ၵူၼ်းပႃးတွင်ႉ 3 ၵေႃႉ ဢၼ်လႆႈပၢႆႈၽေးသိုၵ်း မႃးသွၼ်ႈယူႇဝႆႉ တီႈၼႂ်းမူႇၸေႊၼႆႉယၢပ်ႇၽိုတ်ႇတႃႇၵိူတ်ႇလဵင်ႉလုၵ်ႈ။

 မႄႈမၢၼ်း 3 ၵေႃႉၼႆႉ မႃးသွၼ်ႈယူႇဝႆႉတီႈ ပွၵ်ႉၸွၼ်ႊၸူဝ်ႇ ၸႄႈဝဵင်းမူႇၸေႊ ၵၢၼ်ငၢၼ်းဢမ်ႇလႆႈႁဵတ်း ၊ လၢႆးလႆႈငိုၼ်းၵေႃႈ ဢမ်ႇမီး ၶၢဝ်းယၢမ်းတႃႇၵိူတ်ႇလဵင်ႉလုၵ်ႈၵေႃႈ ၸမ်မႃးယဝ်ႉလႄႈ ယၢပ်ႇၽိုတ်ႇငိုၼ်းတွင်းတႃႇၸႂ်ႉၸၢႆႇ ၽွင်းၵိူတ်ႇလုၵ်ႈၼႆယဝ်ႉ။

ၵူၼ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ၼၢင်းယိင်းဢၼ် ယူႇဝႆႉတီႈသဵၼ်ႈတၢင်းမၢႆ 1 ပွၵ်ႉၸွၼ်ႊၸူဝ်ႇၼၼ်ႉတႄႉ ပေႃးဢမ်ႇၸႂ်ႈဝူင်ႈၼႆႉၵေႃႈ လႅပ်ႈဝူင်ႈၼႃႈၼႆႉ တေၵိူတ်ႇယဝ်ႉၶႃႈ။ၵူၺ်းၼႃႇ မိူဝ်ႈၶဝ်ပၢႆႈမႃးၵေႃႈ ဢမ်ႇတၼ်းလႆႈသင်မႃး ယဝ်ႉၵေႃႈ တႃႇၵႃႈယူတ်းၵႃႈယႃ တႃႇၼႄမေႃၵေႃႈ ၶဝ်ဢမ်ႇမီးငိုၼ်းတွင်း ” – ဝႃႈၼႆ။

မႄႈမၢၼ်းတွင်ႉၵႄႇထႅင်ႈ 2 ၵေႃႉၵေႃႈလိူၼ်ၼႆႉၶဝ်မႃးၼႂ်းလိူၼ်ထူတ်ႈ 9 ယဝ်ႉလႄႈမႆႈၸႂ်ငိုၼ်းတွင်းၵႃႈၸႂ်ႉၸၢႆႇ ၽွင်းၵိူတ်ႇလဵင်ႉလုၵ်ႈ တႄႉတႄႉ ဝႃႈၼႆ။

မိူဝ်ႈႁၢင်လိူၼ် ဢေႃႊၵတ်ႉသ်ၼၼ်ႉ သိုၵ်းမၢၼ်ႈယိုတ်းမိူင်း လႄႈ သိုၵ်းတဢၢင်း TNLA ပဵၼ်ပၢင်တိုၵ်းၵၼ် ႁၢဝ်ႈႁႅင်းသေ ၵူၼ်းၸေႊလၢၼ်ႉလႄႈ ၵူၼ်းမိူင်းၸိူဝ်းယူႇႁိမ်းႁွမ်း လႆႈပၢႆႈၽေးသိုၵ်း ႁူဝ်ၵူၼ်းၼပ်ႉႁူဝ်ပၢၵ်ႇသေ ၼႂ်းၼၼ်ႉ မီးပႃး ၵူၼ်းၸပ်းတွင်ႉလႄႈ မႄႈလုၵ်ႈဢွၼ်ႇ  ။

ၵူၼ်းပၢႆႈၽေးသိုၵ်းမူႇၸေႊၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈလဵဝ်ၼႆႉ ပေႃးလုၵ်ႈဢွၼ်ႇ ၵိူတ်ႇမႃးၼႆ တေလူဝ်ႇၽႃႈဢွမ်ႈလုၵ်ႈဢွၼ်ႇ ၊ ၼမ်ႉၼူမ်း လႄႈ ယႃႈယႃၸိူဝ်းၼႆႉၵေႃႈ တေလူဝ်ႇဢေႃႈ ၊ မၼ်းဢမ်ႇမီးသင် ဝႆႉ။တႃႇၵိူတ်ႇလဵင်ႉလုၵ်ႈၼႆႉ ၼိုင်ႈၵေႃႉလႂ် တီႈဢေႇသုတ်းမၼ်း မွၵ်ႈ 5 သႅၼ်ၼႆႉတႄႉ ဢမ်ႇယွမ်း ယဝ်ႉ။ ပေႃးမီးၵူၼ်းၸွႆႈထႅမ်ပၼ်တႄႉ လီၶႃႈဢေႃႈၼႆႉ ” –  ဝႃႈၼႆ။

ၵူၼ်းမိူင်းၸိူဝ်းလႆႈပၢႆႈၽေးသိုၵ်းတီႈၸေႊလၢၼ်ႉၼႆႉ မီးလၢႆလၢႆဝၢၼ်ႈ မိူၼ်ၼင်ႇ မၢၼ်ႈၵၢင် ၊ မၢၼ်ႈသၵ်း ၊  ဝၢၼ်ႈၼမ်ႉၵတ်း ၸဵမ်ၸိူဝ်းၼႆႉ ။ ၶၢႆႉပၢႆႈသွၼ်ႈဝႆႉတီႈမူႇၸေႊ မိူၼ်ၼင်ႇ တီႈပွၵ်ႉႁူဝ်ၼႃး 230 ၵေႃႉ ၊ တီႈပွၵ်ႉၸွၼ်ႊၸူဝ်ႇ 160 ၵေႃႉ ၊ မၢၼ်ႈၵၢင် 290 လႄႈ ၸွမ်းၸလွပ်ႈသႃလႃး ၼႂ်းဢိူင်ႇၼႂ်းဝၢၼ်ႈၸိူဝ်းၼၼ်ႉၵေႃႈ မီးထႅင်ႈတင်းၼမ် ၸိူဝ်းပႆႇလႆႈႁူႉသဵၼ်ႈမၢႆၵေႃႈ မီးထႅင်ႈ မိူဝ်ႈလဵဝ် ယၢပ်ႇၽိုတ်ႇတီႈယူႇတီႈၼွၼ်း လႄႈ ၶဝ်ႈၼမ်ႉတၢင်းၵိၼ်။