၢႆႇၸုမ်း သိုၵ်းမၢၼ်ႈ တပ်ႉ ၶမရ 324 ၼႂ်းၸႄႈဝဵင်းၼမ်ႉတူႈ ဢဝ်လုၵ်ႈလၢင်းၼၢင်းမေး တၢင်ႇၶိူင်ႈမိၼ်ႁႄႊလီႊၵွပ်ႊတႃႊသေ သူင်ႇထိုင်လႃႈသဵဝ်ႈဝႆႉ ၵူၼ်းၼႂ်းပိုၼ်ႉတီႈသိုပ်ႇလၢတ်ႈၼင်ႇၼႆ။

ၼႂ်းၶေႃႈလႆႈၸႂ်တူၵ်းလူင်း ၵျီႊၼီႊဝႃႊၶွၼ်ႊဝႅၼ်ႊသျိၼ်ႊ ပႃးဝႆႉဝႃႈ ၸုမ်းယိပ်းၵွင်ႈ ႁၢမ်ႈယူႇသဝ်းၶူၼ်းၶဝ်းၸွမ်းၵူၼ်းဝၢၼ်ႈ၊ ႁၢမ်ႈဢဝ်ၵူၼ်းဝၢၼ်ႈလႄႈ ဝၢၼ်ႈသူၼ်ႁိူၼ်းယေးႁဵတ်းႁူဝ်ႉ၊ ႁၢမ်ႈဢဝ်ၵူၼ်းဝၢၼ်ႈပဵၼ်ပဝ်ႉမၢႆၵၢၼ်သိုၵ်းဝႃႈၼႆသေတႃႉ ပိူင်ပဵၼ်ပၢင်တိုၵ်းၼႂ်းမိူင်းတႆႉမိူဝ်ႈလဵဝ်တႄႉ ပဵၼ်ယူႇၼႂ်းဝၢၼ်ႈၼႂ်းဝဵင်းၵူၼ်းမိူင်း။