ထဝ်ႈၸၢႆး ဢႃယု 70 ပၢႆ ၵေႃႉၼိုင်ႈ ထုၵ်ႇသိုၵ်းမၢၼ်ႈ ၸႂ်ႉၶိူင်ႈမိၼ် ပွႆႇမၢၵ်ႇလူင်တူၵ်းသႂ်ႇ တီႈႁိူၼ်းယေးသေ လႆႈလူႉတၢႆ ထင်တီႈ။
မိူဝ်ႈဝႃး ဝၼ်းတီႈ 8/12/2023 လုင်းၵျေႃႇမိၼ်ႇ ဢႃယု 71 ပီ ၵူၼ်းပွၵ်ႉႁူဝ်ၵၢတ်ႇ ဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈ တႆး ပွတ်းႁွင်ႇ ထုၵ်ႇသိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ်တိုၵ်း ပွႆႇမၢၵ်ႇလူင် တူၵ်းသႂ်ႇ တီႈႁိူၼ်းယေးသေ လႆႈလူႉတၢႆၵႂႃႇ ၼႆ ယဝ်ႉ။
ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇသိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇၶႃႈဢေႃႈ ပဵၼ်ၵႂႃႇ မိူဝ်ႈဝႃး ။ ယၢမ်းလၢႆမူင်းတႄႉ ပႆႇႁူႉ။ မၢၵ်ႇလူင် တူၵ်းသႂ်ႇ လုင်းၵျေႃႇမိၼ်ႇ ဢႃယု 71 ပီ လႆႈလူႉတၢႆ ။ တေႃႈလဵဝ် တၢင်း ၼမ်ႉၶမ်းၼႆႉ လႅင်းၾူၼ်း ၊ ဢိၼ်ႊထိူဝ်ႊၼႅတ်ႊ ဢမ်ႇလႆႈလႄႈ လွင်ႈၵပ်းသိုပ်ႇႁႃၵၼ်ၼႆႉ ပဵၼ်ဢၼ်ယၢပ်ႇၽိုတ်ႇဝႆႉ ၶႃႈဢေႃႈ”- ဝႃႈၼႆ။
ယဝ်ႉၵေႃႈ မိူဝ်ႈဝႃး ယၢမ်းဝၢႆးဝၼ်း 1 မူင်းပၢႆ သိုၵ်းမၢၼ်ႈ ၸႂ်ႉၶိူင်ႈမိၼ်မႃးပွႆႇမၢၵ်ႇလူင် သႂ်ႇတီႈပွၵ်ႉၼွင်ၸၢင်ႉ ဝဵင်းၼမ်ႉၶမ်းသေ တႅၵ်ႇတိူဝ်ႉသႂ်ႇႁိူၼ်းယေး ၵူၼ်းဝၢၼ်ႈလူႉၵွႆၸွမ်းထႅင်ႈ လင်ၼိုင်ႈ။ ထိုင်မႃး ယၢမ်းၵၢင်ၶိုၼ်း သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇ မၢၵ်ႇၵႂႃႇထႅင်ႈ ၼႆႉတႄႉ ပႆႇႁူႉဢွင်ႈတီႈ မၢၵ်ႇတူၵ်းတႅၵ်ႇ – ၵူၼ်းပိုၼ်ႉတီႈ ဝဵင်းၼမ်ႉၶမ်းလၢတ်ႈ။
ဝၼ်းတီႈ 6/12/2023 ယၢမ်းၵၢင်ဝၼ်း 11 မူင်းပၢႆ ၼၼ်ႉၵေႃႈ သိုၵ်းမၢၼ်ႈ ဢဝ်ၶိူင်ႈမိၼ်မႃးပၼ်လဵပ်ႈ ဢမ်ႇယွမ်း 3 လမ်းသေ ပွႆႇမၢၵ်ႇသႂ်ႇ ၼႂ်းၸႄႈဝဵင်းၼမ်ႉၶမ်း ၵူႈႁူးၵူႈတၢင်း ႁဵတ်းႁႂ်ႈတုမ်ႉတိူဝ်ႉတီႈယူႇတၼ်းသဝ်း ၵူၼ်းမိူင်းလူႉၵွႆၼမ် ယဝ်ႉၵေႃႈ တိူဝ်ႉသႂ်ႇၵူၼ်းမိူင်းတၢႆထႅင်ႈ 5 ၵေႃႉ တီႈဝၢၼ်ႈႁူဝ်ၼႃး ဢိူင်ႇၵွင်းၵၢတ်ႇ။
တႄႇဢဝ် ႁၢင်လိူၼ်ဢွၵ်ႊထူဝ်ႊပိူဝ်ႊ 2023 ၼႆႉမႃး ၵူၼ်းမိူင်းၼမ်ႉၶမ်း ထုၵ်ႇသိုၵ်းမၢၼ်ႈ ၸႂ်ႉၶိူင်ႈမိၼ် မႃးပၼ်ႇလဵပ်ႈ ပိုတ်း ယိုဝ်းမၢၵ်ႇလူင်/ မၢၵ်ႇဢွၼ်ႇ သႂ်ႇၵူႈဝၼ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ