ၸုမ်းယိပ်းၵွင်ႈၵၢင်ႇလႄႈၸုမ်းတူင်ႉၼိုင်တူင်ႇဝူင်းၵူၼ်း 255 ၸုမ်းယိုၼ်ႈလိၵ်ႈသူင်ႇထိုင် မိူင်းၶႄႇ ႁႂ်ႈၵိုတ်းယိုတ်းလွင်ႈပၼ်ႁႅင်းသိုၵ်းမၢၼ်ႈ ႁႂ်ႈၵိုတ်းယိုတ်းလွင်ႈသိုပ်ႇသၢႆၸႂ်ၸဝ်ႈဢႃႇၼႃႇသိုၵ်း ၊ ႁႂ်ႈထွမ်ႇသဵင်ၵၢင်ၸႂ်ၵူၼ်းမိူင်း – ဝႃႈၼႆ။
လိၵ်ႈၽိုၼ်ၼႆႉ တူၵ်ႇၸိုဝ်ႈၸွမ်ၸိုင်ႈမိူင်းၶႄႇ သျီႊၵျိၼ်ႉၽိင်ႊ ၸွမ်ၽွင်းလူင် ဝၼ်ႊယိ လႄႈ ၵူၼ်းမိူင်းၶႄႇၼႆသေ သူင်ႇၸူးမိူဝ်ႈဝၼ်းတီႈ 17 လိူၼ်တီႊသႅမ်ႊပိူဝ်ႊ ။ ၼႂ်းၼၼ်ႉပႃးလွင်ႈ ႁႂ်ႈၶႄႇၵိုတ်းလွင်ႈယူႇၵႄႈ သိုၵ်းမၢၼ်ႈလႄႈ ၸုမ်းယိပ်းၵွင်ႈၵၢင်ႇဢၼ်တိုၵ်ႉသၢၼ်ၶတ်းတိုၵ်းတေႃးသိုၵ်းမၢၼ်ႈယူႇသေ ႁဵတ်းၶဵဝ်ႁူၺ်းႁွင်ႉမႃးဢုပ်ႇဢူဝ်းၵိုတ်းတိုၵ်းၵၼ်။ သင်ဝႃႈၶႄႇတဵၵ်းႁွင်ႉႁႂ်ႈၵိုတ်းတိုၵ်းယူႇတိၵ်းတိၵ်းၸိုင် ယူႇတီႈၵူၼ်းမိူင်းမၢၼ်ႈ ၸုမ်းယိပ်းၵွင်ႈၵၢင်ႇတိုၵ်းတႃႇ တီႊမူဝ်ႊၵရေႊသီႊ မိူင်းမၢၼ်ႈသေ ထုၵ်ႇလီတုမ်ႉတွပ်ႇၸိူင်ႉႁိုဝ်ၵေႃႈတေတုမ်ႉတွပ်ႇၵႂႃႇ ဝႃႈၼႆဝႆႉ။
လိူဝ်ၼၼ်ႉ လၢတ်ႈဝႆႉပႃးထႅင်ႈဝႃႈ – လၢႆးၶႄႇႁဵတ်းတေႃႇမိူင်းမၢၼ်ႈယၢမ်းလဵဝ်ၼႆႉ မိူၼ်ၸၼ်သႂၢင်းၸႂ်ပိူင်ငဝ်ႈပိုင်းမိူင်း 2008 ဢၼ်တၢႆၵႂႃႇၸဵမ်မိူဝ်ႈသိုၵ်းယိုတ်းဢႃႇၼႃႇၸိုင်ႈမိူင်း ၼၼ်ႉၶိုၼ်းၵူၺ်း။ ပိူင်ငဝ်ႈပိုင်းမိူင်း 2008 ၼႆႉ ပဵၼ်ၾၢႆႇသိုၵ်းမၢၼ်ႈၶဵၼ်ႇတႅမ်ႈၾၢႆႇလဵဝ် ပဵၼ်တႃႇသိုၵ်းမၢၼ်ႈယိပ်းၵမ်ဢႃႇၼႃႇၸိုင်ႈမိူင်းၵူၺ်းလႄႈယူႇတီႈၵူၼ်းမိူင်းလႄႈၸုမ်းတီႊမူဝ်ႊၵရေႊသီႊ ဢမ်ႇယွမ်းႁပ်ႉလႆႈ ဝႃႈၼႆ။
မိူဝ်ႈၸွမ်ၽွင်းလူင်ၸိုင်ႈမိူင်းၶႄႇ ဝၼ်ႊယိ လႄႈ ၽွင်းတၢင်ၸိုင်ႈမိူင်းဢႃႇသီႇယၼ်ႇၶဝ်ဢုပ်ႇၵၼ်ဝၼ်းတီႈ 15 ၼၼ်ႉၵေႃႈ ၶႄႇလၢတ်ႈဝႃႈ တေသိုပ်ႇႁဵတ်းလွင်ႈငမ်းယဵၼ်ပၼ်မိူင်းမၢၼ်ႈႁႂ်ႈပေႃးလႆႈ ဝႃႈၼႆဝႆႉ။
