သိုဝ်ႇၶၢဝ်ႇထႆး ႁၢႆးငၢၼ်းဝႆ့ဝႃႈ – ၼၢင်းယိင်းဢွၼ်ႇ လုၵ်ႈႁဵၼ်းယိင်း ၵူၼ်းမိူင်းမၢၼ်ႈၵေႃ့ၼိုင်ႈဢၼ်ႁဵၼ်းလိၵ်ႈလႄႈ ႁဵတ်းၵၢၼ်တီႈ မိူင်းထႆး – ပဵၼ်ၵေႃႉႁၵ်ႉၵၼ်တင်းမၢဝ်ႇမိူင်းဢီႊရၼ်ႊၽွင်းလႆႈၶၢဝ်းတၢင်း 5 လိူၼ် ၼၼ်ႉၺႃး မၢဝ်ႇ ဢီႊရၼ်ႊ လၵ်ႉဢဝ်ၶူဝ်းၶွင်ငိုၼ်းၶမ်းမၼ်းၼၢင်းၵႂႃႇတင်းမူတ်းမီးၵႃႈၶၼ် 25 လၢၼ်ႉဝၢတ်ႇ ဝႃႈၼႆ။
ႁႅင်းၵၢၼ်ယိင်းဢၼ်ၺႃး လႅၼ်ၼႆ့ ၸိုဝ်ႈႁွင့် ၼၢင်းမူၺ်လႅင်း ။ ၵေႃႉႁၵ်ႉမၼ်း မၢဝ်ႇ ဢီႊရၼ်ႊၼၼ်ႉ ပဵၼ်ၵူၼ်းတွႆႇမူၺ်း။ တိုၵ်ႉမီးဢႃယု 21 ပီ ။ ၶႃသွင်ၵေႃ့ ယူႇသဝ်းၸွမ်းၵၼ်တီႈ ႁိူၼ်းတိူၵ်ႈ ၶွၼ်ႊတူဝ်ႊ ၊ ဢၼ်မီးတီႈသဵၼ်ႈတၢင်း သူႇၶုမ်ဝိတ့် 50 ၼႂ်း ၽရႃႉၶၼူင် ၊ ၸေႈဝဵင်း ၶလွင်း ၊ မိူင်းၵွၵ်ႇ ၊ ၸိုင်ႈထႆး – ဝႃႈၼႆ ။
ၸဝ်ႈၼႃႈတီႈ ပလိၵ်ႈၶဝ် လၢတ်ႈတီႈ သိုဝ်ႇၶၢဝ်ႇၸိုင်ႈမိူင်းဝႃႈ – မိူဝ်ႈဝၼ်းထီ့ 3 လိူၼ်တီႇသိၼ်ႊပိူဝ်ႊ ယၢမ်း ႁူဝ်ၶမ်ႈ ၼၼ့် ၸၢႆးဢီႊရၼ်ႊ ၵေႃႉႁၵ်ႉမၼ်းလဵင်ႉၼမ်ႉၼူမ်းသူမ်ႈမၼ်းၼၢင်း ။ ဝၢႆးၵိၼ်ၼမ်ႉၼူမ်းသူမ်ႈ ယဝ်ႉ မၼ်းၼၢင်းလိုမ်းတူဝ်ၵႂႃႇသေ ထိုင်မႃး ဝၼ်းထီ့ 4 လိူၼ်တီႇသိၼ်ႊပိူဝ်ႊ ယၢမ်းဝၢႆးဝၼ်း ၸင်ႇႁူတူဝ် တိုၼ်ႇ ။ ၽိူဝ်ႇတိုၼ်ႇမႃး ၵေႃႉႁၵ်ႉမၼ်းၼၢင်း လႄႈ ၶူဝ်းၶွင်ငိုၼ်းၶမ်း မၼ်းၼၢင်း ႁၢႆမူတ်း။ မၼ်းၼၢင်း ၸင်ႇမႃး တိူင်ႇလၢတ်ႈတီႈ ႁူင်းပလိၵ်ႈ ၽရႃႉၶၼူင် – ဝႃႈၼႆ ။
ၶူဝ်းၶွင်ငိုၼ်းၶမ်း ဢၼ်ႁၢႆၵႂႃႇၼၼ့်ပဵၼ် iPhone 13 (1) လုၵ်ႈ ၊ iPhone15 (1)လုၵ်ႈ ၊ iPad (1)ဢၼ် ၊ ဢွမ်မူင်း ဢၼ်ၵိုင်ႇငိုၼ်းထႆးမွၵ်ႈ 6 သႅၼ်ဝၢတ်ႇ (1) ဢၼ် ၊ ငိုၼ်းထႆး 410,000 ဝၢတ်ႇ ၊ ထူင် 1 လုၵ်ႈ ၊ ငိုၼ်း Digital Dollar ဢၼ်ၵိုင်ႇငိုၼ်းထႆး 20 လၢၼ့်ပၢႆ လႄႈတင်း Credit Card ၸိူဝ်းၼႆ့ ႁူမ်ႈသဵင်ႈ ၵႃႈၶၼ် တင်းမူတ်းတေမီးယူႇမွၵ်ႈ 25 လၢၼ့်ဝၢတ်ႇ – ဝႃႈၼႆ ။
မိူဝ်ႈၽွင်း ၸဝ်ႈၼႃႈတီႈထႆး ႁႃၸွမ်းသၼ်ယႃးဢၢႆႊၾူၼ်း၊ လႆႈႁၼ်မီးၼႂ်း ပွၵ်ႉၽရႃႉၶၼူင် ၼၼ်ႉၵူၺ်းၼင်ႇၵဝ်ႇ ။ ၽိူဝ်ႇလူင်းပိုၼ်ႉတီႈသေၸွပ်ႇထၢမ်ၸိုင် လႆႈႁူႉတီႈၵူၼ်းႁၢပ့်ၸၢင်ႈၶပ်းရူတ်ႉ ဢၼ်ယူႇႁိမ်းႁွမ်းၸိူဝ်းၼၼ့် လၢတ်ႈဝႃႈ ဝၼ်းတီႈ 3 ယၢမ်းတၢမ်းၶမ်ႈၼၼ့် လႆႈႁၼ်ၵူၼ်းၸၢႆး ၼွၵ်ႈမိူင်းၵေႃ့ၼိုင်ႈ ဢဝ်ထူင်လုၵ်ႈၼိုင်ႈ ထိုမ်ႈတူၵ်း ၼႂ်းၼမ့် – ဝႃႈၼႆ ။
ဝၢႆးၼၼ့် ၸုမ်းၸွႆႈထႅမ်လူင်းငုမ်းတႂ်ႈၼမ်ႉ၊ ၼႂ်းထူင်ၼၼ်ႉလႆႈႁၼ် iPhone 15 လုၵ်ႈၼိုင်ႈ။ၽိူဝ်ႇထတ်းတူၺ်း ၶေႃႈမုလ်းၼႂ်းၾူင်း လႆႈႁၼ်ဝႃႈ ငိုၼ်း Digital Dollar ၼၼ့် လွႆး(ဢူၼ်း) ၶဝ်ႈၵႂႃႇ တီႈၼႂ်းယေးငိုၼ်းၼွၵ်ႈမိူင်းဢၼ်ၼိုင်ႈယဝ့် – ဝႃႈၼႆ။
ဝၢႆးၼၼ်ႉၸဝ်ႈၼႃႈတီႈ ၸွမ်းလင်ၸွပ်ႇထၢမ်တူၺ်းသဵၼ်ႈၸိုဝ်ႈၸၢႆးၸၢဝ်းဢီႊရၼ်ႊ တီႈၶူင်ႇႁိူဝ်းမိၼ်ၼၼ်ႉလႆႈႁူႉဝႃႈမၼ်းၸၢႆးဢွၵ်ႇ မိူင်းထႆး ၸဵမ်မိူဝ်ႈဝၼ်းထီ့ 4 လိူၼ်တီႇသိၼ်ႊပိူဝ်ႊ ၶၢဝ်းယၢမ်းၵၢင်ၼႂ် 8 မူင်းၶိုင်ႈၼၼ့်ယဝ့် ။ ၵွပ်ႈၼၼ်လႄႈ တႃႇတေတီ့ၺွပ်းလႆႈၼၼ့် ပလိၵ်ႈ ၽရႃႉၶၼူင် လႆႈၵပ်းသိုပ်ႇၸူး ပလိၵ်ႈၵူႈမိူင်းမိူင်း ဝႆ့ယဝ့် – ဝႃႈၼႆ ။
ၼၢင်းယိင်းဢွၼ်ႇ ဢၼ်ထုၵ်ႇၺႃးလႅၼ်ၼၼ်ႉ ၾၢႆႇၼိုင်ႈႁဵၼ်းလိၵ်ႈဝႆႉတီႈ ၸၼ့်ၸွမ် မိူင်းၵွၵ်ႇသေ ၾၢႆႇၼိုင်ႈၵေႃႈ ႁဵတ်းၵၢၼ်တီႈလၢၼ့်တၢင်းၵိၼ်ဝႆ့ – ဝႃႈၼႆ ။ ငိုၼ်းၶမ်းဢၼ်ထုၵ်ႇၺႃး လၵ့်ၵႂႃႇ ၸိူဝ်းၼႆ့ ပဵၼ်ငိုၼ်းဢၼ်ပေႃႈမႄႈမၼ်းၼၢင်း ၶၢႆတီႈလိၼ်ႁိူၼ်းယေး သေ ဝႆ့ပၼ်တႃႇတေ လူင်းတိုၼ်း လၢင်း ႁဵတ်းၵၢၼ် လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ