ဝၼ်းတီႈ 3/12/2023 ယၢမ်း 6 မူင်းၵၢင်ၼႂ်   မၢၵ်ႇလူင်သိုၵ်းမၢၼ်ႈ တူၵ်းသႂ်ႇၼႂ်းဝၢင်းဝတ်ႉၵျွင်းၶမ်း ဢိူင်ႇၵွင်းႁေႃ ၸႄႈ ဝဵင်းသႅၼ်ဝီ   တီႈမီးၵူၼ်းပၢႆႈၽေးသိုၵ်းသွၼ်ႈယူႇဝႆႉတင်းၼမ်ၼၼ်ႉ ၸၢၵ်ႇမၢၵ်ႇတိူဝ်ႉမၢတ်ႇထဝ်ႈယိင်း ဢႃယု 60 ပၢႆ 2 ၵေႃႉ  တူၵ်းၸႂ်သေတၢႆ  ၵေႃႉၼိုင်ႈ ။

ၵူၼ်းဝဵင်းသႅၼ်ဝီၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ မၢၵ်ႇလူင်မႃးတူၵ်းသႂ်ႇ ၼႂ်းဝၢင်းၵျွင်းၼႆႉသေ ထဝ်ႈယိင်း 2 ၵေႃႉ ၺႃးၸၢၵ်ႇမၢၵ်ႇ မၢတ်ႇၸဵပ်းႁႅင်းဢေႃႈ ။ ထႅင်ႈၵေႃႉၼိုင်ႈတႄႉ ဢႃယုယႂ်ႇယဝ်ႉ ဢမ်ႇၺႃးၸၢၵ်ႇမၢၵ်ႇ    ၵူၺ်းၼႃႇ တူၵ်းၸႂ်ႁႅင်းသေ  တၢႆပႅတ်ႈဢေႃႈ” – ဝႃႈၼႆ။

ၵူၼ်းမိူင်းသႅၼ်ဝီ ၸိူဝ်းပၢႆႈသွၼ်ႈဝႆႉၼႂ်းၵျွင်းၶမ်းသႅၼ်ဝီၼႆႉ ဢၢၼ်းၵႂႃႇထိုင်လႃႈသဵဝ်ႈဝႃႈၼႆသေတႃႉ ၺႃးၸုမ်းသိုၵ်း လၢႆၸုမ်းႁေႉႁၢမ်ႈလႄႈ ၶမ်ဝႆႉယူႇ တီႈၵဝ်ႇတီႈလဵဝ်။

ၽူႈတူင်ႉၼိုင်ႈၼႂ်းၸုမ်းၸွႆႈၵူၼ်းပၢႆႈၽေးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈတႄႇ မၼ်းငိၼ်းဝႃႈ သိုၵ်းမၢၼ်ႈ ၵူၺ်း ဢမ်ႇပၼ်ၵူၼ်းပၢႆႈၽေးဢွၵ်ႇပိုၼ်ႉတီႈၼႆ။ ၵူၺ်းၼႃႇ မိူဝ်ႈလဵဝ် သိုၵ်းၵဝ်ႈၵၢင်ႉ ၵေႃႈ ဢမ်ႇပၼ်ၵူၼ်းမိူင်း ပၢႆႈဢွၵ်ႇပိုၼ်ႉတီႈ ယဝ်ႉၼႆဢေႃႈ ။ ႁဵတ်းသင်လႄႈ ၶဝ်ဢမ်ႇပၼ်ဢွၵ်ႇၵေႃႈ ဢမ်ႇႁူႉလီလီ ။ ဢမ်ႇၼၼ်ၵေႃႈ ၶဝ်ၶႂ်ႈဢဝ်ၵူၼ်းမိူင်း ႁဵတ်းႁူဝ်ႉႁႄႉၶဝ်ႁိုဝ် ” – ဝႃႈၼႆ။

ၵူၼ်းမိူင်းၸိူဝ်းယူႇၼႂ်းဝဵင်းသႅၼ်ဝီတႄႉ ႁၢင်ႇၵႆတပ်ႉပၢင်သဝ်းသိုၵ်းမၢၼ်ႈဝႆႉလႄႈ လွတ်ႈၽေးယူႇသေတႃႉ ၵူၼ်းၸိူဝ်းၶမ်ယူႇဝႆႉ တီႈၵျွင်းၶမ်းသႅၼ်ဝီတႄႉ လႆႈၵူဝ်မၢၵ်ႇလူင်တူၵ်းသႂ်ႇယူႇၵူႈယၢမ်း ၼႆယဝ်ႉ။

ၽူႈတူင်ႉၼိုင်ႈၼႂ်းၸုမ်းၸွႆႈၵူၼ်းပၢႆႈၽေးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်းၼႂ်းဝဵင်းတေႉတေႉတႄႉ ဢမ်ႇပေႃးလႆႈမႆႈၸႂ် ဢၼ်လီမႆႈၸႂ်ၼႆႉ တေပဵၼ်တီႈၵျွင်းၶမ်းၼႆႉယဝ်ႉ ယွၼ်ႉသင်လႃႇၼႆ ၵျွင်းလႄႈ တင်းတပ်ႉ 69 ၼႆႉ မၼ်းၶႅၼ်ႈၵၼ်တၢင်းၵူၺ်းၶႃႈဢေႃႈ”- ဝႃႈၼႆ။

ၵူၼ်းပၢႆႈၽေးၸိူဝ်းမႃး သွၼ်ႈယူႇဝႆႉ တီႈဝတ်ႉၵျွင်းၼႆႉ မီးလၢႆဝၢၼ်ႈ မိူၼ်ၼင်ႇ ႁူဝ်တႃႈ ၊ ဝဵင်းၸၢၼ်း ၊ ဢူးယိၼ်ႇမူး ၸဵမ်ၸိူဝ်းၼႆႉ။ ၸဵမ်မိူဝ်ႈ ၸုမ်းသိုၵ်းဢူၺ်းလီပွတ်းႁွင်ႇ တႄႇၽႅၼ်တိုၵ်း 1027 မႃးၼၼ်ႉ ၵူၼ်းပၢႆႈၽေးၸိူဝ်းၼႆႉ  ပၢႆႈသွၼ်ႈယူႇဝႆႉ ၼႂ်းၵျွင်းၶမ်းၼပ်ႉႁူဝ်ႁဵင် ။

ၽူႈတူင်ႉၼိုင်ႈၼႂ်းၸုမ်းၸွႆႈၵူၼ်းပၢႆႈၽေးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “  ၵူၼ်းပၢႆႈၽေး ဢၼ်ၶမ်ဝႆႉ ၼႂ်းၵျွင်းၶမ်းၼၼ်ႉ မိူဝ်ႈတႄႇမၼ်းမီး 3000 ၸမ် ။ တူၺ်းငဝ်းလၢႆးမၼ်းသေ ဢွၵ်ႇၵမ်းလွႆးလွႆး ၸိူဝ်းဢွၵ်ႇပူၼ်ႉၵႂႃႇၵေႃႈပူၼ်ႉယူႇ မိူဝ်ႈလဵဝ်ၵိုတ်းၶမ်ဝႆႉ 1300 ၵေႃႉ ဢေႃႈၼၼ်ႉ ” –  ဝႃႈၼႆ။

ၵူၼ်းပၢႆႈၽေးၸိူဝ်းၼႆႉ လိူဝ်သေ လႆႈပၢႆႈၽေးယဝ်ႉ သမ်ႉလႆႈၵူဝ် ၸုမ်းသိုၵ်းတီႉၺွပ်းထႅင်ႈ ၼႂ်းလိူၼ်ၼူဝ်ႊဝႅမ်ႊပိူဝ်ႊ 2023 ပူၼ်ႉမႃးၼႆႉၵေႃႈ ဢွၼ်ႇၸၢႆးၼုမ်ႇ/ ယိင်းၼုမ်ႇ တီႈဝၢၼ်ႈတၢင်ႉသေႃႇ၊ မိူင်းပွၼ်း ၼႂ်းဢိူင်ႇၼမ်ႉၸ လၢပ်ႈလႄႈ ဝၢၼ်ႈၼမ်ႉသီးလီး ၼႂ်းဢိူင်ႇၸေႈဢူ ၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိူဝ်းၼႆႉ ထုၵ်ႇ ၸုမ်းယိပ်းၵွင်ႈၵၢင်ႉ ၸၢဝ်းၶိူဝ်း တီႉၺွပ်းၵုမ်းတူဝ်ၵႂႃႇၼမ်။

လိူဝ်ၼၼ်ႉ ၼႂ်းႁူဝ်လိူၼ်တီႊသိမ်ႊပိူဝ်ႊၼႆႉၵူၺ်း ၵူၼ်းၼုမ်ႇလႃႈသဵဝ်ႈ ၸိူဝ်းၵႂႃႇႁဵတ်းၵၢၼ်ဝႆႉၼႂ်းလၢဝ်ႇၵၢႆး ပၢႆႈဢွၵ်ႇဝဵင်းသေ မိူဝ်ႈထိုင်တီႈ ၶျိၼ်းသူၺ်ႇႁေႃႇၼၼ်ႉ ၺႃးသိုၵ်းၵဝ်ႈၵၢင်ႉ တင်ႈလၢၼ်ႇ ႁၢမ်ႈႁေႉ တီႉၺွပ်း ႁဵတ်းသိုၵ်းၵမ်းသိုဝ်ႈ ဢမ်ႇယွမ်း 7 ၵေႃႉ ၼႂ်းၼၼ်ႉ မီးၸၢဝ်းဝႃႉၵေႃႉၼိုင်ႈလႄႈၸၢဝ်းၶၢင်ၵေႃႉၼိုင်ႈ ။ထွတ်ႇၶူဝ်းၵူၼ်းႁိူၼ်းပႅတ်ႈသေလၢႆႈပၼ်ၶူဝ်းသိုၵ်း ယဝ်ႉၵေႃႈ ၸုတ်ႇၽဝ်ပႅတ်ႈမၢတ်ႇပူင်ႇတိၼ်ႇ(ဝႂ်ၵမ်းတူဝ်) ပႅတ်ႈၼႆ ၵူၼ်းပိုၼ်ႉတီႈၵေႃႉၼိုင်ႈ လၢတ်ႈၼင်ႇၼႆ။