ၸုမ်းဢူၺ်းလီ ပွတ်းႁွင်ႇ ယိုတ်းလႆႈ တပ်ႉသိုၵ်းမၢၼ်ႈ တီႈၸၶၢၼ်းတိတ်ႉ ဝဵင်းၼမ်ႉၶမ်းယဝ်ႉ ၽူႈတူင်ႉၼိုင် ၵၢၼ်သိုၵ်း တၢင်းပွတ်းထုင်ႉမၢဝ်းလၢတ်ႈ။

မိူဝ်ႈၼႆႉ ဝၼ်းတီႈ 19/12/2023 ယၢမ်းၵၢင်ၼႂ် 1 မူင်း သိုၵ်းတဢၢင်း TNLA ၊ သိုၵ်းရၶႅင်ႇ AA ၊ သိုၵ်းၵဝ်ႈၵၢင်ႉ MNDAA လႄႈ ၸုမ်းၵႅတ်ႇၶႄႁႄႉၵင်ႈ ၵူၼ်းမိူင်း PDF ႁူမ်ႈၵၼ် လေႃႇတိုၵ်း တပ်ႉသိုၵ်းမၢၼ်ႈ တီႈၸၶၢၼ်းတိတ်ႉ ဢၼ်မီးၾၢႆႇ ၸၢၼ်း ဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇသေ ယိုတ်းလႆႈယဝ်ႉ ဝႃႈၼႆ။

ၽူႈတူင်ႉၼိုင် ၵၢၼ်သိုၵ်း တၢင်းပွတ်းထုင်ႉမၢဝ်း လၢတ်ႈတီႈၽူႈတွႆႇႁွၵ်ႈဝႃႈ – “လႆႈဝႃႈ သဵင်ၵွင်ႈဢမ်ႇတႅၵ်ႇ သိုၵ်းမၢၼ်ႈ ထွႆပၼ် ၸိူင်ႉၼၼ်ၶႃႈဢေႃႈ။ တင်းသွင်ၾၢႆႇ လႅပ်ႈတေမီးလွင်ႈဢုပ်ႇဢူဝ်းတူၵ်းလူင်ၵၼ်ယူႇသေဢၼ်ဢၼ်။ လွင်ႈ ၶၢဝ်းတၢင်း ၸုမ်း ဢူၺ်းလီ ၶိုၼ်ႈတိုၵ်း တီႈၸၶၢၼ်းတိတ်ႉၼႆႉ မီးၶၢဝ်းတၢင်းလိူၼ်ပၢႆဢေႃႈ”- ဝႃႈၼႆ။

 သိုၵ်းမၢၼ်ႈ ဢၼ်မႃးလူင်း ၶိူင်ႈမိၼ်သေ ၶမ်ဝႆႉၼႂ်းဝၢၼ်ႈၼွင်တိူၼ်း ႁႅင်းၵူၼ်း 102 ၵေႃႉ ၼၼ်ႉၵေႃႈ မိူဝ်ႈၼႆႉ ယၢမ်းၵၢင်ၼႂ် 7 မူင်းၶိုင်ႈ ၽူႈဢွၼ်ႁူဝ်သိုၵ်းၶဝ် 2 ၵေႃႉ လႆႈဢဝ်ပေး ၵူၼ်းမိူင်းသေ ၶၢမ်ႈမႃး ၾၢႆႇတူၵ်းၼမ်ႉမၢဝ်း။

ဝၢႆးၽူႈ ဢွၼ်ႁူဝ်ၶဝ်ၶၢမ်ႈမႃးယဝ်ႉ ၸိူဝ်းၵူၼ်းသိုၵ်းၶဝ် ၸင်ႇၶိုၼ်းလူင်းၵႂႃႇတၢင်းတႃႈႁိူဝ်း မၢၼ်ႈႁွင်းလူင်သေ ဢဝ်ႁိူဝ်းၵူၼ်း မိူင်း ၶၢမ်ႈမႃးၾၢႆႇတူၵ်းၼမ်ႉ။ မိူဝ်ႈလဵဝ် သိုၵ်းမၢၼ်ႈ ၸိူဝ်းၶၢမ်ႈမႃးၼၼ်ႉ ၶဝ်ႈၵႂႃႇမီးတီႈတပ်ႉၸၶၢၼ်း ၼွင်မႃႉတႃႊ မူတ်းယဝ်ႉ ဝႃႈၼႆ။

ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ၼႂ်းၶၢဝ်ႇတႄႉ ဢွၵ်ႇမႃးၸိူင်ႉၼၼ် ၵူၺ်းၵႃႈ ပၢင်တိုၵ်းတႄႉ တႄႇ မိူဝ်ႈဝႃး ထိုင်မိူဝ်ႈၼႆႉ ၵၢင်ၼႂ် ဢမ်ႇမီးပၢင်တိုၵ်းသင်ဢိတ်း တီႈၼမ်ႉၶမ်းၼႆႉ။ ႁဵတ်းႁိုဝ်လႄႈ ၶဝ်သိမ်းလႆႈတပ်ႉၸၶၢၼ်းတိတ်ႉ ၼၼ်ႉ ႁဝ်းၶႃႈၵေႃႈ ဢမ်ႇပွင်ႇၸႂ် သဵင်ၵွင်ႈၵေႃႈ ဢမ်ႇတႅၵ်ႇသင်”- ဝႃႈၼႆ။

ၵဵဝ်ႇၵပ်းလွင်ႈၼႆႉသေ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ ၵပ်းၸူး တီႈၽူႈၶၢၼ်ပၢၵ်ႇ TNLA ၵေႃႈ ဢမ်ႇလႆႈ။ ယဝ်ႉၵေႃႈ ယူႇတီႈ ႁွင်ႈၵၢၼ် ပိုၼ်ၽၢဝ်ႇတပ်ႉသိုၵ်းတဢၢင်းၵေႃႈ ပႆႇႁၼ်ပိုၼ်ၽၢဝ်ႇ ဢွၵ်ႇမႃးသင် ၼႆယဝ်ႉ။

ၵူၺ်းၵႃႈသိုၵ်းတဢၢင်းသႂ်ႇႁႅင်း ယိုဝ်းသၶၢၼ်းတိတ်ႉၵူင်းၼႆႉ ႁိုင်မႃးၶၢဝ်းတၢင်းလိူၼ်ပၢႆယဝ်ႉ။တင်းသွင်ၾၢႆႇမၢတ်ႇၸဵပ်းလူႉတၢႆၼမ်။ ယၢမ်းလဵဝ်သမ်ႉၵိုင်ႉၵၢင်ႉဝႃႈယိုတ်းလႆႈၼႆလႄႈ ၵူၼ်းပိုၼ်ႉတီႈတႄႉလၢတ်ႈဝႃႈ – သိုၵ်းမၢၼ်ႈတေမီးၽႅၼ်ၵၢၼ်သေဢၼ်ဢၼ်ႁိုဝ်၊ ဢမ်ႇၼၼ်ဝၢႆးမႃး ၵူဝ်သိုၵ်းမၢၼ်ႈမႃးပိုတ်းယိုဝ်းႁၢဝ်ႈႁႅင်းသေႁုပ်ႈၶိုၼ်း လႄႈၵူဝ်တုမ်ႉတိူဝ်ႉၵူၼ်းမိူင်းၵူၺ်းယဝ်ႉဝႃႈၼႆ။

ၵဵဝ်ႇလူၺ်ႈလွင်ႈပၢင်တိုၵ်း တီႈတပ်ႉၸၶၢၼ်းတိတ်ႉ ဝဵင်းၼမ်ႉၶမ်းၼႆႉသေ ယူႇတီႈတပ်ႉသိုၵ်းမၢၼ်ႈတင်း ၸုမ်းဢူၺ်းလီ ပိုတ်း ယိုဝ်းၵၼ်မႃး မီးၶၢဝ်းတၢင်းလိူၼ်ပၢႆ တင်းသွင်ၾၢႆႇမီးလွင်ႈလူႉတၢႆမၢတ်ႇၸဵပ်း ၼပ်ႉႁူဝ်ပၢၵ်ႇ – ၽူႈတူင်ႉၼိုင် ၵၢၼ်သိုၵ်း တၢင်းပွတ်း ထုင်ႉမၢဝ်းလၢတ်ႈ။