ၽူၼ်လူင်လူမ်းလူင် ၽတ်ႉပဝ်ႇႁၢဝ်ႈႁႅင်း ၼႂ်းၸႄႈဝဵင်းမိူင်းၼၢႆး ႁိူၼ်းယေး၊ ဝတ်ႉဝႃး၊ ႁူင်းႁဵၼ်း လူႉၵွႆၼမ် ၵူၼ်းဝၢၼ်ႈထူပ်းတၢင်းယၢပ်ႇ လူဝ်ႇတၢင်းၸွႆႈထႅမ်။
ဝၼ်းတီႈ 8/5/2018 ၶၢဝ်းယၢမ်းဝၢႆးဝၼ်း 2 မူင်းပၢႆ ၽူၼ်လူင်လူမ်းလူင်ၽတ်ႉပဝ်ႇႁၢဝ်ႈႁႅင်း ၼႂ်းၸႄႈဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။
ဢၼ်ၺႃးၽူၼ်လူင်လူမ်းလူင်ၽတ်ႉပဝ်ႇတႄႉပဵၼ် ပွၵ်ႉလွႆဝႄႈ၊ ပွၵ်ႉၼွင်ၵႅဝ်း၊ပွၵ်ႉပေႃႈမိူင်း ဝဵင်းမိူင်းၼၢႆးလႄႈ ဢိူင်ႇၵုင်းလူင် ၸႄႈဝဵင်းမိူင်းၼၢႆး။ ယွၼ်ႉၽူၼ်လူင်လူမ်းလူင်လႄႈ ႁိူၼ်းၵူၼ်း 16 လင်၊ ဝတ်ႉဝႃးသႃလႃး 2 လင် ၊ ႁူင်းႁဵၼ်း 1 လင်လုၵွႆ။ လိူဝ်ၼၼ်ႉ သဝ်ၾႆးၾႃႉၸိူဝ်းၼႆႉၵေႃႈလူမ်ႉ။ ယၢမ်းလဵဝ် ၵူၼ်းဝၢၼ်ႈထူပ်းတၢင်းယၢပ်ႇ။ လူဝ်ႇတၢင်းၸွႆႈထႅမ်။
သၢင်ႇငူဝ်ႉ ၵူၼ်းမိူင်းၼၢႆး လၢတ်ႈဝႃႈ- “ ၽူၼ်လူင်လူမ်းလူင်ပွၵ်ႈၼႆႉလီၵူဝ်တႄႉတႄႉ။ မိူဝ်ႈဢွၼ်တၢင်းၼႆႉဢမ်ႇ ႁၢဝ်ႈႁႅင်းတၢၼ်ႇၼႆႉ။ ယၢမ်ႈလဵဝ်ပႃႇမႆႉပႃႇထိူၼ်ႇတူၼ်ႈမႆႉ ဢမ်ႇမီးၼမ်ယဝ်ႉလႄႈ ၾူၼ်ၾႃႉရႃႇသီႇၵေႃႈလႅၵ်ႈလၢႆႈ။ ၸင်ႇပဵၼ်ၸိူင်ႉၼႆၶႃႈယဝ်ႉ” ဝႃႈၼႆ။
ယၢမ်းလဵဝ် ယူႇတီႈၽူႈတႅၼ်းသၽႃးပႃႇတီႇႁူဝ်သိူဝ်လႄႈ ၽူႈမီးပုၼ်ႈၽွၼ်းၼႂ်းပိုၼ်ႉတီႈ ၵဵပ်းသဵၼ်ႈမၢႆလွင်ႈလူႉ သုမ်းၼႂ်းပိုၼ်ႉတီႈသေ တေတၢင်ႇယွၼ်းတၢင်းၸွႆႈထႅမ်တီႈၼႂ်းသၽႃးၵႂႃႇ ဝႃႈၼႆၶႃႈဢေႃႈ။