မိူဝ်ႈၼႆႉ ဝၼ်းတီႈ 8/12/2023 ယၢမ်းဝၢႆးဝၼ်း 1 မူင်းပၢႆ သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇလူင်သႂ်ႇ တီႈပွၵ်ႉၼွင်ၸၢင်ႉ ဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ တိူဝ်ႉသႂ်ႇႁိူၼ်းယေး ၵူၼ်းဝၢၼ်ႈလူႉၵွႆၸွမ်းထႅင်ႈ လင်ၼိုင်ႈ။
ၵူၼ်းပိုၼ်ႉတီႈ ဝဵင်းၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ ဢဝ်မၢၵ်ႇလူင် ဢၼ်မီးၼမ်ႉၼၵ်း 500 ပွင်ႇၼၼ်ႉသေ မႃးပွႆႇတူၵ်းသႂ်ႇ ၼႂ်းဝၢင်းႁိူၼ်း လုၵ်ႈၼိုင်ႈဢေႃႈ။ ၵၢမ်ႇလီ ဢမ်ႇတိူဝ်ႉသႂ်ႇၵူၼ်းမိူင်းၶႃႈလႃႈ။ ယွၼ်ႉဝႃႈ မၢၵ်ႇ ၼၼ်ႉ တူၵ်းၵႆႁိူၼ်းဢိတ်းၼိုင်ႈလႄႈ ၸၢၵ်ႇမၢၵ်ႇတႄႉ တိူဝ်ႉသႂ်ႇႁိူၼ်းယေး လူႉၵွႆၸွမ်းၵမ်ႈၽွင်ႈ ဢေႃႈ”- ဝႃႈၼႆ။
ႁိူၼ်းယေး ၵူၼ်းဝၢၼ်ႈ ဢၼ်ၺႃးၸၢၵ်ႇမၢၵ်ႇ တႅၵ်ႇတိူဝ်ႉသႂ်ႇၼၼ်ႉ ပဵၼ်ႁိူၼ်းဢုတ်ႇ 2 ၸၼ်ႉ ယွၼ်ႉမၢၵ်ႇလူင်တူၵ်းသႂ်ႇ ႁႅင်းလႄႈ ၸၢၵ်ႇမၢၵ်ႇသဵၼ်တိူဝ်ႉသႂ်ႇ ၸွမ်းၽၵ်းတူ ၸိူဝ်းၼႆႉ လူႉၵွႆမူတ်း။ ႁိူၼ်းလင်ၼႆႉ မီးၾၢႆႇလင် ပမ်ႉၼမ်ႉမၼ်း ၼွင်ၸၢင်ႉ ဝႃႈၼႆ။
“သိုၵ်းမၢၼ်ႈၶဝ်ၼႆႉ ဢမ်ႇမီးၶိင်ႇမီးၶၢဝ်း ၶဝ်ၶႂ်ႈမႃးပိုတ်းယိုဝ်းၶိင်ႇလႂ်ၵေႃႈမႃး။ မၢင်ဝၼ်း ၶိူင်ႈမိၼ်ၶဝ်မႃး 2-3 လမ်း ၽွမ်ႉ ၵၼ် ၸိူဝ်းၼႆႉၵေႃႈမႃးဢေႃႈ။ ၶိူင်ႈမိၼ်ၶဝ်ၼၼ်ႉ မႃးၵူႈဝၼ်းၵူႈၶိုၼ်းယဝ်ႉ ၵူၼ်းမိူင်းတႄႉ ဢမ်ႇပဵၼ်လပ်းပဵၼ် ၼွၼ်း လႆႈၵူဝ်ယူႇတႃႇသေႇၶႃႈ”- ၵူၼ်းပိုၼ်ႉတီႈ ဝဵင်းၼမ်ႉၶမ်း သိုပ်ႇလၢတ်ႈၼႄၼင်ႇၼႆ။
ဝၼ်းတီႈ 6/12/2023 ယၢမ်းၵၢင်ဝၼ်း 11 မူင်းပၢႆ ၼၼ်ႉၵေႃႈ သိုၵ်းမၢၼ်ႈ ဢဝ်ၶိူင်ႈမိၼ်မႃးပၼ်လဵပ်ႈ ဢမ်ႇယွမ်း 3 လမ်းသေ ပွႆႇမၢၵ်ႇသႂ်ႇ ၼႂ်းၸႄႈဝဵင်းၼမ်ႉၶမ်း ၵူႈႁူးၵူႈတၢင်း ႁဵတ်းႁႂ်ႈတုမ်ႉတိူဝ်ႉတီႈယူႇတၼ်းသဝ်း ၵူၼ်းမိူင်းလူႉၵွႆၼမ် ယဝ်ႉၵေႃႈ တိူဝ်ႉသႂ်ႇၵူၼ်းမိူင်းတၢႆထႅင်ႈ 5 ၵေႃႉ။
တႄႇဢဝ် ႁၢင်လိူၼ်ဢွၵ်ႊထူဝ်ႊပိူဝ်ႊ 2023 ၼႆႉမႃး ၵူၼ်းမိူင်းၼမ်ႉၶမ်း ထုၵ်ႇသိုၵ်းမၢၼ်ႈ ၸႂ်ႉၶိူင်ႈမိၼ် မႃးပၼ်ႇလဵပ်ႈ ပိုတ်းယိုဝ်းမၢၵ်ႇလူင်/ မၢၵ်ႇဢွၼ်ႇ သႂ်ႇၵူႈဝၼ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ