ၼႂ်းဝူင်ႈဝၢင်ႈၼႆႉ သိုၵ်းမၢၼ်ႈဢဝ်ၶိူင်ႈမိၼ်မႃးပွႆႇမၢၵ်ႇသႂ်ႇ တီႈယူႇတၼ်းသဝ်းၵူၼ်းမိူင်းလၢႆတီႈၼႂ်းၸိုင်ႈတႆးပွတ်းႁွင်ႇ။
မိူဝ်ႈဝၼ်းတီႈ 2/12/2023 တၢမ်းၶမ်ႈ 6 မူင်း ပၢင်တိုၵ်းသိုၵ်းသိူဝ်ၵေႃႈဢမ်ႇမီး သိုၵ်းမၢၼ်ႈဢဝ်ၶိူင်ႈမိၼ် မႃးပွႆႇမၢၵ်ႇသႂ်ႇ တီႈပွၵ်ႉၼိူဝ်ၵၢတ်ႇ ၊ ဢိူင်ႇၸေႊလၢၼ်ႉ ၸႄႈဝဵင်းမူႇၸေႊ ၵူၼ်းမၢတ်ႇၸဵပ်း 3 ၵေႃႉ ၼႂ်းၼၼ်ႉပႃး ယိင်းဢွၼ်ႇ ဢႃယု 6 ၶူပ်ႇ ၵေႃႉၼိုင်ႈ။
ၵူၼ်းၼႂ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ၵူၼ်းမၢတ်ႇၸဵပ်း 3 ၵေႃႉ။ ႁိူၼ်းၵေႃႈၵွႆ။ ဢၼ်ၵွႆလႅဝ်ၽႅဝ်ႉၵႂႃႇၼႆႉ ႁိူၼ်း 3 လင်။ ၵတ်ႉၵႃႈလႄႈ ဢမ်ႇမီးၵူၼ်းယူႇဝႆႉ ပိူၼ်ႈပၢႆႈဝႆႉထႃႈဢွၼ်တၢင်း ” – ဝႃႈၼႆ။
ၵူၼ်းမိူင်းဢၼ်တိူဝ်ႉမၢၵ်ႇမၢတ်ႇၸဵပ်းၼႆႉ ၼၢင်းယိင်း ဢႃယု 60 ၵေႃႉၼိုင်ႈ လႄႈ ၵူၼ်းၸၢႆးၵေႃႉၼိုင်ႈ ၸိုဝ်ႈၸၢႆးၵျေႃႇ ဢႃယု 46 လႄႈ လုၵ်ႈဢွၼ်ႇဢႃယု 6 ၶူပ်ႇၵေႃႉၼိုင်ႈ။ၵမ်ႈၼမ် မၢတ်ႇတိူဝ်ႉၸွမ်းတိၼ်မိုဝ်းလႄႈၼႃႈ ၵူၼ်းမၢတ်ႇၸဵပ်းၸိူဝ်းၼႆႉ ဢမ်ႇၸႂ်ႈၵူၼ်းႁိူၼ်းလဵဝ်ၵၼ် လႆႈႁူႉၼင်ႇၼႆ ။
ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်းမၢၼ်ႈၼႆႉ ဢမ်ႇမီးပၢင်တိုၵ်းသင်ၵေႃႈ ႁေႃႈၶိူင်ႈမိၼ် ဢဝ်မၢၵ်ႇလူင် သႅၼ်းၼမ်ႉၼၵ်း 500 ပွင်ႊ မႃးပွႆႇသႂ်ႇဝၢၼ်ႈသူၼ်ႁိူၼ်းယေးၵူၼ်းမိူင်း ။ ၶဝ်ၶႂ်ႈပဵၼ်ႁိုဝ်တေႉတေႉၵေႃႈ ဢမ်ႇႁူႉယဝ်ႉ ” – ဝႃႈၼႆ။
ဝၼ်းတီႈ 30/11/2023 ယၢမ်းၵၢင်ၶမ်ႈမွၵ်ႈ 9 မူင်းထိုင် 10 မူင်းၼႆႉၵေႃႈ သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ် မႃးပွႆႇမၢၵ်ႇလူင်သႂ်ႇ တီႈဝၢၼ်ႈၼွင်ၵေႃႇ ဢိူင်ႇမိူင်းပႃး ၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ တိူဝ်ႉသႂ်ႇ ၵူၼ်းဝၢၼ်ႈ လူႉတၢႆ 3 ၵေႃႉ ပေႃႈမႄႈလုၵ်ႈ ၼႆယဝ်ႉ။
ၸွမ်သိုၵ်းၸေႃႇမိၼ်းထုၼ်း ၽူႈၶၢၼ်ပၢၵ်ႇသိုၵ်းမၢၼ်ႈတႄႉ လၢတ်ႈတီႈၽူႈသိုဝ်ႇၶၢဝ်ႇယႂ်ႇပဵၼ်တၢင်းၵၢၼ်တီႈၼေႇပျီႇတေႃႇဝႃႈ ၵႃႈသဵင်ၵွင်ႈပႆႇတႅၵ်ႇတႄႉ ႁိူၼ်းၵူၼ်းဝၢၼ်ႈၵေႃႈတိုၵ်ႉပဵၼ်ႁိူၼ်းၵူၼ်းဝၢၼ်ႈယူႇၵူၺ်း။ ၵူၺ်းၵႃႈ ပေႃးၸုမ်းယိပ်းၵွင်ႈၵၢင်ႇ ယူႇၼႂ်းဝၢၼ်ႈသေ ယိုဝ်းမိူဝ်ႈလႂ်ၵေႃႈ ႁိူၼ်းၵူၼ်းဝၢၼ်ႈၼၼ်ႉ တေယဵၼ်းပဵၼ် ႁူင်းဢၼ်ၵဵဝ်ႇၵပ်းၵၢၼ်သိုၵ်းၵႂႃႇၵမ်းသိုဝ်ႈသေ ၾၢႆႇသိုၵ်းမၢၼ်ႈၵေႃႈ တေဢမ်ႇဝႄႈ- တေဢဝ်ႁဵတ်းပဝ်ႉမၢႆၵၢၼ်သိုၵ်းသေပိုတ်းယိုဝ်းၵမ်းသိုဝ်ႈ -ဝႃႈၼႆ။
ၵူၺ်းၵႃႈၵူၼ်းၼမ်ႉၶမ်းတႄႉလၢတ်ႈဝႃႈ -ၽွင်းသိုၵ်းမၢၼ်ႈဢဝ်ၶိူင်ႈမိၼ်မႃးပွႆႇမၢၵ်ႇသႂ်ႇဝၢၼ်ႈၼႆႉ ဢမ်ႇမီးပၢင်တိုၵ်း၊ သဵင်ၵွင်ႈၵေႃႈဢမ်ႇတႅၵ်ႇ။ သမ်ႉပဵၼ်ယၢမ်းၵၢင်ၶိုၼ်း ဢမ်ႇၼၼ် ယၢမ်းႁူဝ်ၼႂ် ၽွင်းၵူၼ်းမိူင်းလူဝ်ႇလိုဝ်ႈလူဝ်ႇၼွၼ်းလွၼ်ႉလွၼ်ႉ ဝႃႈၼႆ။
ၼႂ်းပိူင်ၵျီႊၼီႊဝႃႊ ၶွၼ်ႊဝႅၼ်ႊသျိၼ်ႊတႄႉပႃးဝႆႉဝႃႈ တင်ႈၸႂ်ယိုဝ်းသႂ်ႇဝၢၼ်ႈသူၼ်ႁိူၼ်းယေးၵူၼ်းမိူင်းၼႆႉ ၽိတ်းပိူင်သိုၵ်းၵမ်းသိုဝ်ႈဝႃႈၼႆဝႆႉ။ ၽူႈၼမ်းသိုၵ်းၼႆႉ တၵ်းလႆႈလႅတ်းလႅမ် လႄႈတၵ်းလႆႈမေႃၸႅၵ်ႇၸႅင်ႈတီႈယူႇၵူၼ်းမိူင်းလႄႈ ၽူႈၶဵၼ် – ဝႃႈၼႆ။
