ၸၢႆးသႅင်ႁၢၼ်ၾႃႉ ပေႃႈႁိူၼ်းၼုမ်ႇ ၵေႃႉၼိုင်ႈ ထုၵ်ႇသိုၵ်းၵဝ်းၵၢင်ႉ တီႉၺွပ်းၵုမ်းတူဝ်ၵႂႃႇ ၸမ်လိူၼ်ယဝ်ႉ ပႆႇပွႆႇႁဵတ်း ႁႂ်ႈလုၵ်ႈလၢင်းၼၢင်းမေးလႄႈ ပေႃႈမႄႈပီႈၼွင်ႉ ၸိူဝ်းၵိုတ်းတင်းလင် မႆႈၸႂ် ပဵၼ်ၼမ်ႉႁူၼမ်ႉတႃ။

ပူၼ်ႉမႃး မိူဝ်ႈဝၼ်းတီႈ 25/11/2023 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် ၸၢႆးသႅင်ႁၢၼ်ၾႃႉ ဢႃယု 26 ပီ ထုၵ်ႇသိုၵ်းၵဝ်ႈ ၵၢင်ႉ MNDAA တီႉၺွပ်းၵုမ်းတူဝ်မၼ်းၸၢႆး တီႈႁိမ်းဝၢၼ်ႈပႃႇသိင်ႇၵျေႃႇ တၢင်းဢွၵ်ႇဝဵင်းလၢဝ်ႇၵၢႆး ၼႂ်းၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ၼႆယဝ်ႉ။

ၵေႃႉပဵၼ် ပီႈၼၢင်း ၸၢႆးသႅင်ႁၢၼ်ၾႃႉ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၸၢႆး ၵႂႃႇႁဵတ်းၵၢၼ် တီႈဝဵင်းလၢဝ်ႇၵၢႆး တၼ်းလႆႈ 5-6 လိူၼ်ၵူၺ်း ယွၼ်ႉပၢင်တိုၵ်းၼၼ်ႉသေ မၼ်းၸၢႆးတင်းဢူၺ်းၵေႃႉမၼ်း ၶီႈရူတ်ႉၶိူင်ႈဢွၵ်ႇမႃးၸွမ်းၵၼ် 2 လမ်း။ ထိုင်မႃး တီႈႁိမ်းဝၢၼ်ႈပႃႇသိင်ႇၵျေႃႇၼၼ်ႉ ထုၵ်ႇသိုၵ်းၵဝ်ႈၵၢင်ႉၶဝ် တီႉၺွပ်းဢဝ်တူဝ်မၼ်းၸၢႆးဝႆႉသေ ႁၢၼ်ႉတေႃႇထိုင်ယၢမ်းလဵဝ် ပႆႇပွႆႇ မႃးၶႃႈ။ ဢူၺ်းၵေႃႉမၼ်းၸၢႆး 2 ၵေႃႉ ၼၼ်ႉတႄႉ ပွၵ်ႈၽႅဝ်ႁိူၼ်းမႃးယဝ်ႉသေ မႃးၶႂ်ႈၼႄႁဝ်းၶႃႈဢေႃႈ။ တေႃႈလဵဝ် ႁဝ်းၶႃႈ ၵပ်းသိုပ်ႇၵေႃႈ ဢမ်ႇလႆႈ မႆႈၸႂ်မၼ်းၸၢႆးၶႃႈဢေႃႈ”- ဝႃႈၼႆ။

ၸၢႆးသႅင်ႁၢၼ်ၾႃႉ ဢႃယု 26 ပီၼႆႉ ပဵၼ်လုၵ်ႈၸၢႆး လုင်းမူဝ်းဢွင်ႇလႄႈ ပႃႈဢုင်ႇ ယူႇပွၵ်ႉမွၵ်ႇသႅင်သႂ် ဝဵင်းၼမ်ႉလၼ်ႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။

“မၼ်းၸၢႆး ၵႂႃႇႁဵတ်းၵၢၼ် တီႈဝဵင်းလၢဝ်ႇၵၢႆးၼၼ်ႉ ၵႂႃႇႁဵတ်းၵၢၼ်လၢၼ်ႉမေႃႈမႆႈဢေႃႈ။ လုၵ်ႈလၢင်းမေးၼၢင်းတႄႉ ဢမ်ႇဢဝ် ၵႂႃႇၸွမ်းၶႃႈ။ ယွၼ်ႉမီးလုၵ်ႈလဵၵ်ႉဝႆႉလႄႈ ယူႇပႂ်ႉတီႈႁိူၼ်းဝႆႉ။ ၵဵဝ်ႇလူၺ်ႈ မၼ်းၸၢႆးထုၵ်ႇတီႉၺွပ်းၵုမ်းတူဝ်ၵႂႃႇ ၸိူင်ႉၼႆ ၵေႃႉပဵၼ် မေးၼၢင်း ၸႂ်ဢမ်ႇလီၸွမ်း သုၵ်းသၵ်ႉ မႆႈၸႂ်လူင်ဝႆႉၶႃႈဢေႃႈ ၸဵမ်ႁဝ်းၶႃႈပီႈၼွင်ႉလႄႈ ပေႃႈမႄႈ ၸိူဝ်းၼႆႉထႅင်ႈဢေႃႈ”- ၵေႃႉ ပဵၼ် ပီႈၼၢင်း သိုပ်ႇလၢတ်ႈၼႄၼင်ႇၼႆ။

ၸၢႆးသႅင်ႁၢၼ်ၾႃႉၼႆႉ တႄႇၼႃႈႁိူၼ်းၵိုၵ်းၸွမ်း ၼၢင်းသူၺ်ႇမုင်ႉ မီးလုၵ်ႈႁူမ်ႈၵၼ်ဝႆႉၵေႃႉၼိုင်ႈ ပဵၼ်ဢွၼ်ႇယိင်း တိုၵ်ႉမီးဢႃယု 11 လိူၼ် ၼႆယဝ်ႉ။