မိူဝ်ႈၼႆႉ ဝၼ်းတီႈ 24/11/2023 ယၢမ်းႁူဝ်ၼႂ်ၸဝ်ႉ ဢမ်ႇပဵၼ်ပၢင်တိုၵ်းသင်သေ သိုၵ်းမၢၼ်ႈၸႂ်ႉၶိူင်ႈမိၼ် ပွႆႇမၢၵ်ႇလူင်သႂ်ႇ ႁိူၼ်းၵူၼ်းမိူင်းၸေႊလၢၼ်ႉ ဢမ်ႇယွမ်း 2 ၵမ်း ႁိူၼ်းလူႉၵွႆ 10 ပၢႆ  ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈယဝ်ႉ ၶဝ်ဢဝ်ႁိူဝ်းမိၼ်တိုၵ်း မႃး ပွႆႇမၢၵ်ႇ လူင်သႂ်ႇၵူၼ်းမိူင်း ဢမ်ႇယွမ်း 2 ၵမ်း။မၢၵ်ႇလူင်တူၵ်းသႂ်ႇ ၼႂ်းဝၢင်းႁိူၼ်းပွၵ်ႉၵွင်းၼွင်ၼၼ်ႉ လင်ၼိုင်ႈ။တိူဝ်ႉပႃး ႁၢၼ်ႉၶၢႆၵုၼ်ႇၶဝ်ထႅင်ႈ ။တေလႆႈဝႃႈ လူႉၵွႆၼမ်ဝႃႈၼမ်။ၵႃးဢၼ်ၵိုတ်းဝႆႉ 4 လမ်းၼၼ်ႉၵေႃႈ တိူဝ်ႉၸၢၵ်ႇမၢၵ်ႇလႄႈ မၢၼ်ႇမၼ်းတႅၵ်ႇလႅဝ်။ယဝ်ႉၵေႃႈ ႁိူၼ်းဢၼ်ယူႇတိတ်းၸပ်းၵၼ်ႁိမ်းၼၼ်ႉၵေႃႈ တိူဝ်ႉၸၢၵ်ႇမၢၵ်ႇသေလႄႈ လူႉၵွႆၸွမ်းထႅင်ႈ 10 လင်ၼႆႉဢေႃႈ ” – ဝႃႈၼႆ။

ပွၵ်ႉၵွင်းၼွင် ၼႂ်းၸေႊလၢၼ်ႉၼႆႉ ၺႃးမၢၵ်ႇလူင်သိုၵ်းမၢၼ်ႈယိုဝ်းသႂ်ႇလႄႈ ႁိူၼ်းလူႉၵွႆၸွမ်းၼမ်သေတႃႉ ၵူၼ်းမၢတ်ႇၸဵပ်းလူႉတၢႆၸွမ်းတႄႉဢမ်ႇမီး လႆႈႁူႉၸွမ်းၼင်ႇၼႆ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸဝ်ႈႁိူၼ်း  ဢမ်ႇမၢတ်ႇၸဵပ်းၸွမ်း သေၵေႃႉၼင်ႇၵဝ်ႇ ။   ပိူၼ်ႈ ပၢႆႈသွၼ်ႈဝႆႉ ၸဵမ်လႂ်ယဝ်ႉ။မၢင်ၸိူဝ်းၵေႃႈ ၵိုတ်းဝႆႉတီႈႁိူၼ်းယူႇ ၵူၺ်းၵႃႈ မႅၼ်ႈၽွင်းယူႇၼွၵ်ႈႁိူၼ်းလႄႈ ဢမ်ႇၺႃး ” – ဝႃႈၼႆ။

ၸဵမ်မိူဝ်ႈၸုမ်းဢူၺ်းလီပွတ်းႁွင်ႇ တႄႇၽႅၼ်တိုၵ်း 1027 မႃးၼႆႉ ၵူၼ်းပၢႆႈၽေးၼမ်ႉၶမ်းၸိူဝ်းၼႆႉ ၶဝ်ႈပၢႆႈသွၼ်ႈယူႇၸွမ်း ၼႂ်းၸႄႈဝဵင်းမူႇၸေႊလၢႆတီႈ မိူၼ်ၼင်ႇ ႁိူၼ်းယေးပီႈၼွင်ႉႁိမ်းၸေႊလၢၼ်ႉၸိူဝ်းၼႆႉ သွၼ်ႈယူႇသဝ်းဝႆႉ။

ၵူၼ်းပၢႆႈၽေးၼမ်ႉၶမ်းဢၼ်ပၢႆႈမႃးသွၼ်ႈဝႆႉၸေႊလၢၼ်ႉၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈလိူၼ်ပူၼ်ႉမႃးၵေႃႈ ယွၼ်ႉပဵၼ်ပၢင်တိုၵ်းတီႈၼမ်ႉၶမ်းလႄႈ ပၢႆႈသွၼ်ႈမႃးယူႇၸွမ်းပီႉၼွင်ႉတီႈၸေႊလၢၼ်ႉ။ မိူဝ်ႈလဵဝ်ၵေႃႈ သိုၵ်းမၢၼ်ႈသမ်ႉ ၸႂ်ႉၶိူင်ႈမိၼ်တိုၵ်းမႃးယိုဝ်းသႂ်ႇတီႈၸေႊလၢၼ်ႉထႅင်ႈလႄႈ ဢမ်ႇၸၢင်ႈဝႄႈႁဵတ်းႁိုဝ်ထႅင်ႈယဝ်ႉ။တေႃႈၼင်ႇယူႇၼႂ်းႁိူၼ်း ယင်းဢမ်ႇမီးလွင်ႈႁူမ်ႇလူမ်ႈယဝ်ႉ ” – ဝႃႈၼႆ

မိူဝ်ႈၼႆႉ ဝၼ်းတီႈ 23/11/2023 ယၢမ်းၵၢင်ၼႂ်မွၵ်ႈ 9 မူင်း မၢၵ်ႇလူင် တူၵ်းသႂ်ႇၵႃးတၢင်ႇၵုၼ်ႇ ဢွင်ႈတီႈၵိုတ်းၵႃး (7 ၶႂႃႇ ၵျိၼ်း) တီႈဝၢၼ်ႈၵွင်းၶၢင် ႁိမ်းသဵၼ်ႈတၢင်းလူင်သၢမ်ၸဵင်ႇၶမ်း (သျိၼ်ႊသၢၼ်ႊၵျေႃႉ) ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ၵႃးလူင်တၢင်ႇၵုၼ်ႇ ဢၼ်ထုၵ်ႇၾႆးမႆႈၵႂႃႇၼၼ်ႉ ဢမ်ႇယွမ်း 10 လမ်း ။

ၼႂ်းမၢႆမီႈသိုၵ်းၵူႈမိူင်းမိူင်းၼႂ်းလုမ်ႈၾႃႉ ပႃးၸဵမ်မိူင်းႁူမ်ႈတုမ်မၢၼ်ႈ ပႃးဝႆႉဝႃႈ ၸုမ်းယိပ်းၵွင်ႈၵၢင်ႇၸုမ်းလႂ်သေဢမ်ႇဝႃႈ ပႃးၸဵမ်တပ်ႉသိုၵ်းၸိုင်ႈမိူင်း- ပေႃးတေပိုတ်းယိုဝ်းၸိုင် တၵ်းတေလႆႈၸႅၵ်ႇၸႅင်ႈ ၵူၼ်းမိူင်းလႄႈၵူၼ်းသိုၵ်းၵွၼ်ႇ။ ဢၼ်ဢမ်ႇလိူၵ်ႈတီႈလိူၵ်ႈၵေႃႉသေ ပိုတ်းယိုဝ်းလူင်ၵႂႃႇၵမ်ႈမၼ်းပဵၼ်ၼႆႉ လႆႈသုၼ်ႇပေႉပုၼ်ႈၼႂ်းၵၢၼ်သိုၵ်း ၼိုင်ႈၵမ်းယူႇသေတႃႉ တုမ်ႉတိူဝ်ႉတေႃႇသၢႆၸႂ်ၵူၼ်းမိူင်းၵမ်းသိုဝ်ႈ၊ ယႃႉၶူဝ်းၶွင်ငိုၼ်းၶမ်းႁိူၼ်းယေးၵူၼ်းဝၢၼ်ႈ ၵမ်းသိုဝ်ႈလႄႈ ပွင်ႇဝႃႈ ၸုမ်းလူင်းမိုဝ်းယိုဝ်းၸုမ်းၼၼ်ႉ ပဵၼ်ၽူႈပူၼ်ႉပႅၼ်မၢႆမီႈသိုၵ်းၵမ်းသိုဝ်ႈ။ ၵွပ်ႈၼႆလႄႈၸင်ႇလႆႈႁၢမ်ႈဝႆႉဝႃႈ တေဢမ်ႇလႆႈဢဝ်ၵူၼ်းမိူင်းလႄႈဝၢၼ်ႈသူၼ်ပဵၼ်ပဝ်ႉမၢႆၵၢၼ်သိုၵ်း- ဝႃႈၼႆ။