ၵူၼ်းမိူင်းဝဵင်းလႃႈသဵဝ်ႈ ၵေႃႉပၢႆႈၽေးပၢင်တိုၵ်းၵႂႃႇသွၼ်ႈယူႇဝႆႉ တီႈပွၵ်ႉ 1 ဝဵင်းဢေးတႃႇယႃႇ ၸႄႈဝဵင်းတူၼ်ႈတီးၼၼ်ႉ ၺႃးၸုမ်းပလိၵ်ႈမၢၼ်ႈတီႉၺွပ်း ယွၼ်ႉတႅမ်ႈတၢင်ႇ ထတ်းသၢင် လွင်ႈသိုၵ်းမၢၼ်ႈလႄႈပၢင်လိူၵ်ႈတင်ႈၼႆသေ ထုၵ်ႇဢဝ်လိူင်ႈဝႆႉဝႃႈၼႆ။

ဢိင်ၼိူဝ် ငဝ်းႁၢင်ႈသဵင် ၵူၼ်းမိူင်းၼႂ်းဝဵင်းလႃႈသဵဝ်ႈ ၺႃးၵူၼ်းၸၢႆးသွင်ၵေႃႉ ၸူၼ်ဢဝ်ၵႃးၵႂႃႇ ၼၼ်ႉသေ မၼ်းၸၢႆး တႅမ်ႈတၢင်ႇ ၼိူဝ်ၾဵတ်ႉသ်ပုၵ်ႉဝႃႈ – “ၵၢၼ်ၽွင်းငမ်းၶဝ် ဢမ်ႇၶႅမ်ႉ၊ သိုၵ်းမၢၼ်ႈမႃးၵုမ်းၵမ်ၶိုၼ်းၵေႃႈ ဢမ်ႇမီးလွင်ႈႁူမ်ႇလူမ်ႈ၊ ႁူႉၶႂ်ႈလႆႈၶႅပ်းမႄးတီႈၵူၼ်းမိူင်းၵူၺ်း၊ ဢမ်ႇႁဵတ်းၽွၼ်းလီသင်တႃႇၵူၼ်းမိူင်း ” ၼႆလႄႈ သိုၵ်းမၢၼ်ႈၼႄးဝႃႈ မၼ်းၸၢႆးၶႂ်ႈယႃႉ ပၢင်လိူၵ်ႈတင်ႈၼႆသေ ပိုတ်ႇလိူင်ႈဢဝ်တၢင်းၽိတ်းဝႆႉ – ဝႃႈၼႆ။

ၵူၼ်းၸၢႆး ၼႂ်းၸႄႈဝဵင်းတူၼ်ႈတီး ၵေႃႉၸမ်ၸႂ်ၵူၼ်းထုၵ်ႇတီႉၺွပ်း လႄႈ ႁူႉလိူင်ႈပိူင်ပဵၼ်လွင်ႈၼႆႉ လၢတ်ႈၼႄဝႃႈ – “ၼႆႉပွင်ႇဝႃႈ သိုၵ်းမၢၼ်ႈၼႆႉ ပၵ်းတႃပႂ်ႉတူၺ်းၸွမ်း ၼိူဝ်သိုဝ်ႇတူင်ႇဝူင်းၵူၼ်း မိူၼ်ၼင်ႇၾဵတ်ႉပုၵ်ႉၸိူဝ်းၼႆႉတေႉတေႉယဝ်ႉ။ ၸဝ်ႈၵဝ်ႇၵေႃႉတၢင်ႇ ၵေႃႈလီ၊ ၵႂႃႇသျႄးၵေႃႈယဝ်ႉ ၶဝ်တိုၼ်း ပႂ်ႉတူၺ်းၸွမ်းဝႆႉ။ မိူဝ်ႈဢွၼ်တၢင်းတႄႉ ၶဝ်ဢဝ်ၶေႃႈ ဢၢင်ႈ လွင်ႈ VPN သေ ၺွပ်းၵွႆး။

ၵမ်းၼႆႉသမ်ႉဝႃႈ ယွၼ်ႉပဵၼ်ၵၢၼ်ယႃႉၵဝ်း ပၢင် လိူၵ်ႈတင်ႈ ၼႆသေ ဢဝ်ပၵ်းပိူင်ၾိင်ႈမိူင်း ဢၼ်ပိူၼ်ႈဢမ်ႇပႆႇႁူႉၼၼ်ႉ ၺွပ်းၵႂႃႇ။ မိူၼ်ၶဝ်တင်ႈၸႂ်ႁဵတ်းၼႄ ယႃႇႁႂ်ႈမီးၽႂ်ႁတ်း ထတ်းသၢင် လႄႈ လၢတ်ႈၶေႃႈၵႂၢမ်း ဢၼ်တေၸၢင်ႈယႃႉၵဝ်း ႁႂ်ႈပၢင်လိူၵ်ႈတင်ႈ ယၢႆႈၼၼ်ႉ” ၼႆယဝ်ႉ။

လႆႈႁူႉဝႃႈ ဢၼ်ၸုမ်းပလိၵ်ႈ လႄႈ သိုၵ်းမၢၼ်ႈၶဝ် ပၵ်းတႃပႂ်ႉတူၺ်းၸွမ်းသိုဝ်ႇတူင်ႇဝူင်းၵူၼ်း ၼႂ်းပိုၼ်ႉတီႈသေ တီႉၺွပ်းဢဝ် ၵူၼ်းၸိူဝ်းထတ်းသၢင်ၼိူဝ် လွင်ႈပၢင်လိူၵ်ႈတင်ႈၼၼ်ႉ ပွၵ်ႈၼႆႉ ပဵၼ်ဢွၼ်တၢင်းသုတ်း။ ၵူၼ်းၸၢႆးၵေႃႉၼႆႉ ၸိုဝ်ႈႁွင်ႉ ၵူဝ်ႇၼေႇတူၺ်း ပဵၼ်ၵူၼ်းမိူင်း ဝဵင်းလႃႈသဵဝ်ႈ ပၢႆႈၽေးပၢင်တိုၵ်းမႃးသေႃႉယူႇဝႆႉတီႈ ဝဵင်းတူၼ်ႈတီးၸူဝ်ႈၶၢဝ်းသေ ပဵၼ်ၵူၼ်းႁဵတ်းၵၢၼ်ၵႃႉၶၢႆရူတ်ႉၶိူင်ႈၵေႃႉၼိုင်ႈ ဝႃႈၼႆ။

မိူဝ်ႈလိူၼ်ၵျူႊလၢႆႊ ဝၼ်းတီႈ 29 ၼၼ်ႉ ၾၢႆႇၶွမ်ႊမသျိၼ်ႊသိုၵ်းမၢၼ်ႈ ပိုၼ်ၽၢဝ်ႇမၵ်းမၼ်ႈ ပၵ်းပိူင်ၾိင်ႈမိူင်း ဢၼ်ၵဵဝ်ႇလူၺ်ႈ ပၢင်လိူၵ်ႈတင်ႈ။ ပဵၼ်ၾိင်ႈမိူင်းဢၼ်ၵႅတ်ႇၶႄပၢင်လိူၵ်ႈတင်ႈ လႄႈ ႁေႉၵင်ႈၵၢၼ်ယႃႉၵဝ်း ပၢင်လိူၵ်ႈတင်ႈ၊ ႁူၺ်းသူၼ်းႁႂ်ႈ ၶၵ်ႉၵၢၼ် ပၢင်လိူၵ်ႈတင်ႈ လူႉၵွႆ၊ ႁၢမ်ႈဝႆႉဢမ်ႇပၼ် တူၵ်ႇတၵ်ႉလၢတ်ႈ၊ ႁူၺ်းသူၼ်း၊ ၼႄၵၢင်ၸႂ် ဢမ်ႇၼၼ် တႅမ်ႈလိၵ်ႈသေ ပိုၼ်ၽႄႈ ယႃႉၵဝ်း ၶၵ်ႉၵၢၼ်ပၢင်လိူၵ်ႈတင်ႈ။

သင်ဝႃႈ ပူၼ်ႉပႅၼ်ၶေႃႈႁၢမ်ႈ ဢမ်ႇၼၼ် ၾိင်ႈမိူင်း ပၢင်လိူၵ်ႈတင်ႈ တွၼ်ႈ 23 (က) ၼၼ်ႉၸိုင် တေထုၵ်ႇၺႃးတၢမ်ႇၶွၵ်ႈၶင် ဢေႇ သုတ်း 3 ပီ တေႃႇထိုင် 7 ပီ ဢမ်ႇၼၼ် တၢမ်ႇငိုၼ်း ၼႆယဝ်ႉ။

တႅမ်ႈ-ၽူၺ်းၼုမ်ႇ