သိုၵ်းမၢၼ်ႈတင်း သိုၵ်းတဢၢင်း TNLA ပဵၼ်ပၢင်တိုၵ်း ႁၢဝ်ႈႁႅင်းထႅင်ႈ တီႈဝဵင်းၼမ်ႉၶမ်း ၾၢႆႇသိုၵ်းမၢၼ်ႈ ၸႂ်ႉမၢၵ်ႇလူင်ယိုဝ်းသႂ်ႇ ၸွမ်းမူႇဝၢၼ်ႈ ပွၵ်ႉ/ယွမ်ႇ ဢမ်ႇယွမ်း 100 ၼႆယဝ်ႉ။

ဝၼ်းတီႈ 5/12/2023 ယၢမ်းၵၢင်ၼႂ် 7:50 မူင်းထိုင် 6:00 မူင်းၵၢင်ၶမ်ႈ သိုၵ်းတဢၢင်း TNLA လုၵ်ႉတီႈဝၢၼ်ႈၼမ်ႉသီး လီးသေ ယိုဝ်းမၢၵ်ႇလူင်ၵႂႃႇတူၵ်းတီႈတပ်ႉသိုၵ်းမၢၼ်ႈ ၸၶၢၼ်းတိတ်ႉ ဢၼ်မီးတၢင်း ၾၢႆႇၸၢၼ်းဝဵင်းၼမ်ႉၶမ်းၼၼ်ႉသေ သွင် ၾၢႆႇပဵၼ်ပၢင်တိုၵ်း ႁၢဝ်ႈႁႅင်း ၾၢႆႇသိုၵ်းမၢၼ်ႈ ယိုဝ်းမၢၵ်ႇလူင် တူၵ်းသႂ်ႇၸွမ်း ဝၢၼ်ႈၵၢတ်ႈၵွင်းသႃႇ၊ ဝၢၼ်ႈဝဵင်းသႃႇ၊ ပွၵ်ႉၵုင်းၵ လႃး၊ ပွၵ်ႉတႃႇယႃႇၵူင်း၊ ဝၢၼ်ႈၼမ်ႉသီးလီး ၸိူဝ်းၼႆႉ ဢမ်ႇယွမ်း 100 လုၵ်ႈ ၼႂ်းၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈ တႆးပွတ်းႁွင်ႇ လႅၼ်လိၼ်တႆး – ၶႄႇ ၼႆယဝ်ႉ။

ၽူႈတူင်ႉၼိုင် ၵၢၼ်သိုၵ်းတၢင်းပွတ်းၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းလွႆသမ်ႉ ယူႇတီႈ ဝၢၼ်ႈ ၼမ်ႉသီးလီး ၼၼ်ႉသေ ယိုဝ်းမၢၵ်ႇလူင်မႃးတူၵ်းတီႈၸၶၢၼ်းတိတ်ႉ ဢမ်ႇယွမ်း 10 လုၵ်ႈ။ သိုၵ်းမၢၼ်ႈသမ်ႉ ယူႇတီႈတပ်ႉၶဝ်ၼၼ်ႉသေ ယိုဝ်းမၢၵ်ႇလူင် မႃးတူၵ်းသႂ်ႇ ၸွမ်းဝၢၼ်ႈ၊ ၸွမ်းပွၵ်ႉ ဢမ်ႇယွမ်း 100 လုၵ်ႈ။ ယဝ်ႉၵေႃႈ ၸႂ်ႉၶိူင်ႈမိၼ်မႃးယိုဝ်းၸွႆႈထႅင်ႈဢေႃႈ”- ဝႃႈၼႆ။

ဢိင်ၼိူဝ် လွင်ႈပၢင်တိုၵ်း တင်းသွင်ၾၢႆႇၼႆႉသေ လွင်ႈမၢတ်ႇၸဵပ်းလူႉတၢႆ တင်းသွင်ၾၢႆႇတႄႉ ပႆႇႁူႉ ယဝ်ႉၵေႃႈ လွင်ႈတုမ်ႉတိူဝ်ႉ ၶူဝ်းၶွင်ႁိူၼ်းယေး ၵူၼ်းဝၢၼ်ႈလူႉၵွႆ ၸိူဝ်းၼႆႉၵေႃႈ ပႆႇႁူႉႁူဝ်ယွႆႈမၼ်း ၼႆယဝ်ႉ။

ၼႂ်းဝၼ်းတီႈ 5/12/2023 ၼႆႉၵူၺ်း သိုၵ်းတဢၢင်း TNLA ႁူမ်ႈတင်း ၸုမ်းၵႅတ်ႇၶႄၵူၼ်းမိူင်း PDF လေႃႇတိုၵ်း တပ်ႉသိုၵ်း မၢၼ်ႈ တီႈမိူင်းလူင် ၸႄႈဝဵင်းၵျွၵ်ႉမႄး တေႃႇထိုင်ယၢမ်းႁူဝ်ၶမ်ႈမွၵ်ႈ 5 မူင်းၶိုင်ႈၵေႃႈ ပႆႇသိမ်းလႆႈ တပ်ႉသိုၵ်းမၢၼ်ႈ။ ၵူၺ်းၵႃႈ တီႈၶူဝ်ၼမ်ႉပၢႆႇ ဢၼ်မီးတၢင်းၾၢႆႇတူၵ်းမိူင်းလူင် ဢွၵ်ႇၵႂႃႇတၢင်းမိူင်းၵုတ်ႈၼၼ်ႉတႄႉ ထုၵ်ႇသိုၵ်း TNLA လႄႈ PDF  ယႃႉ လႅဝ်ၵူၼ်ႇပင်းပႅတ်ႈ – ၽူႈတူင်ႉၼိုင် ၵၢၼ်သိုၵ်း တၢင်းပွတ်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈ ၼင်ႇၼႆ။  

ယွၼ်ႉပၢင်တိုၵ်းၼႆႉသေ သိုၵ်းမၢၼ်ႈ ၸႂ်ႉၶိူင်ႈမိၼ် ယိုဝ်းၸွႆႈ ၸၢၵ်ႇမၢၵ်ႇတိူဝ်ႉသႂ်ႇ ၼၢင်းယိင်း ဢႃယု 45 ပီ လူႉတၢႆထင်တီႈ ၵေႃႉၼိုင်ႈလႄႈ တိူဝ်ႉၺႃးဢွၼ်ႇလုၵ်ႈ မၢတ်ႇၸဵပ်းၸွမ်း 3 ၵေႃႉ ယဝ်ႉၵေႃႈ ၵူၼ်းလူင်ထႅင်ႈ ႁူမ်ႈၵၼ် တင်းမူတ်း 10 ၵေႃႉ လိူဝ်ၼၼ်ႉ တိူဝ်ႉၺႃး ႁိူၼ်းယေး ၵူၼ်းဝၢၼ်ႈလူႉၵွႆထႅင်ႈ 3 လင် ၼႆယဝ်ႉ။