မိူဝ်ႈၼႆႉ ဝၼ်းတီႈ 2/12/2023 ယၢမ်းႁူဝ်ၶမ်ႈ မွၵ်ႈ 6 မူင်း သိုၵ်းမၢၼ်ႈ ၸႂ်ႉၶိူင်ႈမိၼ် (J-Fighter) သွင်လမ်း မႃးပွႆႇမၢၵ်ႇ တီႈ ဢိူင်ႇၸေႊလၢၼ်ႉ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ၸၢၵ်ႇမၢၵ်ႇတိူဝ်ႉၺႃးၵူၼ်မိူင်း မၢတ်ႇၸဵပ်း ၸွမ်းလႂ်ၵေႃႉ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ၶိူင်ႈမိၼ်သိုၵ်းမၢၼ်ႈ J-Fighter မႃးပွႆႇမၢၵ်ႇၵႂႃႇ 2 လမ်းဢေႃႈ မိူဝ်ႈၵႆႈယၢမ်းၵၢင်ၶမ်ႈ 6 မူင်းၼႆႉ။ ၸၢၵ်ႇမၢၵ်ႇတိူဝ်ႉသႂ်ႇၵူၼ်းပွၵ်ႉၵၢတ်ႇ မၢတ်ႇၸဵပ်းလႂ်ၵေႃႉဢေႃႈ။ ယဝ်ႉၵေႃႈ တိူဝ်ႉသႂ်ႇလုၵ်ႈ ဢွၼ်ႇ မၢတ်ႇၸဵပ်း ၵေႃႉၼိုင်ႈ။ လုၵ်ႈဢွၼ်ႇတႄႉ ယွၼ်ႉမၢတ်ႇၸဵပ်းႁႅင်းသေ လႆႈသူင်ႇယူတ်းယႃ တီႈဝဵင်းမူႇၸေႊ။ ယၢမ်းလဵဝ် ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းမၢတ်ႇၸဵပ်းလႂ်ၵေႃႉလႄႈ ႁိူၼ်းယေး လူႉၵွႆလၢႆလင် ၸဵမ်ၸိူဝ်းၼႆႉတႄႉ ပႆႇလႆႈႁူႉႁူဝ်ယွႆႈမၼ်း ၶႃႈ”- ဝႃႈၼႆ။
ယၢမ်းလဵဝ် တီႈဢိူင်ႇၸေႊလၢၼ်ႉၼႆႉ ဝၢႆးသိုၵ်းမၢၼ်ႈ မႃးပွႆႇမၢၵ်ႇယဝ်ႉ ၸဵမ်ဢဝ်လႅင်းၾူၼ်း၊ ၾႆးၾႃႉ ၸိူဝ်းၼႆႉ ထုၵ်ႇမွတ်ႇ ပႅတ်ႈမူတ်း ၼႆယဝ်ႉ။
မိူၼ်ၼႆ ၼင်ႇၵဝ်ႇ မိူဝ်ႈၵႆႈ ယၢမ်းဝၢႆးဝၼ်းၼႆႉ တီႈဝၢၼ်ႈၼမ်ႉၶူမ် ၸႄႈဝဵင်းမူႇၸေႊၵေႃႈ ႁိူၼ်းယေး ၵူၼ်းဝၢၼ်ႈ ထုၵ်ႇသိုၵ်း မၢၼ်ႈ ၸႂ်ႉၶိူင်ႈမိၼ်ပွႆႇမၢၵ်ႇသႂ်ႇသေ တိူဝ်ႉၺႃးႁိူၼ်းယေးၵူၼ်းဝၢၼ်ႈလူႉၵွႆၸွမ်းထႅင်ႈလၢႆလင်။
မိူဝ်ႈဝႃး ဝၼ်းတီႈ 1/12/2023 ယၢမ်းႁူဝ်ၶမ်ႈ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇသႂ်ႇ တီႈပွၵ်ႉႁူဝ်ၵၢတ်ႇလႄႈ ၼွင် ၸၢင်ႉ ဝဵင်းၼမ်ႉၶမ်း ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်း လူႉတၢႆ 1 ၵေႃႉ မၢတ်ႇၸဵပ်း 6 ၵေႃႉ။ ၼႂ်းၵူၼ်းမၢတ်ႇၸဵပ်းၼၼ်ႉ တႃႇ 2 ၵေႃႉ မၢတ်ႇၸဵပ်းႁၢဝ်ႈႁႅင်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ