ဝၼ်းတီႈ 15/12/2023 မိူဝ်ႈၼႆႉယၢမ်းၵၢင်ၼႂ်ၸဵမ်ၸဝ်ႉသိုၵ်းမၢၼ်ႈဢဝ်ၶိူင်ႈမိၼ်မႃးပၼ်ႇလဵပ်ႈတီႈဝဵင်းမူႇၸေႊတင်းၼႂ် သဵင်ၵွင်ႈသဵင်မၢၵ်ႇမေႃးၵူႈသႅၼ်းၵူၼ်းမိူင်းမူႇၸေႊတူၵ်းၸႂ်ၵူဝ်ႁႄ။
ၵူၼ်းမူႇၸေႊၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“ပၢင်တိုၵ်းတႄႇၸဵမ်မိူဝ်ႈၵၢင်ၼႂ် 10 မူင်းၼႆႉၶႃႈ။ ၶိူင်ႈမိၼ်မႃးပၼ်ႇသေယိုဝ်းၵွင်ႈယူႇတေႃႇထိုင်းယၢမ်းလဵဝ်(ဝၢႆးဝၼ်း 2 မူင်း) ၼႆႉဢေႃႈ။ လႅပ်ႈပဵၼ်တၢင်းဝၢၼ်ႈၼမ်ႉၶူမ် 105 လၵ်းဢေႃႈ။ သဵင်မၢၵ်ႇသဵင်ၵွင်ႈတႄႉလင်ၼႃႇၶႃႈ။ ငိၼ်းဝႃႈသိုၵ်းၸၢဝ်းၶိူဝ်းထႅမ်ႁႅင်းသိုၵ်းၶဝ်လႄႈၼႆဢေႃႈ ”- ဝႃႈၼႆ။
မိူဝ်ႈဝႃးဝၼ်းတီႈ 14/12/2023 ၵေႃႈ သိုၵ်းတဢၢင်း TNLA သိုၵ်းရၶႅင်ႇ AA လႄႈသိုၵ်းၵဝ်ႈၵၢင်ႉ MNDAA ႁူမ်ႈၵၼ်ပိုတ်းယိုဝ်းသိုၵ်းမၢၼ်ႈတီႈ 105 လၵ်းႁၢဝ်ႈႁႅင်း တင်ႈတႄႇၵၢင်ၼႂ်ၸဝ်ႉ 7 မူင်း။
“မိူဝ်ႈဝႃးၵေႃႈ ၶဝ်ဢဝ်ၶိူင်ႈမိၼ်မႃးမိၼ်တႅမ်ႇဝႃႈတႅမ်ႇ လီၵူဝ်တႄႉယဝ်ႉၶႃႈ။ ထိုင်ၵၢင်ဝၼ်းတဵင်ႈမႃးၶဝ်ယိုဝ်းလူင်းဢေႃႈ။ သဵင်လင်ဝႃႈလင်။ ဢမ်ႇႁတ်းဢွၵ်ႇႁိူၼ်းၶႃႈ။ သဵင်မၼ်းမေႃး တၢင်း 105 လၵ်းသေတႃႉ ၵူၼ်းၼႂ်းဝဵင်းၼႆႉတႄႉ တေတိူဝ်ႉႁိူၼ်းႁဝ်းႁိုဝ် တေတိူဝ်ႉၼႂ်းဝဵင်းမိူဝ်ႈလႂ် ၼႆလႆႈမႆႈၸႂ်ဝႆႉယူႇၵူႈၶၢဝ်းဢေႃႈ ” ၵူၼ်းမူႇၸေႊ လၢတ်ႈၼင်ႇၼႆ။
ထိုင်ယၢမ်းဝၢႆးဝၼ်းသိုၵ်းမၢၼ်ႈဢဝ်ၶိူင်ႈမိၼ် ႁႅတ်ႉသ်ၵီး မႃး 2 လမ်း လမ်းၼိုင်ႈမႃးဝၢင်းႁႅင်းၵူၼ်း ထႅင်ႈလမ်းၼိုင်ႈ မႃးယိုဝ်းၸွႆႈ တၢင်းသၼ်လွႆ လႅပ်ႈပဵၼ်တၢင်းဝၢၼ်ႈၼမ်ႉၶူမ် ဝဵင်းမႂ်ႇၸိူဝ်းၼႆႉ- ၵူၼ်းမူႇၸေႊလၢတ်ႈၼင်ႇၼႆ။
ထိုင်ယၢမ်းၵၢင်ၶိုၼ်းၵေႃႈ သိုၵ်းမၢၼ်ႈတိုၵ်ႉယိုဝ်းၵွင်ႈလူင်ဢမ်ႇထၢတ်ႇ။
ၶၢဝ်းတၢင်း ပၢင်တိုၵ်း 1027 ၼႆႉ တီႈမူႇၸေႊ 105 လၵ်းၼႆႉ မီးလွင်ႈပိုတ်းယိုဝ်းၵၼ်ၵူႈဝၼ်း။ ယွၼ်ႉပၢင်တိုၵ်းသေ ၵူၼ်းမိူင်းတၢႆ 5 ၵေႃႉ မၢတ်ႇၸဵပ်းဢမ်ႇယွမ်း 10 ၵေႃႉယဝ်ႉ။
သိုၵ်းဢူၺ်းလီ ယိုတ်းလႆႈ သုၼ်ၵၢၼ်ၵႃႉၶၢႆ ၵျိၼ်ႊသၢၼ်ႊၵျေႃႊ ဢၼ်ယႂ်ႇသုတ်းတီႈလႅၼ်လိၼ်ၶႄႇဝႆႉယဝ်ႉမိူဝ်ႈဝၼ်းတီႈ 25 ၼူဝ်ႊဝႅမ်ႊပိူဝ်ႊ။ ပၢင်တိုၵ်းတၢင်းထုင်ႉလၢဝ်ႇၵၢႆး ၵျိၼ်ႊသၢၼ်ႊၵျေႃႊ ပၢင်ႇသၢႆး ၼမ်ႉၶမ်း ၼႆႉၵူၼ်းပၢႆႈၽေးသိုၵ်းၼပ်ႉႁူဝ်မိုၼ်ႇ ပႆႇၸၢင်ႈပွၵ်ႈႁိူၼ်းၶိုၼ်းႁၢၼ်ႉတေႃႇယၢမ်းလဵဝ်။
ဢိင်ၼိူဝ်ပၢင်တိုၵ်းလိူၼ်ပၢႆႈၼႆႉသေ ၼႂ်း 12 ၸႄႊဝဵင်း ၸိုင်ႈတႆးပွတ်းႁွင်ႇၼႆႉ ၵူၼ်းမိူင်းပၢႆႈၽေးသိုၵ်းမီး 5 မိုၼ်ႇပၢႆယဝ်ႉ။ သဵၼ်ႈတၢင်းလူင်ၵေႃႉလူႉၵွႆဝႆႉၵူႈဝဵင်းလႄႈ ဢမ်ႇၸၢင်ႈၶဝ်ႈဢွၵ်ႇႁႃၵၼ် ၊ ၵူၼ်းပၢႆႈၽေးသိုၵ်းပဵၼ်ဢၼ်ယၢပ်ႇၽိုတ်ႇၵိၼ်းၸႂ်လိူဝ်ႁႅင်း။လူဝ်ႇတၢင်းၸွႆႈထႅမ်ဝႆးဝႆး။
