ပၢင်တိုၵ်း တီႈဝဵင်းၼမ်ႉၶမ်း ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ် ယိုဝ်းၸွႆႈႁၢဝ်ႈႁႅင်း တိူဝ်ႉသႂ်ႇႁိူၼ်းယေး ၵူၼ်းဝၢၼ်ႈ လူႉၵွႆၸွမ်းလၢႆ လင်လႄႈ ၵူၼ်းမိူင်းလူႉတၢႆၸွမ်းထႅင်ႈ 5 ၵေႃႉ။
ဝၼ်းတီႈ 7/12/2023 ယၢမ်းၵၢင်ၼႂ် 9 မူင်းပၢႆ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇ တီႈပႃႇႁဵဝ်ႈၶႄႇ ပွၵ်ႉၵွင်းသႃႇ ဝဵင်း ၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ တိူဝ်ႉသႂ်ႇႁိူၼ်းယေး ၵူၼ်းဝၢၼ်ႈလူႉလႅဝ် (ယွၵ်းယွႆ) 2 လင် ၼႆယဝ်ႉ။
ၽူႈတူင်ႉၼိုင် ၵၢၼ်သိုၵ်း တၢင်းပွတ်းထုင်ႉမၢဝ်း လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇလူင် ဢၼ်မႃးတူၵ်းသႂ်ႇ ႁိူၼ်းယေး ၵူၼ်း ဝၢၼ်ႈ တီႈပွၵ်ႉၵွင်းသႃႇၼႆႉ တိူဝ်ႉၺႃးႁိူၼ်းၸၢဝ်းၶႄႇ 1 လင်လႄႈ ၸၢဝ်းတႆး 1 လင် ႁိူၼ်းယေးတႄႉ ယွၵ်းယွႆမူတ်းၶႃႈဢေႃႈ။ ပဵၼ်မၢၵ်ႇသိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇသႂ်ႇ 1 လုၵ်ႈ”- ဝႃႈၼႆ။
ထိုင်မႃး ယၢမ်းၵၢင်ဝၼ်း 12:52 မူင်း သိုၵ်းမၢၼ်ႈ ၸႂ်ႉၶိူင်ႈမိၼ် လမ်းၼိုင်ႈ မႃးသူင်ႇၶူဝ်းၶိူင်ႈၸႂ်ႉတိုဝ်းၼႂ်းသိုၵ်း တီႈတပ်ႉ ၸ ၶၢၼ်းတိတ်ႉ ဢၼ်မီးၾၢႆႇတၢင်းၸၢၼ်းဝဵင်းၼမ်ႉၶမ်းၼႆႉ။ ယၢမ်းဝၢႆးဝၼ်း 2:40 မူင်း သိုၵ်းတဢၢင်း TNLA ယူႇတီႈ ဝၢၼ်ႈ ၼမ်ႉသီးလီးသေ ၸႂ်ႉတရူၼ်း ၵႂႃႇပွႆႇမၢၵ်ႇသႂ်ႇ တီႈတပ်ႉၸၶၢၼ်းတိတ်ႉ 5 လုၵ်ႈ။ ထိုင်မႃး ယၢမ်းဝၢႆးဝၼ်း 3 မူင်းၶိုင်ႈ ၸႂ်ႉတ ရူၼ်းၵႂႃႇပွႆႇမၢၵ်ႇသႂ်ႇထႅင်ႈ 10 လုၵ်ႈ။
ယၢမ်းႁူဝ်ၶမ်ႈ 6 မူင်းပၢႆ သိုၵ်းတဢၢင်း TNLA ၸႂ်ႉမၢၵ်ႇ 60 mm ယိုဝ်းသႂ်ႇတီႈတပ်ႉသိုၵ်မၢၼ်ႈ ၸၶၢၼ်းတိတ်ႉသေ သွင် ၾၢႆႇပဵၼ်ပၢင်တိုၵ်းၵၼ် တေႃႇထိုင် 7 မူင်းၶိုင်ႈ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇၸွမ်းႁိမ်းႁွမ်းတပ်ႉၸၶၢၼ်း တိတ်ႉ မွၵ်ႈ 10 လုၵ်ႈ။
ၼႂ်းဝၼ်းတီႈ 7 ယၢမ်းၵၢင်ၶမ်ႈ 9 မူင်းပၢႆထိုင် 11 မူင်းၶိုင်ႈ ၵၢင်ၶိုၼ်း သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း 3 လမ်း မႃးပွႆႇမၢၵ်ႇ တီႈ ဝၢၼ်ႈၼမ်ႉသီးလီး၊ ပၢင်ၼေႃႇ၊ ပၢင်ၶႃး ထႅင်ႈ 5 လုၵ်ႈ ။ ယၢမ်းၵၢင်ၶိုၼ်း 11:47 မူင်း သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း ၵႂႃႇပွႆႇတီႈ ၶူဝ်ၼမ်ႉမၢဝ်း 1 လုၵ်ႈ။ ယဝ်ႉၵေႃႈ ၵႂႃႇပွႆႇထႅင်ႈ တီႈႁိမ်းဝၢၼ်ႈႁူဝ်ၼႃး 1 လုၵ်ႈ – ၽူႈတူင်ႉၼိုင် ၵၢၼ်သိုၵ်း တၢင်းပွတ်းထုင်ႉမၢဝ်းလၢတ်ႈ။
မိူဝ်ႈဝၼ်းတီႈ 6/12/2023 ယၢမ်းၵၢင်ၶိုၼ်း သိုၵ်းမၢၼ်ႈ ၸႂ်ႉၶိူင်ႈမိၼ် ပွႆႇမၢၵ်ႇလူင် တူၵ်းသႂ်ႇၼႂ်းဝၢၼ်ႈႁူဝ်ၼႃး ဢိူင်ႇၵွင်း ၵၢတ်ႇ ၸႄႈဝဵင်းၼမ်ႉၶမ်း တႅၵ်ႇတိူဝ်ႉသႂ်ႇ ၵူၼ်းမိူင်းလူႉတၢႆထင်တီႈ 5 ၵေႃႉ။ ၼႂ်းၼၼ်ႉ ပႃးလုၵ်ႈဢွၼ်ႇ ဢႃယု 5 ၶူပ်ႇ ၵေႃႉ ၼိုင်ႈ။
“သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇလူင်သႅၼ်း 500 ပွင်ႇ သႂ်ႇတီႈဝၢၼ်ႈၸၢဝ်းလွႆ ဝၢၼ်ႈႁူဝ်ၼႃးသေ တိူဝ်ႉၺႃး ႁိူၼ်း ယေး ၵူၼ်းဝၢၼ်ႈယွၵ်းယွႆၸွမ်းလၢႆလင်။ ၸၢၵ်ႇမၢၵ်ႇတိူဝ်ႉၺႃး ၵူၼ်းဝၢၼ်ႈလူႉတၢႆမွၵ်ႈ 5 ၵေႃႉ။ ၵွပ်ႈဝႃႈ ဝၢၼ်ႈႁူဝ်ၼႃးလႄႈ ဝၢၼ်ႈၵွင်းၵၢတ်ႇၼႆႉ ပဵၼ်ဢွင်ႈတီႈသိုၵ်းလွႆၶဝ် ဢဝ်ၵူၼ်းသိုၵ်းမၢတ်ႇၸဵပ်း မႃးယူတ်းယႃယူႇသဝ်းဝႆႉ တင်းၼမ်”- ၽူႈတူင်ႉ ၼိုင်ၵၢၼ်သိုၵ်း တၢင်းပွတ်းထုင်ႉမၢဝ်း သိုပ်ႇလၢတ်ႈၼႄၼင်ႇၼႆ။
တႄႇဢဝ် ႁၢင်လိူၼ်ဢွၵ်ႊထိူဝ်ႊပိူဝ်ႊၼၼ်ႉမႃး သိုၵ်းတဢၢင်း TNLA ႁႅၼ်းသိုၵ်းလေႃႇတိုၵ်း တပ်ႉသိုၵ်းမၢၼ်ႈ တီႈၸၶၢၼ်း တိတ်ႉ ၾၢႆႇၸၢၼ်းဝဵင်းၼမ်ႉၶမ်းၼႆႉမႃး ႁၢဝ်ႈႁႅင်း ႁၢၼ်ႉတေႃႇထိုင်ယၢမ်းလဵဝ် မီးၶၢဝ်းတၢင်း လိူၼ်ပၢႆ ပႆႇသိမ်းလႆႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ