ထဝ်ႈၸၢႆး ဢႃယု 71 ပီ ဢၼ်ၺႃးမၢၵ်ႇသိုၵ်းမၢၼ်ႈ တႅၵ်ႇသႂ်ႇသေ လူႉတၢႆထင်တီႈၼၼ်ႉ ဢမ်ႇၸႂ်ႈပဵၼ်ၶၢဝ်ႇ လွင်ႈပိူင်ပဵၼ်တႄႉ ယွၼ်ႉမၼ်းၸၢႆးလူႉတၢႆ လူၺ်ႈတၢင်းပဵၼ်ၵူၼ်းထဝ်ႈၵူၺ်း – ၵူၼ်းပိုၼ်ႉတီႈ ဝဵင်းၼမ်ႉၶမ်းလၢတ်ႈ။
ဝၼ်းတီႈ 8/12/2023 လုင်းၵျေႃႇမိၼ်ႇ ဢႃယု 71 ပီ ၵူၼ်းပွၵ်ႉႁူဝ်ၵၢတ်ႇ ဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆး ပွတ်းႁွင်ႇ လူႉတၢႆလူၺ်ႈတၢင်းပဵၼ်ၵူၼ်းထဝ်ႈ တီႈႁိူၼ်းယေးမၼ်းၸၢႆး ဢမ်ႇၸႂ်ႈမၢၵ်ႇၶိူင်ႈမိၼ် သိုၵ်းမၢၼ်ႈ တူၵ်းသႂ်ႇ ဝႃႈၼႆ။
ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝၼ်းတီႈ 8 ၼၼ်ႉ မၢၵ်ႇလူင် ဢမ်ႇမႃးတူၵ်းၼႂ်းပွၵ်ႉႁူဝ်ၵၢတ်ႇ ၶႃႈ။ ဢၼ်မႃးတူၵ်းၼၼ်ႉ ပဵၼ်တီႈပွၵ်ႉၼွင်ၸၢင်ႉၵူၺ်းၶႃႈဢေႃႈ။ လွင်ႈလုင်းၵျေႃႇမိၼ်ႇ လူႉတၢႆၵႂႃႇၼႆႉ ပဵၼ်ယွၼ်ႉလူၺ်ႈတၢင်း ပဵၼ်ၵူၼ်းထဝ်ႈၵူၺ်းၶႃႈ မၼ်းၸၢႆး လႆႈလူႉၵႂႃႇတီႈႁိူၼ်းၸိူင်ႉၼႆၵူၺ်းၶႃႈဢေႃႈ။ မိူဝ်ႈဝႃး ဝၼ်းတီႈ 9 ၼႆႉ ၸင်ႇဢွၼ်ၵၼ် ပူၼ်ႉၶၢပ်ႈတူဝ်ၵႂႃႇ”- ဝႃႈၼႆ။
ပူၼ်ႉမႃး ဝၼ်းတီႈ 8 ယၢမ်းဝၢႆးဝၼ်း 1 မူင်းပၢႆၼၼ်ႉ သိုၵ်းမၢၼ်ႈ ၸႂ်ႉၶိူင်ႈမိၼ်မႃးပွႆႇမၢၵ်ႇလူင် သႂ်ႇတီႈပွၵ်ႉၼွင်ၸၢင်ႉသေ တႅၵ်ႇ တိူဝ်ႉသႂ်ႇႁိူၼ်းယေး ၵူၼ်းဝၢၼ်ႈလူႉၵွႆၸွမ်း လင်ၼိုင်ႈ၊ လွင်ႈတုမ်ႉတိူဝ်ႉၵူၼ်းမိူင်းမၢတ်ႇၸဵပ်းလူႉတၢႆတႄႉ ဢမ်ႇမီး ဝႃႈၼႆ။
တႄႇဢဝ် ႁၢင်လိူၼ်ဢွၵ်ႊထိူဝ်ႊပိူဝ်ႊ 2023 ၼၼ်ႉမႃး ႁၢၼ်ႉတေႃႇယၢမ်းလဵဝ် ၵူၼ်းဝဵင်းၼမ်ႉၶမ်း ပၢႆႈၽေးသိုၵ်း ဢမ်ႇယွမ်း 7,000 ၵေႃႉ ယွၼ်ႉသိုၵ်းမၢၼ်ႈတင်း သိုၵ်း TNLA ပိုတ်းယိုဝ်းၵၼ်မႃးႁၢဝ်ႈႁႅင်း တေႃႇထိုင်ယၢမ်းလဵဝ် မီးၶၢဝ်းတၢင်းလိူၼ်ပၢႆ ယဝ်ႉ သဵင်ၵွင်ႈပႆႇယဵၼ်။
ယွၼ်ႉပၢင်တိုၵ်းၼႆႉသေ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇၶိူဝ်းယႂ်း၊ ၾၢႆႇသိုၵ်း TNLA သမ်ႉ ၸႂ်ႉတရူၼ်းသေ ၵႂႃႇပွႆႇမၢၵ်ႇသႂ်ႇ တီႈတပ်ႉသိုၵ်းမၢၼ်ႈ ၸၶၢၼ်းတိတ်း ၼၼ်ႉၵေႃႈ ၶိူဝ်းယႂ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ