သိုၵ်းမၢၼ်ႈ ၸႂ်ႉၶိူင်ႈမိၼ် ပွႆႇမၢၵ်ႇသေ တူၵ်းသႂ်ႇၵူၼ်းမိူင်းသႅၼ်ဝီ သၢမ်ၵေႃႉပေႃႈမႄႈလုၵ်ႈ လူႉတၢႆထင်တီႈ ၵိုၵ်းႁိူၼ်း။
ဝၼ်းတီႈ 30/11/2023 ယၢမ်းၵၢင်ၶမ်ႈမွၵ်ႈ 9 မူင်းထိုင် 10 မူင်း သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ် မႃးပွႆႇမၢၵ်ႇလူင်သႂ်ႇ တီႈဝၢၼ်ႈၼွင်ၵေႃႇ ဢိူင်ႇမိူင်းပႃး ၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ တိူဝ်ႉသႂ်ႇ ၵူၼ်းဝၢၼ်ႈ လူႉတၢႆ 3 ၵေႃႉ ပေႃႈမႄႈလုၵ်ႈ ၼႆယဝ်ႉ။
ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ ၸႂ်ႉၶိူင်ႈမိၼ်သေ ပွႆႇမၢၵ်ႇတူၵ်းသႂ်ႇဢေႃႈ။ တိူဝ်ႉသႂ်ႇ လုင်းသၢင်ႇႁၢၼ်ႇ ဢႃယု 54 ပီ၊ ပႃႈၶမ်းသူၺ်ႇ ဢႃယု 53 လႄႈ လုၵ်ႈၶူၺ်ၶဝ် ၸၢႆးမွင်ႇလႃႉ ဢႃယု 28 ပီ။ ၶဝ်သၢမ်ၵေႃႉ ပေႃႈမႄႈလုၵ်ႈၼႆႉတႄႉ လူႉတၢႆ ၼႂ်းႁိူၼ်းၵမ်းလဵဝ်။ လၢၼ်ဢွၼ်ႇၶဝ် 2 ၵေႃႉတႄႉ လွတ်ႈၽေးဢေႃႈ”- ဝႃႈၼႆ။
လၢၼ်ဢွၼ်ႇ သွင်ၵေႃႉ ဢၼ်လွတ်ႈၽေးဝႆႉၼၼ်ႉ တေမီးဢႃယု 7 ၶူပ်ႇ ၵေႃႉၼိုင်ႈလႄႈ 2 ၶူပ်ႇပၢႆ ၵေႃႉၼိုင်ႈ။ ၵေႃႉပဵၼ်မေး ၼၢင်း ၸၢႆးမွင်ႇလႃႉတႄႉ လွတ်ႈၽေးဝႆႉယူႇ။ ဢိူင်ႇမိူင်းပႃးၼႆႉ မီးဝႆႉၾၢႆႇတူၵ်းဝဵင်းသႅၼ်ဝီ တေယၢၼ်ဝဵင်းမွၵ်ႈ 15 လၵ်း ၼႆ ယဝ်ႉ။
