ၸုမ်းတႆး ပေႃႉၵွပ်ႉၾ် ဝဵင်းလိူဝ်ႇ (Dai Golfer Group – DGG) ႁူမ်ႈၵၼ် ႁႃငိုၼ်းၵွင်ၵၢင် ၸွႆႈထႅမ်ၵူၼ်းပၢႆႈၽေးသိုၵ်း ၼႂ်း ၸိုင်ႈတႆးပွတ်းႁွင်ႇ တင်းမူတ်း လႆႈငိုၼ်း 90 သႅၼ်ပျႃး။

ဝၼ်းတီႈ 5/12/2023 ဢဝ်တိုဝ်ႉတၢင်း မၢႆတွင်း ဝၼ်းႁူမ်ၸူမ်းႁပ်ႉတွၼ်ႈ ပီမႂ်ႇတႆး 2118 ၼီႈ တေထိုင်မႃးၼႆႉသေ ယူႇတီႈ ၸုမ်းတႆး ပေႃႉၵွပ်ႉၾ် ဝဵင်းလိူဝ်ႇ (DGG) ႁူမ်ႈၵၼ် ၶေႉၶဵင်ႇလဵၼ်ႈၵၼ် တီႈပၢင်ႇပေႃႉၵွပ်ႉၾ် ဝဵင်းလိူဝ်ႇ (ရေတံခွန်တောင် ဂေါက်ကွင်း) မီးလုၵ်ႈၸုမ်းၶဝ်ႈႁူမ်ႈၶေႉၵၼ် 86 ၵေႃႉ ၼႆယဝ်ႉ။

ၸၢႆးဢၢႆႈဢွင်ႇ ၽူႈၼမ်းၼႂ်း ၸုမ်းတႆး ပေႃႉၵွပ်ႉၾ် ဝဵင်းလိူဝ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈယဝ်ႉၶႃႈ ႁဝ်းၶႃႈ ၸုမ်းတႆးပေႃႉ ၵွပ်ႉၾ် ႁူမ်ႈၵၼ်သေ ႁႃငိုၼ်းၵွင်ၵၢင် တႃႇၸွႆႈထႅမ် ၵူၼ်းပၢႆႈၽေးသိုၵ်း ၼႂ်းမိူင်းတႆးပွတ်းႁွင်ႇ၊ ဢဝ်တိုဝ်ႉတၢင်း မၢႆတွင်း ဝၼ်းႁူမ်ၸူမ်းႁပ်ႉတွၼ်ႈ ပီမႂ်ႇတႆးၼႆႉသေ ၸတ်းႁဵတ်းၵႂႃႇ ယူႇတီႈ လုၵ်ႈၸုမ်းတႆး ပေႃႉၵွပ်ႉၾ်ႁဝ်းၶႃႈၼႆႉသေ မၢင်ၸိူဝ်း ၵမ်ႉၸွႆႈ 15 သႅၼ်၊ 10 သႅၼ်၊ 5 သႅၼ်၊ 3 သႅၼ်၊ 5 မိုၼ်ႇပျႃး ၸိူဝ်းၼႆသေ တင်းမူတ်း လႆႈမႃး 90 သႅၼ်ပျႃးၶႃႈဢေႃႈ”- ဝႃႈၼႆ။  

ၸုမ်းတႆး ပေႃႉၵွပ်ႉၾ် ဝဵင်းလိူဝ်ႇၼႆႉ တႄႇၶွတ်ႇၽွတ်ႈမႃး ၼႂ်းလိူၼ်ၵျုႊလၢႆႊ 2023 ၼႆႉ ယၢမ်းလဵဝ် တင်းမူတ်းမီးလုၵ်ႈ ၸုမ်းဝႆႉ 100 ပၢႆ ယိူင်းဢၢၼ်းၶွတ်ႇၽွတ်ႈၶိုၼ်ႈမႃးသမ်ႉ ၸိူဝ်းၸၢဝ်းတႆး ႁွတ်ႈထိုင်ဝႆႉဝဵင်းလိူဝ်ႇၼၼ်ႉ ႁႂ်ႈလႆႈႁူပ်ႉထူပ်းမိုတ်ႈၵိုဝ်း ၸမ် ၸႂ်ၶဝ်ႈဢွၵ်ႇၵၼ် ယဝ်ႉၵေႃႈ ယိူင်းဢၢၼ်းဝႆႉ 1 ပီလႂ် တေၶဵင်ႇၵၼ် 2 ပွၵ်ႈ တေပဵၼ်ၽွင်းၶဝ်းပီမႂ်တႆးလႄႈ ၵၢင်ပီ ၸိူဝ်းၼႆႉ။

လိူဝ်ၼၼ်ႉ ၸုမ်းတႆးပေႃႉၵွပ်ႉၾ် ဝဵင်းလိူဝ်ႇၼႆႉ ၶွတ်ႇၽွတ်ႈၵေႃၵမ်မၵၢၼ်ဝႆႉ တေမီးႁူဝ်ပဝ်ႈ၊ ၵႅမ်ႁူဝ်ပဝ်ႈ 3 ၵေႃႉ၊ ၽူႈ ၼမ်းၼႂ်း ၵူႈလွင်ႈလွင်ႈ၊ ၵႅမ်ၽူႈၼမ်းၼႂ်း 2 ၵေႃႉ၊ ၾၢႆႇၵၢၼ်ငိုၼ်း၊ ၾၢႆႇထတ်းသဵၼ်ႈမၢႆ ၸိူဝ်းၼႆႉ တင်းမူတ်း မီးၽူႈပွင် ၵၢၼ် 22 ၵေႃႉ ၼႆယဝ်ႉ။